Blogerni jurnalist yoki ommaviy axborot vositalari vakili deb tasniflash mumkinmi?

Avvalo, milliy qonunchilikda “bloger” atamasi qanday tushunilishini aniqlash kerak.
O‘zbekiston Respublikasining “Axborotlashtirish to‘g‘risida” gi Qonuniga muvofiq, bloger - Internet jahon axborot tarmog‘idagi o‘z veb-saytiga va (yoki) veb-sayt sahifasiga hamma erkin foydalanishi mumkin bo‘lgan, ijtimoiy-siyosiy, ijtimoiy-iqtisodiy va boshqa xususiyatga ega axborotni joylashtiruvchi, shu jumladan axborotdan foydalanuvchilar tomonidan ushbu axborotni muhokama qilish uchun joylashtiruvchi jismoniy shaxs.
Endi bu atamani “jurnalist” va “ommaviy axborot vositalari vakili” terminlari bilan solishtirsak.
“Jurnalistlik faoliyatini himoya qilish to‘g‘risida” gi Qonunning 3-moddasiga ko‘ra, jurnalist mehnatga oid yoki boshqa shartnomaviy munosabatlar asosida ommaviy axborot vositalari uchun xabarlar va materiallarni to‘plash, tahlil etish, tahrir qilish, tayyorlash hamda tarqatishga doir faoliyatni amalga oshiruvchi shaxsdir.
O‘zbekiston Respublikasining “Ommaviy axborot vositalari to‘g‘risida”gi Qonuniga muvofiq, OAV- ommaviy axborot vositasi ommaviy axborotni davriy tarqatishning doimiy nomga ega bo‘lgan hamda bosma tarzda (gazetalar, jurnallar, axborotnomalar, byulletenlar va boshqalar) va (yoki) elektron tarzda (tele-, radio-, video-, kinoxronikal dasturlar, Internet jahon axborot tarmog‘idagi veb-saytlar) olti oyda kamida bir marta nashr etiladigan yoki efirga beriladigan, qonunchilikda belgilangan tartibda ro‘yxatga olingan shakli hamda ommaviy axborotni davriy tarqatishning boshqa shakllaridir.
“Bloger”, “jurnalist” va “OAV” degan uchta atamaning taʼrifini ko‘rib chiqib “Ommaviy axborot vositalari to‘g‘risida” gi Qonun blogerlarga taalluqli emas, degan xulosaga kelish mumkin. Chunki “bloger” jismoniy shaxs, “OAV” esa, axborotni tarqatishning ro‘yxatdan o‘tgan shaklidir. Biroq, bloger o‘zi eʼlon qilgan maʼlumotlari uchun javobgar ekanligini anglashi kerak.