As 15 nadadoras e nadadores con dano cerebral adquirido só foron unha parte das cen persoas que participaron na nosa Travesía a Nado. Carmen González adestrou co Club Natación Ribeira e cóntanos como as augas abertas son un reto, para persoas con ou sen discapacidade, e o pracer de participar nunha actividade realmente inclusiva.
A Travesía a Nado Polo Dano Cerebral tivo lugar o 6 de xullo de 2024 en Vilaxoán (Vilagarcía de Arousa). Trátase dunha actividade de promoción do deporte inclusivo e de visibilización do dano cerebral adquirido organizada por Dano Cerebral Galicia en colaboración coa Fundación de Deportes do Concello de Vilagarcía de Arousa e a asociación Arousaman - Arousawoman. Contou tamén co apoio da Consellería de Política Social e Igualdade, do Ministerio de Dereitos Sociais e Axenda 2030, no marco do Proxecto Rumbo, e da Fundación José Otero - Carmela Martínez.