བོད་ཀྱི་ནད་པ་རོལ་ཚོགས། - བཀྲ་ཤིས་དང་སྒྲོལ་མ། Bod Kyi Nepa Roltsok - Tashi Dang Dolma (Audio)

བཀྲ་ཤིས་སྦག་སྦག་གི་འཕོང་ལ་བསྐྱོན་ཏེ་རྫོང་མཁར་གྱི་སློབ་གྲྭར་བསྐྱལ
དེ་དུས་ཁོ་རང་ཕོ་ལོ་བཅུ་གཉིས་ཡིན་ཞིང་ལུག་ཁྱུར་འབྲལ་དགོས་པས་མིག་ཆུ་ལྷུང
ལག་ཟུང་གསལ་བྱེད་ཀྱི་འོད་ལ་རེག་པས་འཇིག་རྟེན་གཞན་པའི་གསང་ལམ་མཐོང་
དེ་ལས་དཀའ་སྡུག་མེད་པའི་སྒོ་མོ་ཞིག་ནི་རང་ལ་བརྒྱངས་ཡོད་པའི་འཁྲུལ་སྣང་སྐྱེས
ཧང་ཀང་གི་གློག་བརྙན་ལས་དུད་ཆང་ལག་ངན་ན་རྒྱུ་མེད་པའི་དྲག་རྩལ་བསླབས
གླིང་སྒྲུང་དང་འདོད་བསྟན་ལས་སྙན་ཚིག་ཆོ་འཕྲུལ་ལག་ལེན་མ་ཐུབ་པའི་ཆོ་ག་སྦྱངས
ལོ་རིམ་བཞི་བའི་སྐབས་སུ་བུ་མོ་ཞིག་ལས་ཆེས་ཐོག་མའི་དྲན་རྟེན་ཐོབ
རྩྭ་ཐང་གི་རྫོང་མཁར་ཤིན་ཏུ་ཆུང་ཡང་ནང་སེམས་འདུ་འཛི་དང་འུར་གྱིས་སྦགས
སྒྲོལ་མ་རྩྭ་ཐང་དང་འབྲལ་བའི་ནངས་མོར་རྩྭ་ཐང་ལ་སྨུག་པ་ཆེན་པོ་འཐིབས
ཆུང་དུས་ནས་ཨ་ཕ་མེད་པའི་མོ་རང་གྱེས་བྲལ་ལ་ཡེ་ནས་སྐྲག་མྱོང་མེད
སྒོ་སམ་ལས་ཐག་རིང་གི་རི་ཆུ་མཐོང་བས་དེ་ལ་འགྲོ་འདོད་ཀྱི་འདུན་པ་སྐྱེས
རྒྱུགས་ཤོག་ལས་གསལ་བའི་སྐར་གྲངས་དམའ་མོས་རྨི་ལམ་མང་པོའི་གཤོག་པ་བཅད
སྲང་ནས་ཉོས་པའི་ངོར་ལྟ་ཆུང་ཆུང་ལས་ནི་རང་གི་བཞིན་མདངས་ཐོག་མར་མཐོང
རིན་ཆེན་འོད་དུ་འཚེར་འདྲའི་མཛེས་ཉམས་ཡོད་པ་རང་གིས་ཀྱང་ཤེས་མྱོང་མེད
ཨ་མས་སྐེ་ལ་བཏགས་པའི་གཡུ་ཆུང་དྲུག་དཀར་བཀྲ་ཤིས་ལ་ལྐོག་ནས་བྱིན
ཚེ་གང་གྲོགས་པོ་ཡིན་པའི་ཁ་དན་ཕན་ཚུན་གྱི་སེམས་ལ་བཞག
སྒྲོལ་མར་བརྙས་བཅོས་བྱེད་མཁན་ལ་གཅར་རྡུང་བཏང་བས་བཀྲ་ཤིས་སློབ་གྲྭའི་སྒོ་རུ་ཕུད
ཚེ་གང་མི་གཡོག་རྒྱུགས་པའི་ཁུར་བོ་ལྕི་མོ་དུས་དེ་ནས་ཕྲག་ལ་བབས
ནག་ཆུ་དང་ཧྲང་ཧེ་ལྷ་ས་དང་རྒྱ་གར་བཅས་ལ་ཡུལ་གྱར་གྱི་རྡོག་པ་བརྒྱབ
གྱོང་དང་ཕམ་ཁ་ལས་མེད་པའི་ཁོ་རང་ཕོ་ལོ་སུམ་ཅུའི་ཐོག་ཡུལ་ལ་འབྱོར
ཨ་མ་སྨན་ཁང་དུ་འདས་པའི་ཕྱི་ལོར་བཀྲ་ཤིས་ཁྲི་མུན་བཙོན་ལ་ལྷུང
སྨན་རིན་དང་དགེ་རྩ་ཡི་སྒོར་མོ་ཐམས་ཅད་བརྐུ་དང་རྒྱན་ལས་འོང
གནས་ནས་ཕྱིར་ལ་ལོག་པའི་སྒྲོལ་མ་ཐེ་ཚོམ་དང་བཅས་ཁོ་ལ་བལྟ་རུ་ཡོང
ཁྲིམས་ཁང་གི་ལྕགས་དྲའི་བར་ནས་ཁོ་གཉིས་ལྷན་དུ་འདུག་དགོས་པའི་ཁ་ཆད་བཞག
ཁྲིམས་ནས་ནད་ཀྱིས་བཟུང་བའི་བཀྲ་ཤིས་མལ་བསྟན་ལ་ལོ་གཅིག་འབྱར
སྨན་ཁང་ནས་མཁལ་མ་བརྐུས་ལ་ཤོར་ཅིང་བཙོན་ཁང་ལས་ལ་རྒྱ་བོར
ཁེར་འགྲོ་ཁེར་འདུག་ཡིན་པའི་བཀྲ་ཤིས་སྔོན་ཆད་དཀའ་སྡུག་ལ་སྐྲག་མྱོང་མེད
དེ་རིང་ལྕགས་སྒྲོག་བརྒྱབ་ཁའི་ཁོ་རང་སྨན་ཁང་གི་བར་ཁྱམས་འཁྱགས་པ་ནས་ངུ
བཀྲ་ཤིས་ཀྱི་ལུས་པོ་ཐལ་དུ་གྱུར་ཅིང་རྣམ་ཤེས་ལ་བདག་པོ་བོར
དམིགས་ཡུལ་དང་གཏད་སོ་བོར་བའི་སྒྲོལ་མས་ཆང་དང་འདོད་པ་ཁོ་ན་བསྟེན
སྒྲོལ་མར་ཨེ་ཙི་འགོས་པའི་གནས་ཚུལ་རྫོང་མཁར་གྱི་བཤད་རྒྱུན་དུ་གྱུར
སྒྲོལ་མ་མོ་་རྨ་ཆུར་ལྕེབས་པའི་དགོང་མོར་རྨ་ཆུ་ལ་ཁ་བ་འབབ
#thetibetpatient #bodkyineparoltsok #tibetansong2023 #tibetansong

[@Bzdm0]

Hey, if you have any recorded version of the folk song “ཤོ་ལེ་ཡག་ལོ་ཤོག”. Could you please upload it? I heard one that was mixed with rap sang by “གོང་པ་བདེ་ལེགས་ནོར་བུ།” but cannot find the original folk song on UA-cam without the rap bits.

[@tibetansong]

Apologies don't have. Will have it up if I ever come across.