“Ақыл-ойды дамыту және білімнің маңыздылығы” Абай Құнанбаев 14 қара сөз.

“Ақыл-ойды дамыту және білімнің маңыздылығы” Абай Құнанбаев 14 қара сөз.
Абай Құнанбаевтың 14-ші қара сөзінде адамзаттың ой-өрісі мен таным-түсінігінің шектеулігі, білім мен ғылымға ұмтылудың маңыздылығы туралы айтылады. Ол адам баласының әлемді тануға деген ұмтылысы мен табиғаттағы құбылыстарды түсінуге тырысқан әрекетін тілге тиек етеді. Абай бұл сөзінде әсіресе адамның білімсіздігі мен надандығын сынға алып, білім мен ғылымға ұмтылу қажеттігін насихаттайды. Оның ойынша, адам ақыл-ойын дамыту арқылы ғана шынайы өмірдің мәнін түсініп, өз бойындағы мүмкіндіктерді ашып, қоғамға пайдасын тигізе алады.
14 ҚАРА СӨЗ: Тірі адамның жүректен аяулы жері бола ма? Біздің қазақтың жүректі кісі дегені - батыр кісі дегені. Онан басқа жүректің қасиеттерін анықтап біле алмайды. Рақымдылық, мейірбандылық, әртүрлі істе адам баласын өз бауырым деп, өзіне ойлағандай оларға да болса игі еді демек, бұлар - жүрек ісі. Асықтық та - жүректің ісі. Тіл жүректің айтқанына көнсе, жалған шықпайды. Амалдың тілін алса, жүрек ұмыт қалады. Қазақтың «жүректісі» мақтауға сыймайды. Айтқанға көнгіш, уағдада тұрғыш, бойын жаманшылықтан тез жиып алғыш, көштің соңынан итше ере бермей, адасқан көптен атының басын бұрып алуға жараған, әділетті ақыл мойындаған нәрсеге, қиын да болса, мойындау, әділетті ақыл мойындамаған нәрсеге, оңай да болса, мойындамау - ерлік, батырлық осы болмаса, қазақтың айтқан батыры - әншейін жүректі емес, қасқыр жүректі деген сөз.
Қазақ та адам баласы ғой, көбі ақылсыздығынан азбайды, ақылдың сөзін ұғып аларлық жүректе жігер, қайрат, байлаулылықтың жоқтығынан азады. Білімді білсе де, арсыз, қайратсыздығынан ескермей, ұстамай кетеді. Жаманшылыққа бір елігіп кеткен соң, бойын жиып алып кетерлік қайрат қазақта кем болады. Осы жұрттың көбінің айтып жүрген мықты жігіт, ер жігіт, пысық жігіт деп ат қойып жүрген кісілерінің бәрі - пәлеге, жаманшылыққа еліртпек үшін, бірін-бірі «айда, батырлап!» қыздырып алады да, артын ойлатпай, азғыратұғын сөздері. Әйтпесе құдайға терістіктен, не ар мен ұятқа терістіктен сілкініп, бойын жиып ала алмаған кісі, үнемі жаманшылыққа, мақтанға салынып, өз бойын өзі бір тексермей кеткен кісі, тәуір жігіт түгіл, әуелі адам ба өзі?
#қарасөз #әңгімелержинағы #абайқұнанбаев #нақыл сөз #мақалмәтелдер