فيديو 3 .. تعليق على الحلقة الأولى .. برنامج "سكامبر".. مهارة الاستبدال

مساء الخير عليكم جميعا.. هاه طمنوني.. عملتوا إيه مع أولادكم؟؟.. جربتوا مهارة التكبير ومهارة التصغير؟؟.. اكتبولي يا شباب.. اكتبولي سألتوهم في إيهم وسألتوهم إزاي؟؟ وجابوكوا وقالوا إيه؟؟ .... كبرتوا كام حاجة ؟؟.. وصغرتوا وكام حاجة ؟؟... قععدتو مع بعض كام قعدة؟؟.. صدقوني لو اتكلمتوا مع أولادكم وطلعتوا الإبداعات والأفكار اللي في دماغهم حتسمعوا عجب ... قولولي.. واكتبوا في التعليقات.. كلموني عن خبرتكم وتجربتكم.. شاركوا واتفاعلوا أكتر يا شباب..
أم سألتني: هو أنا ألعب اللعب دي بالتحديد مع ابني ليه؟.. أقولك أنا يا ماما: الأمهات أنواع.. في أم عاوزة ابنها رياضي.. حتوديه النادي وتحرص على التمرين وعلاقته بالكباتن.. وفي أم تانية عاوزة ابنها شاطر في المدرسة .. دي بقي حريصة على المذاكرة والدروس والعلاقة مع المدرسين.. وهكذا.. لكن كلهم.. وعلى اختلافهم بيعلموا ولادهم الحروف (حروف القراية والكتابة بالعربي مثلا او الإنجليزي أو غيره).. تقوليلي ليه؟.. اقولك لأنها مهارات أساسية حتفيده في كل مناحي الحياة بعد كده. كلهم.. وعلى اختلافهم بيعلموا ولادهم الألوان.. تقوليلي ليه؟.. اقولك أصلها حاجة أساسية مهمة في الحياة.
قصدي أقول وإن اختلفت الأهداف النهائية.. فالتفكير الإبداعي بقي وسيلة تصلح للاستخدام في أي مجال من مجالات الحياة.. حيحتاجه الإنسان لتطوير نفسه وتحسين شغله وتسهيل أموره الحياتية.. حيحتاجه في الرياضة وفي المدرسة والجامعة والشغل.. في البيت والنادي .. في علاقاته... ده أسلوب تفكير.. بصي حواليكي كده.. وفكري شوية.. حتلاقي أي حد ابتكر أي شيئ جديد.. هو في الحقيقة استخدم أحد مهارات الإبداع في برنامج "سكامبر".. أصحاب المطاعم مثلا بيسوقوا لنفسهم إزاي؟.. بيكبروا الوجبة والساندوتش .. وأصحاب محلات الملابس بيسوقوا لنفسهم إزاي؟: ينزل عرض: اشتري اتنين وخد التالت مجانا.. الرياضيين طوروا كرة القدم.. وخللوا باليد في جون برضو.. ورجعوا غيروها وخللوها في حلقة قصدي الباسكت.. ولعبوا بيها في المية.. كرة المية.. شاطوها بمضرب بدل الرجل.. التنس أو البيسبول أو الجولف.. صغروا المساحة على ترابيزة بقت بنج بونج.. الدكاترة .. كان الدكتور زمان عشان يسمع قلب المريض يحط ودنه على صدره.. جه دكتور لف ورقة كده زي البوق وحطها على صدر مريضة عشان مايضايقهاش.. فالصوت كبر.. اتطورت بعد كده الفكرة دي كذا مرة ووصلت للسماعة اللي بيستخدمها الدكاترة في شكلها الحالي المعروف.. كل دي وغيرها كتير.. مجرد أمثلة لاستخدام مهارات التفكير الإبداعي.. مهارات أساسية .. نتكلم.. ونلعب.. ونستفيد.
حكلمكم النهارده عن "مهارة الاستبدال"..
قول لابنك وبنتك.. هو ليه القلم الرصاص معمول من الخشب؟.. ماينفعش يتعمل من حاجة تانية؟.. طب هو ليه الشباك معمول من الإزاز؟.. ماينفعش يتعمل من حاجة تانية؟.. طب هو ليه البيوت معمولة من الطوب؟.. ماينفعش تتعمل من حاجة تانية؟.. وابدا دردش معاه.. خللي بالك.. في أقلام رصاص من بلاستيك وأقلام رصاص سنون وجايز تحتاج توريهاله حقيقية أو صور.. الشبابيك أحيانا بتكون من بلاستيك شفاف.. وأحيانا بتكون من خشب بس زي المشربيات بتاعة البيوت القديمة.. في بيوت من خشب.. وبيوت من طين.. وبيوت من قماش الخيام يعني.. اطرحوا مع بعض أسئلة وجاوبوا بأفكار تانية كتير.. اسرحوا شوية وتخيلوا.. وغيروا في الحاجات اللي حوالينا واللي اتعودنا عليها مصنوعة من مادة معينة.. ومفكرناش نغيرها.
قول لابنك وبنتك.. هو ليه العربية مستطيلة؟.. ماينفعش يبقي ليها شكل تاني ؟.. مدورة زي علبة التونة مثلا.. طب تعالى نحاول نرسمها بالشكل الجديد ده.. طب هو ليه الساعة اللي على الحيطة بعقارب؟.. ماينفعش يبقي ليها شكل تاني؟.. فكروا وارسموا سوا.. طب هو ليه الكوباية شكلها كده؟.. ماينفعش يبقي ليها شكل تاني ؟.. فكروا مع بعض وارسموا مع بعض.. وصوروا رسوماتكوا وابعتوها ع الصفحة..
يا ترى ممكن نغير أكرة الباب؟..
يا ترى ممكن نغير دريكسيون العربية؟؟..
يا ترى ممكن نغير سوستة الجاكت؟؟..
يا ترى ممكن نغير رجل الكرسي؟؟..
يا ترى ممكن نغير لون البطيخ/ لون الطماطم/ لون الزيتون/ لون المشمش؟؟..
احلموا وتخيلوا وفكروا وابدعوا...
فكروا في اسم جديد للكمبيوتر بدل كمبيوتر.. ممكن إيه؟؟.. اسم جديد للموبايل.. اسم جديد للمروحة.. للتلفزيون.. التلاجة.. الموز.. السلطة.. الكنبة.. غيروا أسامي الحاجات اللي حواليكم واختارولها أسماء جديدة.. على سبيل اللعب والتغيير شوية موش أكتر.. خللوا بالكم اللعبة دي موش للأطفال المتأخرين لغويا.. لازم يكونوا الأطفال بيتكلموا كويس.. وأفضل مع بداية سن المدرسة (4-5 سنين) فما فوق.. ابعتوا وقولولي فكرتوا في إيه.. أشوفكوا الفيديو الجاي.
كما يمكنكم المشاركة عبر الرابط التالي:
www.facebook.c...
ويمكنكم متابعة ومشاركة هذا الهاشتاج...
#سيبوا_موبايلاتكوا_والعبوا_مع_ولادكوا
الراعي الرسمي للمبادرة وبرنامج " كل يوم لعبة " شركة آي كيو ميديا برودكشن IQ Media Production Company
www.facebook.c...
#شركة_آي_كيو_ميديا_برودكشن