#159

Salvatore Di Giacomo - 'E cecate 'e Caravaggio (1888)
VOCE: Eduardo De Filippo
Registrazione del 1955
****LASCIA UN LIKE E ISCRIVITI AL CANALE****
- Dimme na cosa. T’allicuorde tu
’e quacche faccia ca po’ ’o munno ’e vista,
mo ca pe sempe nun ce vide cchiù?
- Sì, m’allicordo; e tu? - No, frato mio;
io so’ nato cecato. Accussì ncielo,
pe mme murtificà, vulette Dio…
Lassa sta’ Dio!… Quant’io ll’aggio priato,
frato, nun t’ ’o puo’ manco mmaggenà,
e Dio m’ha fatto addeventà cecato.
- È overo ca fa luce pe la via
’o sole?… E comm’è ’o sole?
- ’O sole è d’oro, comme ’e capille ’e Serafina mia…
- Sarrafìna?… E chi è? Nun vene maie?
Nun te vene a truvà? - Sì… quacche vota…
- E comm’è? Bella? - Sì… è bella assaie…-
Chillo ch’era nato cecato ’a che nascette
suspiraie. Suspiraie pure chill’ ato,
e ’a faccia mmiezz’e mmane annascunnette.
Dicette ’o primmo, doppo a nu mumente:
- Non te lagnà, ca ’e mammema carnale
io saccio ‘a voce… ’a voce sulamente… -
E se stettero zitte. E attuorno a lloro
addurava ’o ciardino, e ncielo ‘o sole
luceva, ’o sole bello, ’o sole d’oro…