Cantonese audiobook (粵語有聲書): The Sleeping Princess

呢個故仔我一開始係跟住第二個譯本譯嘅，不過後來發現佢有啲位省略咗啲嘢，所以之後轉咗譯另一個版本。兩個版本嘅網址我都貼咗喺下面啦。
Read The Sleeping Princess (Briar-Rose) in English (translated by Margaret Hunt):
www.gutenberg.org/ebooks/5314
Read The Sleeping Princess (Rose-Bud) in English (translated by Edgar Taylor):
www.gutenberg.org/ebooks/25545
Google Drive: drive.google.com/drive/folder...
睡公主
好耐好耐以前，有個國家嘅國王同皇后一直都冇仔女，佢哋日日都喺度話：「唉，如果我哋有個細路就好啦！」不過有日皇后沖沖下涼，忽然有隻青蛙由水裏面爬咗上嚟，對住佢話：「一年之內你就會願望成真，有個女㗎啦。」
隻青蛙嘅預言係真㗎，皇后果然生咗個女。個女好靚好靚，國王每望公主一眼，幸福感都飆到勁高。佢決定要舉行一場盛大嘅宴會，大肆慶祝。除咗佢啲親朋戚友同埋熟人之外，佢重邀請晒啲仙子出席，希望佢哋會對自己個女好啲。佢個王國裏面總共有十三位仙子，但係佢只有十二隻金碟可以畀佢哋裝嘢食，所以只好唔請其中一位赴宴。
其餘嗰十二位仙子都有嚟到。嗰場宴會真係排場十足。臨走嗰陣，每位仙子都有為小公主送上祝福：一位祝佢有高尚嘅品格，一位祝福佢有美貌，一位祝福佢有財富，諸如此類各種人生在世可以追求嘅嘢，乜都送晒畀佢。
第十一位仙子啱啱送完佢嘅祝福，第十三位仙子就入咗宴會廳。啲人冇請佢嚟真係令佢好嬲，好想報復。佢招呼都冇打，冇望過任何人，就大聲話：「國王個女十五歲就會俾紡錘㓤到，倒地身亡。」跟住佢都冇再講其他嘢，轉身就走。在場嘅人都俾佢嚇呆咗。不過第十二位仙子重未祝福公主，嗰陣佢就行咗上前。佢冇辦法解除個惡毒嘅詛咒，只可以減輕佢，就話：「公主其實冇死，不過佢會沉睡一百年嘅時間。」
國王唔想自己個女承受咁嘅不幸，就下令燒晒全國嘅紡錘。不過咁多位仙子嘅祝福都應驗晒，公主除咗外貌出眾，舉止大方得體，態度和藹可親之外，頭腦重好聰明，唔怪得個個見過佢嘅人都鍾意佢啦。
佢啱啱滿十五歲嗰一日，咁啱國王同皇后都唔喺度，得佢自己一個人喺皇宮。皇宮裏面咩地方都俾佢行過晒，佢鍾意去邊就去邊，一陣去下廳，一陣入下房。佢行行下就到咗一座塔底，座塔睇落都有返咁上下歷史。佢跟住條狹窄嘅樓梯，一圈一圈咁行上去。樓梯盡頭有道細門，上面個鎖插住一條生鏽嘅匙。佢一擰條匙，道門就開咗。門後嗰間細房入面，有個婆婆坐咗喺度。佢忙緊用紡錘，紡啲亞麻纖維做線。
「婆婆，你好呀。」公主問佢：「你喺度做緊咩呀？」
婆婆就答：「我紡緊線呀。」跟住點咗下頭。
「嗰個咩嚟㗎，轉轉下嘅？」
公主講完就伸手攞個紡錘，想試下紡線；但係佢一掂個紡錘，詛咒就應驗咗。佢㓤到咗手指。
