السوشيال ميديا بقت تورينا عاهات

السوشيال ميديا بقت اسوأ حاجة فعلا دلوقتي
بقينا نتفرج علي اللي بيحصل جوة البيوت
بقي كل واحد متضايق من مراته يصورها وهي بتعمل حاجة وهي متعصبه او متضايقة علشان ثبت حاجة ربنا وحده اعلم بيها
وواحدة تطلع تبين اد ايه اتجرحت وازاى اتأذت نفسيا وجسديا وان جوزها اتعدى عليها وضربها ويطلع تريند
والممثلة الفلانية اتطلقت والممثل اتجوز علي مراته
والمغني ضرب واحد علي المسرح
ونشر الفضايح
السوشيال ميديا بقت تورينا عاهات بجد
اللي يطلع يغني مع مراته
واللي تخرج علينا بمنتهي عدم الاحترام سواء في اللبس او طريقة الكلام وتقول حاجات مفيش منها أي فايدة اصلا
ولا الرجالة اللي طالعة تعلم المايكب والرقص
غير الجرايم اللي بتتقال بكل تفاصيلها
مش عارفة والله الواحد يقول ايه
لما ابني او بنتي تتفرج علي الحاجات دى المفروض هيكون اثرها ايه
اصل الحاجات بقت عاملة زى الفيروس اللي دخل كل بيوتنا
بقى يقع قدامك كدا علي الموبايل
نفسي بجد يبقي فيه حد مسؤول نقوله وبعدين
امتي الكلام ده هيقف
امتي هنضف البلد من الأشكال اللي بتطلع علينا دى وتدمر في ولادنا
دا الاولاد بقوا بنات علي النت وتشوف اد ايه ممكن الراجل يقل من نفسه علشان بس يتشهر
ولا البنات اللي طالعة ترقص ولما حد ينتقضها تطلع تتكلم ولا كأنها عملت حاجة ده انا برقص رقص عادى واهلي موافقين
لا حول ولا قوة الا بالله
طيب معلش علي الوضع ده
ولادنا هيحصل فيهم ايه
ولادنا بيمسكوا الموبايل ساعات كتير علشان خاطر المذاكرة والشغل ولما يزهق شوية يفتح بقا يشوف العاهات اللي طالعة علينا اليومين دول
ربنا يرحمنا يارب
وربنا يهدى بجد لان الواحد بيصعب عليه يشوف بنات ما شاء الله جميلة بيقول خسارة بجد الجمال ده تشوهه النار
ما هو لما يكون مفيش اي رقابة حقيقية علي اللي بيحصل ده هيحصل اللي اصعب منه
ولادنا فعلا بيتأثروا ويحسوا انه عادى ويضحكوا كمان علي اللي بيشوفوه ويبدأوا يناقشوك بقا
احنا بنفضل نزرع في ولادنا الخوف من ربنا والمحافظة علي دينا ونعلمهم المبادئ والاساسيات وبيتربوا علي كدا
وربنا يحفظهم ويهديهم يارب
لكن الحاجات دى اكيد بردو ليها تأثير سلبي علي ولادنا
لما يشوفوا مواقف واساليب ويسمعوا ألفاظ وكلام عمرنا ما قلناه ده اكيد حاجة صعبه
كلمة ياسطا بقت كلمة عادية
زمان كنا بنقولها لناس معينة مش للتقليل منهم ولا حاجة بس كانت لناس معينه
كلمة اشطا ولا خلصانة
يمكن الكلمات دي منتشرة ما بين الأولاد والبنات كمان
لكن في كلمات الواحد يحرج انه يقولها من كتر ما هي وحشة جدا وللاسف بردو بقت منتشره
وكلام تاني كتير بتتفاجي بيه فعلا ان ممكن ابنك يقوله او يسمعه
بجد الموضوع بقا صعب اوى
انت تبني والسوشيال ميديا والأصحاب والشارع يهدوا اللي انت بنيته
ربنا يرحمنا ويغفر لنا ويهدي اولادنا واولادكم ويهدى الناس جميعا
وقول يارب
#احبك_ربي #اللهم_صل_وسلم_على_نبينا_محمد #قول_يارب