Buddhist celebrationནང་པའི་དུས་ཆེན།།

བསྐལ་པ་དཔག་ཏུ་མེད་པའི་སྔོན་རོལ་ན།།
ཁྱེད་ནི་མཐོ་དམན་ཀུན་གྱིས་བརྙས་པའི་ཚེ།།
དང་པོ་བྱང་ཆུབ་མཆོག་ཏུ་ཐུགས་བསྐྱེད་པ།།
སེམས་དཔའ་ཆེན་པོ་ཁྱོད་ལ་ཕྱག་འཚལ་ལོ།།
སྔོན་དུས་རྒྱལ་པོ་ལ་སོགས་གྱུར་པའི་ཚེ།།
ཆོས་ཀྱི་ཕྱིར་དུ་ལུས་ལ་མར་མེ་དང་།།
ལྕགས་ཟེར་སྟོང་གདབ་མེ་དོང་ནང་དུ་མཆོང་།།
སྙིང་སྟོབས་ཆེན་པོ་ཞབས་ལ་ཕྱག་འཚལ་ལོ།།
རྒྱལ་སྲས་སེམས་དཔའ་ཆེན་པོས་ཚུལ་བཟུང་ནས།།
འགྲོ་བ་དུ་མར་བདེ་ལ་བཀོད་མཛད་པའི།།
སངས་རྒྱས་བྱེ་བ་ཁྲི་ཕྲག་མཉེས་གྱུར་པ།།
ཐུགས་རྗེས་ཆེན་པོ་ཁྱོད་ལ་ཕྱག་འཚལ་ལོ།
མི་སྐྱེ་ཆོས་ལ་བཟོད་པ་བརྙེས་ནས་བཟུང་།།
རྣམ་འདྲེན་ལྔ་པས་ཡོངས་འཛིན་ཉིད་བསྟེན་ནས།།
དབུ་ཡི་གཙུག་ཏུ་འབྲལ་མེད་བསྒོམས་པའི་མཐུས།།
བྱིན་གྱི་བརླབས་པའི་བྱང་ཆུབ་མཆོད་རྟེན་འཁྲུངས།།
འགྲོ་བ་དཔག་མེད་ཐར་པའི་རྒྱུ་གྱུར་པ།།
བསོད་ནམ་ཞིང་མཆོག་ཁྱོད་ལ་ཕྱག་འཚལ་ལོ།།
དེ་བཞིན་གཤེགས་པ་ཤཱཀྱ་ཐུབ་དེ་ལ།།
འཇམ་གང་ཞིག་ནི་དབུལ་བར་བྱས་ནས་ཀྱང་།།
ཉིད་དང་འདྲ་བའི་སྨོན་ལམ་འདེབས་པའི་མཐུས།།
རྣམ་འདྲེན་བཞི་པར་གྱུར་ལ་ཕྱག་འཚལ་ལོ།།
སྟོང་རྩ་ལ་སོགས་སངས་རྒྱས་བྱང་སེམས་ཀུན།།
རྩོད་ལྡན་སྙིགས་མའི་དུས་འདིར་དོར་བའི་ཚེ།།
ཁྱེད་ཀྱིས་འཇིགས་མེད་ཁྲབ་དང་སྟོབས་ཀྱི་མཚོན།།
གོ་ཆ་བགོ་མཛད་ཁྱོད་ལ་ཕྱག་འཚལ་ལོ།།
བྱམས་པ་རྒྱལ་ཚབ་ཉིད་དུ་དབང་བསྐུར་ནས།།
འཛམ་བུ་གླིང་དུ་གཟིགས་པ་ལྔར་གཟིགས་ཞིང་།།
ལྷ་བུ་དགའ་ལྡན་གནས་ནས་འཕོ་མཛད་པ།།
སྒྱུ་འཕྲུལ་ཆེན་པོ་ཞབས་ལ་ཕྱག་འཚལ་ལོ།།
ཡོན་ཏན་ཀུན་ལྡན་ཡབ་ཡུམ་མཆོག་གཟིགས་ནས།།
གླང་ཆེན་ཐལ་ཀར་མཆེ་བ་དྲུག་ལྡན་ཚུལ།།
སྒྱུ་འཕྲུལ་ལྷ་མོའི་ལྷུམས་སུ་ཞུགས་མཛད་པ།།
ཐབས་མཁས་ཐུགས་རྗེ་ཅན་ལ་ཕྱགས་འཚལ་ལོ།།
བཀྲ་ཤིས་ལུམྦི་ཚལ་དུ་སྐུ་བལྟམས་ནས།།
ཕྱོགས་བཞི་གོམ་སྟབས་བདུན་བདུན་སྤོས་ཙམ་གྱི།།
ལྷ་དང་ལྷ་མིན་ཀུན་གྱིས་མཆོད་གནས་གྱུར།།
