Qanday materiallarni tarqatish taʼqiqlangan?

«Ommaviy axborot vositalari to‘g‘risida»gi qonunning 6-moddasi va «Axborotlashtirish to‘g‘risida»gi qonunning 121-moddasiga muvofiq veb-saytning va (yoki) veb-sayt sahifasining yoxud boshqa axborot resursining egasi, shu jumladan bloger hamma erkin foydalanishi mumkin bo‘lgan axborot joylashtiriladigan Internet jahon axborot tarmog‘idagi o‘z veb-saytidan va (yoki) veb-sayt sahifasidan yoxud boshqa axborot resursidan:
· O‘zbekiston Respublikasining mavjud konstitutsiyaviy tuzumini, hududiy yaxlitligini zo‘rlik bilan o‘zgartirishga daʼvat etish;
· ommaviy tartibsizliklarga, fuqarolarga nisbatan zo‘ravonlik qilishga, shuningdek belgilangan tartibni buzgan holda o‘tkaziladigan yig‘ilishlar, mitinglarda, ko‘cha yurishlarida va namoyishlarda ishtirok etishga daʼvat qilish, shuningdek mazkur noqonuniy harakatlarni muvofiqlashtirish;
· jamoat tartibiga yoki xavfsizligiga tahdid soluvchi yolg‘on axborot tarqatish;
· urush, zo‘ravonlik va terrorizmni, shuningdek diniy ekstremizm, separatizm va fundamentalizm g‘oyalarini targ‘ib qilish;
· davlat sirlarini yoki qonun bilan qo‘riqlanadigan boshqa sirni tashkil etuvchi maʼlumotlarni oshkor etish;
· milliy, irqiy, etnik yoki diniy adovat qo‘zg‘atuvchi, shuningdek fuqarolarning shaʼni va qadr-qimmatiga yoki ishchanlik obro‘siga putur yetkazuvchi, ularning shaxsiy hayotiga aralashishga yo‘l qo‘yuvchi axborotni tarqatish;
· jamiyatga, davlatga, davlat ramzlariga hurmatsizlikni namoyon etuvchi, shu jumladan beodoblik bilan ifodalangan axborotni tarqatish;
· giyohvandlik vositalarini, psixotrop moddalarni va prekursorlarni targ‘ib qilish;
· pornografiyani, zo‘ravonlikni va shafqatsizlikni targ‘ib qilish, shuningdek o‘z joniga qasd qilishga daʼvat etish;
· fuqarolarni, shu jumladan voyaga yetmagan shaxslarni ularning hayotiga va (yoki) sog‘lig‘iga yoxud o‘zga shaxslarning hayotiga va (yoki) sog‘lig‘iga tahdid soluvchi g‘ayrihuquqiy harakatlarni sodir etishga undashga yoki boshqa tarzda jalb qilishga qaratilgan axborotni tarqatish;
· qonunga muvofiq jinoiy va boshqa javobgarlikka sabab bo‘ladigan o‘zga harakatlarni sodir etish maqsadlarida foydalanilishiga yo‘l qo‘ymasligi shart.
Ommaviy axborot vositalari orqali fuqarolarning shaʼni va qadr-qimmati yoki ishchanlik obro‘siga tuhmat qilish, shaxsiy hayotiga aralashish taqiqlanadi.
Surishtiruv yoki dastlabki tergov materiallarini prokurorning, tergovchining yoki surishtiruvchining yozma ruxsatisiz eʼlon qilish, muayyan ish natijalarini sud hal qiluv qarori qabul qilgunga qadar oldindan ko‘rish yoki sud qarori yuridik kuchga kirgunga qadar sudga boshqacha tarzda taʼsir ko‘rsatish taqiqlanadi