佢手指一㓤到嗰下，成個人就撻咗落側邊張床，瞓到不省人事。跟住睡意就逐漸蔓延到成座皇宮。啱啱返嚟嘅國王同皇后入咗大廳之後，就喺嗰度瞓咗，連佢哋啲隨從都一齊瞓晒覺。馬房入面嘅馬都瞓着咗，重有庭院嘅狗、屋頂嘅鴿、牆上面嘅烏蠅，連壁爐度燒緊嘅火都靜靜哋瞓咗，燒肉嘅滋滋聲都冇咗。廚師喺廚房度捉到個男仔做錯嘢，啱啱想扯佢啲頭髮，忽然就鬆咗手，瞓着咗覺。城堡前面嘅風都停咗吹，樹上嘅葉都唔再郁。城堡外圍開始有啲荊棘生咗出嚟。佢哋一年一年咁生上去，越生越高，終於有日生到將座城堡重重包圍，連個頂都封埋。荊棘下嘅城堡已經完全不見天日，包括喺屋頂嗰支旗。
不過全國重流傳住一個傳說：重重荊棘下面，有朵好靚嘅玫瑰花仍然喺度沉睡。佢哋講嘅玫瑰就係嗰個公主。每隔一段時間就會有個王子走去嗰度，試下可唔可以突破重重荊棘，入去嗰座傳說中嘅城堡。不過佢哋係冇可能入到去㗎，因為嗰一大片荊棘全部都繑實晒，實到直情好似係俾啲手抓實咗咁。佢哋俾啲荊棘一直困喺嗰度，出唔返嚟，死得好慘。
好多年後，又有一個王子去咗嗰個國家。佢聽到個阿伯喺度講緊嗰一大片荊棘。聽講嗰啲荊棘後面係有座城堡㗎，城堡入面嗰個公主真係好靚，啲人慣咗叫佢「荊棘後嘅玫瑰」。佢已經沉睡咗足足一百年啦。成座皇宮嘅人，包括國王同埋皇后，都陪佢一齊沉睡咗咁耐。王子自己以前都聽阿爺講過，咁多年嚟已經有好多個王子試過行入嗰片荊棘，結果全部都困咗喺裏面，好可憐咁等死。王子聽完個阿伯講，就話：「我唔怕啲荊棘，我一定要親眼睇下呢朵荊棘後嘅玫瑰。」阿伯好心勸佢唔好去試，但係勸極佢都唔聽。
不過直到而家，公主已經瞓夠一百年嘅時間，終於準備醒啦。王子去到嗰陣，見到嗰一大片已經唔係荊棘，而係啲又大朵又靚嘅花。啲花主動讓咗條路出嚟畀佢，等佢安然無恙咁過咗另一邊，又自動自覺合返埋一齊。
佢望到庭院度啲馬同啲有斑點嘅獵犬都攤咗喺地度瞓覺；停喺屋頂啲鴿隻隻個頭都縮咗落對翼下面。跟住佢行入屋，見到牆上面啲烏蠅都瞓緊覺；廚房入面個廚師隻手都重舉高緊，好似想捉住個男仔；女僕坐咗喺隻黑色嘅雞前面，準備掹佢啲毛。佢繼續向前行，見到大廳入面全部人都攤喺度瞓晒覺，而國王同皇后就喺上面，兩個都瞓咗喺寶座側邊。
跟住佢再行前多啲。周圍咩聲都冇，靜到佢連自己嘅呼吸聲都聽到。行下行下佢終於行咗去嗰座塔，上去開咗道門。公主就喺門後嗰間細房入面，佢瞓緊覺個樣真係好靚。王子由第一眼見佢開始，對眼就再望唔到其他嘢。佢烏低身錫咗公主一下，一錫公主即刻醒咗，擘大眼望住佢，眼神充滿善意。
之後佢哋一齊行樓梯落返去，跟住國王、皇后同埋其他喺廳嘅人都醒返晒，個個你眼望我眼咁，都覺得好難以置信。庭院嘅馬起身之後，都喺度揈自己個身；啲獵犬都跳返起身，搖下搖下條尾；屋頂嘅鴿都由對翼下面伸返個頭出嚟，周圍望下，然後飛向原野；伏喺牆上面啲烏蠅有返動作；廚房個火又燒起咗，搖下搖下咁繼續煮嘢食；啲肉又開始燒到滋滋聲；廚師一巴打咗落個男仔塊面，痛到男仔大叫；女僕掹晒隻雞身上啲毛。
之後，國內就舉行咗一場好盛大嘅婚禮。從此以後，王子同公主一直都生活得好幸福。