སྐྱེས་བུ་དམ་པ་ཁྱོད་ལ་ཕྱག་འཚལ་ལོ།།
ཤཱཀྱའི་གྲོང་དུ་གཞོན་ནུ་ལྔ་བརྒྱ་དང་།།
སྣ་མང་སྒྱུ་རྩལ་འཕོང་དང་སྟོབས་སོགས་འགྲན།།
ཀུན་ལས་རྒྱལ་ཏེ་བཟོ་གནས་མཁས་མཛད་པ།།
འགྲན་མེད་ཁྱུ་མཆོག་ཁྱོད་ལ་ཕྱག་འཚལ་ལོ།།
ས་འཚོ་མ་དང་གྲགས་འཛིན་རི་དྭགས་སྐྱེས།།
ཡོན་ཏན་ཀུན་ཚང་བུད་མེད་མཆོག་གྱུར་གསུམ།།
བཙུན་མོ་དམ་པ་འཁོར་དུ་རོལ་མཛད་པ།།
རྒྱལ་སྲིད་སྐྱོངས་མཛད་ཁྱོད་ལ་ཕྱག་འཚལ་ལོ།།
གྲོང་ཁྱེར་སྒོ་བཞིར་སྐྱེ་རྒ་ན་འཆི་དང་།།
ཚངས་སྤྱོད་རབ་ཏུ་བྱུང་བ་གཟིགས་མཛད་པའི། །
འཁོར་བར་ངེས་པར་འབྱུང་བའི་ཐུགས་སྐྱེས་ནས།།
རབ་ཏུ་བྱུང་བ་མཛད་ལ་ཕྱག་འཚལ་ལོ།།
སློབ་དཔོན་གཞན་ལས་སྙོམས་འཇུག་བརྒྱད་ཐོབ་ནས།།
ཆུ་ཀླུང་ནེ་ར་ཛྙ་ནའི་ཉེ་འགྲམ་དུ།།
ལོ་དྲུག་དཀའ་བ་སྤྱད་པའི་བརྩོན་བསྐྱེད་པ།།
བརྩོན་འགྲུས་ཕ་རོལ་ཕྱིན་ལ་ཕྱགས་འཚལ་ལོ།།
ལེགས་སྐྱེས་མ་དང་ཁྱེའུ་བཀྲ་ཤིས་ཀྱིས།།
རྫས་མཆོག་ཕུལ་བའི་རྟེན་འབྲེལ་ལེགས་གཟིགས་པའི།།
བྱང་ཆུབ་ལྗོན་ཤིང་དྲུང་དུ་བཞུགས་མཛད་ནས།།
མཉམ་པར་གཞག་པར་མཛད་ལ་ཕྱག་འཚལ་ལོ།།
མ་ག་དྷ་རུ་རྟེན་འབྲེལ་ཟབ་མོ་ལ།།
མཉམ་གཞག་མཛད་པས་སྲོད་ལ་བདུད་སྡེ་བཅོམ།།
ཐོ་རེངས་མངོན་པར་རྫོགས་པར་བྱང་ཆུབ་པ།།
བདུད་བཞི་བཅོམ་མཛད་ཁྱོད་ལ་ཕྱག་འཚལ་ལོ།།
ཚངས་དང་རྒྱ་བྱིན་གཉིས་ཀྱིས་གསོལ་འདེབས་དང་།།
དུས་དང་དུས་མིན་ཇི་བཞིན་གཟིགས་པའི་མཐུས།།
ཝཱ་ར་ཎ་སཱིར་ལ་སོགས་འཁོར་རྣམས་ལ།།
ཐར་པའི་ལམ་སྟོན་མཛད་ལ་ཕྱག་འཚལ་ལོ།།
སྟོན་པ་དགུང་གྲངས་བརྒྱད་བཅུ་གྱ་གཅིག་ལོ།།
རྩ་མཆོག་གྲོང་དུ་གྱད་མི་རྣམས་ཀྱི་ཁྱད།།
ཞལ་ཆེམས་མཐའ་མ་མཛད་ནས་ཞི་བར་གཤེགས།།
མཛད་པ་མཐར་ཕྱིན་ཁྱོད་ལ་ཕྱག་འཚལ་ལོ།།
བོད་ཟླ་བཞི་པའི་ས་ག་ཉ་ཡི་ཉིན།།
སྟོན་པ་ཐུགས་རྗེ་ཅན་གྱི་སྐུ་དྲིན་དང་།།
ཡོན་ཏན་ཟུར་ཙམ་གླིང་དྲན་བྱས་པའི་མཐུས།།
མ་གྱུར་འགྲོ་ཀུན་བྱང་ཆུབ་ཆེན་པོར་ཤོག།
ཕྱི་ལོ་༢༠༢༤ ས་ག་ཉའི་ཉིན་མོ་བྲག་དོན་འགྲུབ་རྒྱལ་མཚན་ནས་བྲིས།།

[@dhondup888]

hi