✨ Пеејќи ги Божикните каланди, верниците, особено најмладите, насекаде го објавувале Рождеството Христово. Божикната празнична радост луѓето ја изразувале на разни начини: некои, со бротче во рацете кое ја симболизирало црквата, оделе по домовите и го најавувале Божик, некои тоа го правеле со ѕвезда, а други, пак, со пештера. Ова христијанско предание било најзастапено во градовите Битола, Крушево, Струга и Охрид.
✨ Традицијата на најавување на Христовото раѓање со божикна пештера била најсочувана во градот на конзулите, Битола. Таму, младите со помош на повозрасните, од штички, или кори од дрво правеле пештера, во која ставале икона од Рождеството Христово. Оваа пештера што ја симболизирала Витлеемската пештера тие ја нарекувале „спилеон“. Откако ќе ја направеле, децата, собрани во дружини, пеејќи божикни каланди, ги носеле спилеоните од куќа во куќа и го најавувале Христовото раѓање. Домаќините, кои ја слушале каландата, ги дарувале дечињата со пари, ставајќи им ги во пештерата.
✨ Освен одењето по домовите со божикна пештера, постоела уште една убава традиција. Се работи за драмските изведби наречени „Вертеп“. Вертеп е старословенски збор и во превод значи пештера. Вертепот, во кој биле сместени ликовите на Пресвета Богородица, свети Јован Крстител, овци, пастири итн., всушност, бил своевидна слика на настанот поврзан со Рождеството Христово. Вертепот се поставувал на поиздигнато место за да го гледаат сите. Околу него, пред публика, актери со групи деца ја одигрувале драмата на раѓањето Христово.
✨ Сите бадникови и божикни манифестации, кои во потполност се христијански, но се без елементи на паганизам, се израз на длабоката побожност на народот, но, притоа, во никој случај не ги заменуваат богослуженијата, односно не претставуваат централен настан за одбележувањето на Рождеството Христово; напротив, тие само го повикуваат народот на литургиско празнување во храмовите Божји.
. . . . . . . . . . . . . . . . . . . . . . . . .
Режисер - Илија Ико Каров
Сниматели - Стефан Рајхл, Александар Пауновски, Николај Грнчаров
Монтажа - Александар Пауновски
Актери - Владо Дојчиновски и Никица Јанковски
Владо Дојчиноски
❤️🌲🌟 БАДНИКОВИ ПОВОРКИ 2025 - Пренеси ја Божикната радост до секое срце!
👉 badnikovipovorki.mk/
#badnikovipovorki #vertep #vecniotbog #boziknapeshtera