Waldstettener Dialekt

FN-Projekt Mundart. Text der Heimatserie der Fränkischen Nachrichten "Die Sinne werden wieder wach", gesprochen von Monika Frisch, Quelle: www.fnweb.de/regionales/mundar...
Der Text handelt von Deubach, einem Stadtteil von der Weinstadt Lauda-Königshofen
Monika Frisch (Waldstetten)
Di Sinn wern widder wach
Mid gnab hunnerd Äiwohner is Daübi dr glänschde Stadtdaal vunn Laude-Könichshoufe. Ä ruhichs, beschaulichs Ördle, wie gmohlt halt, äigsaümt vunn Ägger, Obstwiesche und Woald, weid fort vunn Heggdig unn Vorkehr, ruhich in ämme gloane Seidedoal vumm Balbachdoal gleeche. Woss haaßt "Hoamed" in dem gloane ländliche Oard?
Än Kaufloade gäbbds nimmi unn ä Werdschafd a scho lang nimmi. Äs gäbbd a nor no ä boar, wu Bauerei schaffe. Än Haufe jungi Laüd senn fortgange, weil sie studiern odder weche dr Ärbed, odder weils hald groad modern is. Die senn zwischezeidlich wu annersch dähoam.
Abber äs gäbbd a Zugezocheni, for die wu Daübi ä naüi Hoamed worn iss. "Die Sinn wern widder wach" moand sou än Naü-Daübemer noch zwölf Joahr, wu er do wohnd. Der iss aus'm Unnerallgaü, aus dr Nöh vunn Bad Wörishofe. Er nemmd die Laüd oh, wie si sänn, unn dudd nedd immer Vorgleiche ohstelle mit do, wu er früher gwohnd hot. Än annere, wu ursprüngli vunn Münche kümmt, wohnd seid übber sechs Joahr in däm gloane Oard.
Mor iss ja scho weid weg vumm Schuss, abber die zentral Vorsorchung mit dem, wos'd alli Doach brauchsch unn äs bürcherschafdliche Zammehalde unn Engagement hot däzu beigedroache, noch Daübi zu ziehe. Wäche dä Laüd, wu er nöher kenneglernd hot, iss er do heimisch worn.
Dass dich vor allem uff die Laüd vorlosse konnschd, des hot äs Heimatgfüh vorstärkt. Unn wenn die modern Technik wie zum Beischbiel äss DSL däzu kümmd, konn mer a äss Oard als Hoamed addragdiv halde.