1/64 LCD Pagani Imola Purple

原本無諗住買車仔, 因為巳經退左坑, 去現時點本想就係去買龍珠 figure 既, 但手慢無就買唔到, 反而比我發現呢架野, 一望落去, 隻變幻紫吸引到我既注意, 尤其係連尾翼都上埋同一隻色, 真係好難得, 因好多尾翼都做黑色, 個人唔係咁鐘意, 望落架車到有時會好似見唔到尾翼咁, 黑色難以睇清楚啲細節位, 換言之會隱藏細節, 要係光線好充足既地方先可以看清楚, 有時暗時就連成個主體即係尾翼都可能睇無到, 但油同一隻色就好似一體成型咁會睇得好清楚成個真正既車型。 呢架車真係幾鐘意佢尾翼既設計, 呈弧型, 隻翼亦托住得好靚, 成架車設計好優美, 配呢隻 midnight purple 係襯到絕。
尤其呢隻變幻紫唔會好似 JEC 既魔幻紫咁變到綠色出嚟, 個人最唔鐘意係隻金屬綠, 感覺好唔靚。先前 cm model 都有出呢架同一款, 又係變幻紫咁, 但用左銀色車link, 個人又唔係咁鐘意, 硬係望落 LCD 既顏色質感超順眼, 所以破例收埋佢。其實 SHF 響鬼再版都係用魔幻紫, 即係會出到啲綠色, 反而初版紅紫色先係最靚, 或者有人會覺呢種金屬綠好睇, 但我真係完全唔識得欣賞喇。
做左一個實驗, 可以係 Shorts 到見到係人造燈光下同自然陽光下, 三個牌子 LCD, Error 404 同 Inno64 因應光線既變色情況。LCD, Inno 同 Error 404 都係係強光下會轉藍色，但 Inno 係人造燈光下感光比較弱唔容易變藍，但係天然陽光下就好易變藍，而 LCD 同 Error 404，係係人造燈光同天然陽光下都可以輕易變色轉藍，咁就變色能力嚟講，後兩者比 Inno 優勝。另一方面，顏色嚟講，都係後兩者優勝，因 Inno 既紫色偏粉紅而藍色就偏綠, 咁既紫同藍個人覺得唔靚。鐘意淺色或粉色既, Error 404 靚, 鐘意深色既, LCD 靚。
通常係現時點買呢啲車仔, 有時好彩架車放得好出, 啲白色燈光又打到正一正, 應一應係架車頂到, 即車頂同車側你都會睇得好清楚, 開頭望時我真係完全見睇唔到漆面有咩瑕疵, 真係返到屋企好似照雞蛋咁係光管下望真係都發現唔到咩QC 問題, 漆面完全無瑕, 無墨屎, 無刮痕, 碳纖亦無瑕, 真係唔知係我時運高定LCD 既QC 監控巳經造到非常出色, 因為買 Tarmac, Inno, MiniGT, PGM, HKM, 其實都好容易發現佢地啲QC 問題, 好難得係陳列時係咁清楚既光線下你會睇唔到有咩QC 問題, 咁就緊係即刻買左先, 先前有幾架, 睇落去QC都係好靚, 咁諗住行完現時點走時先買, 點知只係過左10分鐘至20分鐘時間到, 返轉頭果幾架車都比人買走左, 巳經發生過幾次, 所以而家一睇啱都係要即買, 費事又重蹈覆轍轉瞬即逝, 之後需要又見到同一款係返個陳列到或係其他舖到, 但QC 都無最先見到果架咁好, 有時買車仔都係講緣份, 就當係感激我遇上。
呢隻都係 midnight purple, 慣常都係紫藍兩色互換, 有埋黃色我睇係最靚級數既三色互換, 最鐘意 Error 404 既 midnight purple, 因為偏向粉紫同粉藍, 而且係大多時間都可以雙色同出, 真係好靚, 而 LCD 同 Inno64 既 midnight purple 都係較深色, 鐘意 LCD 既 midnight purple 多啲, 因為佢所出既藍係比 Inno 靚好多, Inno 隻藍係有啲偏向綠, 而LCD 係偏向紫藍咁, 而且對LCD 造功好有信心, 買過佢幾架車仔就知,因為造功一流, 啲細節例牌做足, 而且佢溝啲色亦好靚, 性價比超高。係自然光或陽光下, 呢架車既紫同藍都係靚過 Inno64, 但最靚始終係 Error 404, 今次呢架 LCD 真心完全無買錯, 超靚超值, 快啲去搶購喇, 我估計嚟緊星期六再去現時點呢架車應該比人搶購晒, 哈哈! Let see…
真係搞笑, 收返啲車仔時先發現 Error 404 可以出到蘋果綠色, 好粉下咁, 真係未見過佢出呢隻色, 嚇左一跳, 買左咁耐係唔同燈光同角度下都未見過呢隻色, 真係估佢唔到, 真係唔知算係驚喜定驚嚇, 佢隻金屬綠同樣係偏粉, 但比深錄係靚啲, 真係唔識形容果刻既心情, 望住都好迷惘。