गदिमांना गीतरामायणाने अमर केले,दैवत्व प्राप्त करुन दिले,थोर इतिहाससंशोधक महामहोपाध्याय दत्तो वामन पोतदार यांनी तर गदिमांचा 'आधुनिक वाल्मीकी' असा गौरव केला,गीतरामायणाबद्दल गदिमांच्या भावना त्यांनी 'मी तो भारलेले झाड' या कवितेत व्यक्त केल्या आहेत.
सादरीकरण : चि.पलोमा सुमित्र माडगूळकर
मी तो भारलेले झाड!
अजाणतेपणी केंव्हा माता घाली बाळगुटी
बीज धर्माच्या द्रुमाचे कण कण गेले पोटी
छंद जाणतेपणीचा,तीर्थे काव्याची धुंडिली
कोण्या एका भाग्यवेळी पूजा रामाची मांडली
देव वाणीतले ओज शीतळले माझ्या ओठी
वाल्मिकीच्या भास्कराचे होई चांदणे मराठी
झंकाराती कंठ वीणा,येती चांदण्याला सूर
भाव माधुर्याला येई,महाराष्ट्री महापूर
चंद्र भारल्या जीवाला,नाही कशाचीच चाड
मला कशाला मोजता,मी तो भारलेले झाड
.....ग.दि.माडगूळकर