ويشق نور الفجر كل حياتك ..بعد ظلمة الليل وشدة سواده

بنحس ساعات بالضعف قدام حاجات كتير بتمر بينا او حوالينا
لما نحس ان مش بإيدينا ولا قدرتنا إننا نساعد حد بنحبه
تحس ان ما باليد حيله
مش عارف تعمل ايه
ساعتها بتلجأ لربنا وتدعيه وتبقي عارف ان ربنا سامعك
بتبقي عايش بالأمل ان ربنا واقف جنبك
سامع دعاك اللي طالع من قلبك
شايف دموع عينك ودموع قلبك
حاسس بيك وباللي مشتت عقلك
بتبقي متأكد ان لا يغير القدر الا الدعاء
فبتدعي ربنا ليل ونهار
ان ربنا يطمن قلبك
لو بنعيش حياتنا بالإحساس ده علي طول اكيد هيفرق
انك تبقي فاهم كويس ان كل حياتك وكل اللي بتتمناه بيد ربك
انك تبقي فاهم انك لازم تكون في كل وقتك قريب من اللي خلقك
وحده هيداوى جرحك ويصلح قلبك ويرحم ضعفك ويستجيب دعوتك
الوقت اللي بنفهم فيه ده هو الوقت اللي لازم نكون فيه فاهمين كويس إننا لا نملك اي شئ
ان الحياة اللي احنا بنعيشها والظروف اللي بنمر بيها والابتلاءات اللي بتواجهنا محتاجة بس مننا إننا نكون فاهمين كويس إننا عايشين حياة مؤقته مهما طال العمر... فيه نهاية ليه
ومهما اشتد الصعب اكيد هيمر ومهما كانت الابتلاءات فهي من رب العباد
هيشوف مدى صبرنا ورضانا بقضاؤه
ادعي ومتيأسش
ادعي وخلي عندك يقين ان دعاك هيستجيب
ادعي وانت متأكد ان كله هيعدى اكيد
الصعب هيعدى بكل ما فيه وهتفتكره وتحكيه وتبقي بتحمد ربنا انه عدى
المشاكل هتتحل وتبقي فرحان ان المشاكل اتحلت
الابتلاءات هتمر زى ما كل حاجة بتمر في حياتنا حتي لو طولت شوية
ولو الصعب معداش والمشاكل متحلتش والابتلاءات ممرتش
يبقي دى حكمة ربنا يعلمها
بس خليك واثق ان كل حاجة بأمر الله
يعلم الغيب ويعلم ما يتمناه القلب ويعلم ما تقر به العين ويعلم ما تخفيه النفس
صدقني هيختار ليك الاحسن والاصلح ليك في دنياك وفي آخرتك
قرب بس وقول يارب
ادعي بصدق وقوة و صبر
هيهون وهيصبر وهيستجيب
لازم تكون عارف انك عبد لرب رحيم
يسمع انين قلبك ويقف بجانبك وسيجبر كسر قلبك وتكون علي يقين من ده
ويشق نور الفجر كل حياتك بعد ظلمة الليل وشدة سواده
فيأتيك الامل وانت في قمة اليأس
ويطرق بابك
ويحيط بك الفرح وانت في قمة حزنك والمك
وتدق السعادة أركان حياتك وانت في منتهي التعاسة
فمن لنا يا ربنا يعلم ما بداخلنا ويعلم ما نتمناه
الحمد لله ان لنا رب ندعوه فيسمعنا فيجيب دعاءنا
اللهم اجعلنا نعبدك حق عبادة ونكون من عبادك المقربين الذين تتباهي بهم في السموات العلي
اللهم احبنا حبا تمحو به ذنوبنا وتغفر به زلاتنا
حبا ينجينا من غضبك ويغمرنا عفوك ورضاك
حبا ينزل علي اهل السماء فيستغفرون لنا فتغفر لنا
حبا ينزل علي اهل الارض فيحبوننا ويدعون لنا
اللهم ارزقنا حبك وحب من يحبك وحب كل عمل يقربنا الي حبك
اللهم ارضنا بما قسمته لنا وارضنا بقضائك وبارك لنا فيه حتي لا نريد تعجيل ما اخرت ولا تأخير ما عجلت
وارحمنا رحمة تغنينا بها عن رحمة من سواك
وقول يارب
#احبك_ربي
#اللهم_صل_وسلم_على_نبينا_محمد
#قول_يارب