Jurnalistning akkreditatsiyasi deganda nima tushuniladi va u kasbiy faoliyat uchun qanchalik zarur?

Milliy qonunchilikda “akkreditatsiya” atamasi to‘g‘ri ochib berilmagan. Akkreditatsiya bilan bog‘liq masalalar O‘zbekiston Respublikasining “Jurnalistlik faoliyatini himoya qilish to‘g‘risida” gi Qonunining alohida moddalarida (11-13-moddalar) yoritilgan.
Agar bu atamani umumiy maʼnoda ko‘rib chiqadigan bo‘lsak, akkreditatsiya lotincha (“akredere”) “ishonch bildirish” degan maʼnoni anglatadi.
Akkreditatsiya instituti axborot manbalari bo‘lgan ommaviy axborot vositalari va tashkilotlar o‘rtasidagi munosabatlarni tartibga solib, jurnalistlarning kasbiy faoliyati uchun yana-da qulay sharoitlar yaratadi. Akkreditatsiya- xalqaro tashkilotlar, davlat organlari, tashkilotlar, muassasalar, jamoat birlashmalari organlari tomonidan jurnalistlarning vakolatlarini tan olish tartibi bo‘lib hisoblanadi.
“Jurnalistlik faoliyatini himoya qilish to‘g‘risida” gi O‘zbekiston Respublikasi Qonunining 11-moddasiga muvofiq, jurnalist davlat organi, jamoat birlashmasi va tashkilotda akkreditatsiyadan o‘tkazilishi mumkin.
O‘zbekiston Respublikasining jurnalisti xorijiy davlatda akkreditatsiyadan o‘tgan bo‘lishi mumkin.
Xorijiy jurnalist O‘zbekiston Respublikasi Tashqi ishlar vazirligi bilan kelishilgan holda O‘zbekiston Respublikasi hududida akkreditatsiya qilinishi mumkin.