«Մեր երգերը և մենք» նախաձեռնության նպատակն է տարածել մեր մաքրամաքուր ժողովրդական երաժշտությունը։ Նախաձեռնության կողմից յուրաքանչյուր ամիս կազմակերպվում են ազգային երգերի բաց դասեր։
Այս անգամ մեր հյուրն էին «Ծովակ» ավանդական երգի-պարի խմբի երեխաները, խմբի երգուսույց՝ Անուշ Բալբաբյանը և երաժշտագետ, ֆոլկորագետ, բանահավաք Մարգարիտ Սարգսյանը։
Խոսեցինք այն մասին, թե ինչպես էին հայերը նշում Ամանորն ու Սուրբ Ծնդունդը, տեղում՝ միջոցառման ժամանակ միասին փորձեցինք կյանքի կոչել մի քանի անչափ գեղեցիկ ծիսական դրվագներ։ Ու իհարկե, անպայման, միասին երգեցինք Սուրբ Ծննդյան ավետիսներ։
Տեսանյութում սովորում ենք Խլվլիկի երգը։
Սալմաստում կար մի հետաքրքիր սովորույթ։ Կաղանդ պապիկի հետ ներս էր վազում Խլվլիկը՝ նիհար, սոված, գզգզված, ցնցոտիավոր կերպար, որը սեղանից անընդհատ ուտելիք էր խնդրում։
Ակլը մարեմ նշանակում է ստամոքսի կրակը մարել, քաղցը հագեցնել։
Ահա երգի բառերը՝
Ա'կլը մարեմ, մարեմ, մարեմ,
Ձեր տղային կոշիկ կարեմ,
Չամիչ տվեք` ատամիս շարեմ,
Ընկույզ տվեք` գլիսիս զարկեմ,
Փշատ տվեք` փորիս դնեմ,
Շաքար տվեք` թեյըս խմեմ,
Պնդուկ տվեք` սիրտս հովացնեմ,
Կորկոտ տվեք` փորս լցնեմ:
Ա'կլը մարեմ, մարեմ, մարեմ,
Խլվլիկի բաժինն առնեմ:
Տանտեր, կորկոտ մի խնայի,
Աստված ձեր հարսն ու փեսան պահի․․․
«Մեր երգերը և մենք» նախաձեռնության ֆեյսբուքյան էջը՝ hayerg
Տելեգրամ ալիքը՝ t.me/oursongsandwe
Ինստագրամում՝ we_and_our_songs
«Ծովակ» ավանդական երգի պարի խմբի ֆեյսբուքյան էջը՝ tsovakfolkgroup
Ինստագրամում՝ tsovak_folk_group