Покана за Бадникови поворки 2020

Елена, Лозано, Димитар и Стефан, ве покануваат...
"БАДНИК ЗА СИТЕ! - РАДОСТ ЗА СИТЕ!"
Ве покануваме сите вас прекрасни луѓе, на ден 6-ти јануари - Бадник, да земете учество во манифестацијата настани, што со најголема љубов и радост, ги организираме во чест на Христовото Раѓање - Божик.
🌟 1. Најпрво од 10:30 до 11 часот, ве очекуваме со вашите деца пред црквата Св.Димитриј за да подигнете ѕвездички за децата и да учествувате во формирањето на најголемата бадникова поворка предводена од Елена Ристеска, Влатко Лозаноски, Димитар Андоновски, Стефан (Некст тајм), Давид Темелков и Златните славејчиња.
🌟 2. Во 11:15 часот, поворката предводена од македонските музички ѕвезди, ќе се упати кон Соборниот храм каде што оваа година, ќе се случи и најавеното обединување на Старите скопски бадникари со Бадниковите поворки.
По тој повод, во дворот на храмот ќе биде изложено најголемото бадниково колаче високо дури 3 метри и тешко над 100 кг., ќе бидат доделени признанија и подароци на бадникарите со најдолг стаж, а во рамките на божикниот концерт што го подготвуваме со гореспоменатите музички ѕвезди, ќе биде промовирана и најново возобновената божикна песна "Христос се роди денес" во интерпретација на Вера Милошевска - Љубојна и традицискиот оддел при ДМБУЦ "Илија Николовски - Луј".
🌟 3. Со пакетчиња за децата, благословени бадникови колачиња за возрасните и пригодна музичка програма со која ќе ги подготвиме срцата за најрадосно да ја примат веста за Христовото Раѓање, ќе го заокружиме овогодинешното чествување, и со најголема љубов ќе ве испратиме дома, за благословот да го понесете во своите домашни огништа.
Традиционално, во речиси исто време, Бадникови поворки на радоста ќе се одржуваат во уште 39 градови и населени места во нашата земја. "Вечниот Бог" ќе се пее, и радост ќе се сее, низ улиците на Битола, Охрид, Струга, Кичево, Прилеп, Дебар, Велес, Штип, Крушево, Куманово, Струмица, Богданци, Виница, Ростуше, Луково, Велгошти, Кривогаштани, Гевгелија, Валандово, Свети Николе, Тетово, Гостивар, Ресен, Могила, Демир Капија, Кавадарци, Пробиштип, Радовиш, Неготино, Кочани, Делчево, Македонска каменица, Дојран, Вратница, Брвеница, Старо село, Беловиште, Рогачево и Теарце, каде распеаните коледарчиња ќе бидат исто така дочекани и дарувани со најголема љубов, почит и пригодни пакетчиња.