La Vieya del Carbayón - Mazcaritos d'Uviéu

LA VIEYA DEL CARBAYÓN
L’Asociación Cultural Mazcaritos d’Uviéu, siguendo les normes sanitaries y sumándose con responsabilidá a la campaña pola salú pública, tien de suspender La Vieya del Carbayón, el pasucais anunciao pal martes 17 de marzu, que diba dir de 19 a 20h dende’l Campo San Francisco a la Plaza del Carbayón.
La tradición de partir la vieya baxo l’arbol tutelar de la ciudá a metanes de la Cuaresma ye parte del llabor etnográfico que facemos de recuperación del Antroxu tradicional del Conceyu. Constantino Cabal citaba esta tradición, viva nel Uviéu del sieglu XIX, que xunía la mitoloxía col vezu de partir la Cuaresma. Falaba d’una vieya que salía de nueche del Campo San Francisco, hasta l’árbol de la ciudá. Poníase de partu embaxo l’arbolón dando glayíos y estampanaba con una traca qu’asustaba a los neños. Consolábenlos les madres, que-yos dicíen que yera la Vieya qu’arreventara, pero que nun tovieren miéu, porque la vieyona yera bona xente y dexará-yos dulces embaxo la fueya. Esta tradición local yera una “vieya Cuaresmera”, asemeyada a la Vieya del Monte lleonesa, la Caileach celta o la Anna Perenna romana.
La Vieya del Carbayón recreámosla l’añu pasáu, y tábemos preparando con ilusión la del 2020, con piñata pa los “mazcaritinos”, pero nun tenemos más remediu que suspendela. A la perda d’esta actividá, xúnese la de los Mazcaritos d’Uviéu en Valdesoto, el sábadu 21, al aplazase les XIII Xornaes de Mazcaraes d’Iviernu. Too ello supón dafechu la cancelación de les nuestres actividaes, hasta que pase la crisis sanitaria.
Cola fin de que nun se pierda la tradición y puea siguir con puxu l’añu venideru, queremos recordar la Vieya estos díes murnios d’obligada cuarentena que los críos nun puen salir a xugar al Campo. Agora que les families tienen a neñes y neños aburríos en casa, y los árboles del parque nun dan sombra a los xuegos, podíen cunta-yos esta hestoria d’una vieya y un árbol que pasa de la folixa antroxera a la Cuaresma, y del mieu a l’allegría de la Primavera, pa que la pintaren, o xugaren a antroxala, dexándo-yos a la nueche unes llambiotaes de parte la Vieya del Carbayón.