Cantonese audiobook (粵語有聲書): The Old Man, His Son, and the Ass

Read the fable in English (edited by Kate Douglas Smith Wiggin and Nora Archibald Smith):
www.gutenberg....
Google Drive: drive.google.c...
兩父子同一隻驢
從前有個爸爸同佢個仔一齊趕緊隻驢去附近嘅市集，想賣咗佢。
有個路人見到就話：「識唔識諗嘢㗎你？有驢唔騎，由佢輕輕鬆鬆咁行，自己同個仔就嘥力跟喺後面。」男人聽完佢講，就抱個仔坐上隻驢上面，然後又繼續行。
下個路人經過見到佢哋，就大聲話：「知唔知醜㗎你？人仔細細已經咁懶，騎住隻驢，要阿爸自己行路。」男人聽佢咁講，就抱個仔落嚟，自己騎咗上去。
冇幾耐有兩個女人經過，其中一個望到佢哋，就同另一個講：「你睇下個阿爸幾自私，自己騎驢，個仔就要跟喺後面行路！」男人聽佢咁講，就扶埋個仔上嚟，坐喺自己後面。
佢哋下一個遇到嘅途人就問阿爸，隻驢係咪佢自己㗎。阿爸話係，途人就話：「你哋咁騎驢法，真係睇唔出喎。兩個咁重矺落隻驢仔度……你哋抬佢行就差唔多。」
阿爸就綁隻驢嘅腳上支杆度，同個仔一齊擔起佢。隻驢好重，壓到佢哋連步路都行唔穩。佢哋搖搖下咁行咗入鎮，路過嘅人見到佢哋行成咁樣，都笑得好大聲。阿爸諗起自己之前為咗就晒所有人嘅睇法，搞咁多嘢，結果只係俾啲人笑，條氣就勁唔順，嬲到抌埋隻驢落河，一手捉住個仔隻手臂，就帶佢掉頭返屋企。