ឯកឧត្តមម៉ៅ ធនិន​ បន្តចិញ្ចឹមលោកយាយអាយុ៩៩ឆ្នាំ រហូតគាត់អស់បុណ្យពីជាតិនេះ

ឯកឧត្តម ម៉ៅ ធនិន អភិបាលនៃគណៈអភិបាលខេត្តនិងជាប្រធានគណៈកម្មាធិការសាខាកាកបាទក្រហមកម្ពុជា ខេត្តពោធិ៍ សាត់ បន្តការចិញ្ចឹមលោកយាយ សោម ស៊ុន ហៅកក អាយុ៩៩ឆ្នាំ រស់នៅភូមិកោះអណ្តែត ឃុំត្រពាំងជង ស្រុកបាកាន រហូតដល់ គាត់អស់បុណ្យពីជាតិនេះមិនឲ្យគាត់លំបាកវេទនាដូចកាលពីមុននោះទៀតឡើយ។
ឯកឧត្តម ម៉ៅ ធនិន មានប្រសាសន៍បែបនេះក្នុងឱកាសអញ្ជើញសំណេះសំណាលនិងនាំយកអំណោយមនុស្សធម៌របស់ សាខាកាកបាទក្រហមកម្ពុជាខេត្តពោធិ៍សាត់ ជូនលោកយាយដល់លំនៅឋាន នាថ្ងៃទី២២ខែមេសាឆ្នាំ២០២០ រួមមាន អង្ករ១០០គីឡូក្រាម មី២កេស ទឹកក្រូច២កេស ទឹកត្រី២យួរ ទឹកស៊ីអ៊ីវ២យួរ ក្បាក់២ ឃីត២កញ្ចប់ក្នុងមួយកញ្ចប់មានសម្ភារៈ៤មុខនិងថវិកា១លានរៀល ដោយមានការចូលរួមពីលោកខូយ រីដា អភិបាលរងនៃគណៈអភិបាលខេត្តនិងជាអនុប្រធានគណៈកម្មាធិការ លោក វ៉ាន់ ហ៊ាង នាយកប្រតិបត្តិ សាខា កាកបាទក្រហមកម្ពុជាខេត្តព្រមទាំងអាជ្ញាធរស្រុក ឃុំនិងភូមិផងដែរ។
ឯកឧត្តម ម៉ៅ ធនិន បានថ្លែងនូវការកោតសរសើរចំពោះលោកយាយ សោម ស៊ុន ហៅកក រហូតមកដល់ពេលនេះមានអាយុ៩៩ឆ្នាំទៅហើយនៅតែមានសុខភាពមាំមួនល្អនេះដោយសារគាត់ឧស្សាហ៍ព្យាយាម តស៊ូ ធ្វើពលកម្មច្រើនដូចជាធ្វើអំបោសអំពីជក់ដូងសម្រាប់ដោះស្រាយជីវភាពប្រចាំថ្ងៃមិនដែលទំនេនោះឡើយ។ដោយមើលឃើញពីការខិតខំតស៊ូឧស្សាហ៍ព្យាយាមគ្រប់បែបយ៉ាងរបស់លោក យាយ សោម ស៊ុន នោះ ទើប ឯកឧត្តម មានក្តីអាណិតអាសូរ ដោយបានសន្យាថា បន្តជួយផ្គត់ផ្គង់និងចិញ្ចឹមជារៀងរហូត មិនទុកឲ្យគាត់លំបាកវេទនាទៀតនោះឡើយ លុះត្រាតែគាត់អស់បុណ្យទើបឈប់ ហើយកិច្ចការទាំងអស់នេះអាជ្ញាធរ មូលដ្ឋានត្រូវតែមើលការខុសត្រូវឲ្យបានច្បាស់លាស់ត្រឹមត្រូវ។ ឯកឧត្តមបានថ្លែងជម្រាបជូនថា ផ្តើមចេញពីទឹកចិត្តសម្បុរសធម៌ និងគិតគូរអំពីសុខទុក្ខរបស់ប្រជាពលរដ្ឋជាពិសេសជនចាស់ជរាគ្មានទីពឹង ជនពិការស្ត្រីម៉េម៉ាយមានកូនច្រើននោះ សម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុន សែន ប្រធានកាកកាបាទក្រហមកម្ពុជាតែងតែចាត់ក្រុមការងារថ្នាក់ ខេត្ត ស្រុក ក្រុង នាំយកនូវស្បៀងនិង សម្ភារៈ ចុះចែកជូនដល់ខ្នងផ្ទះ ជាក់ស្តែងដូចជាក្នុងអំឡុងនៃការរីករាលដាលជម្ងឺកូវីដ១៩ ដែលជាជម្ងឺឆ្លងដ៏កាចសាហាវបំផុតតែក្នុងមួយប៉ព្រឹកភ្នែកប៉ុណ្ណោះវាអាចបង្កវិនាសកម្មបានយ៉ាងឆាប់រហ័សនាពេលនេះ រដ្ឋបាលខេត្ត កាកបាទក្រហមកម្ពុជាខេត្ត និងក្រុមការងារ គ្រប់ផ្នែក គ្រប់ថ្នាក់ បាននាំយកស្បៀងនិងសម្ភារៈទៅចែកជូនគ្រប់ទីកន្លែងគឺមិនឲ្យប្រជាពលរដ្ឋយើងណាម្នាក់ស្លាប់ដោយសារ អត់បាយនោះឡើយ។ តាមរយៈនេះក្នុងនាមអាជ្ញាធរខេត្តពោធិ៍សាត់ សូមអំពាវនាវដល់បងប្អូនប្រជាពលរដ្ឋទាំងអស់ត្រូវយកចិត្ត ទុកដាក់បង្ការការពារខ្លួនដោយយកជាប់ជាមួយនូវម៉ាស់ ទឹកអាកុល ដុសលាងសម្អាតជាប្រចាំ យើងទាំងអស់គ្នាត្រូវចងចាំ កុំមើល ស្រាល កុំធ្វេសប្រហែស និងត្រូវចូលរួមទប់ស្កាត់ការឆ្លងមេរោគកូវីដ១៩ ដោយអនុវត្តទៅតាមការណែនាំរបស់រាជរដ្ឋាភិបាលកម្ពុជា និងក្រសួងសុខាភិបាលសំដៅធ្វើយ៉ាងណាសហគមន៍យើងគ្មានមេរោគកូវីដ១៩នោះឡើយ ៕ ស្ងួន ឈឿន ពោធិ៍សាត់