كاملة | لو خيّروني في فخايذ ربعي ,, قطعتها تبرى مع الغفران || الشاعر محمد الشمالي رحمه الله

البارحه كلّه وانا سهران
مْن العشا لين ارتفع الآذان
راح اوّل الليل وسرى تاليّه
ما ادركت لبحور الخليل اوزان
أكتب شطر والغي شطر بالكامل
وابني واهدّ مْن البيوت احيان
ويوم طْلعت شمس النهار الثاني
طلعت مع بابٍ من البيبان
وانا معزومٍ من رفيقٍ غالي
ابن قنيفذ طيّب الجدان
وعرّضتها جوف المحيط الهادي
سفينة أفكاري وأنا الربّان
وأوّل بدايتها سلام المسلم
والحب والتقدير والصفطان
عْداد ماذعذع نسيم الغربي
ومالاح برق وماهمل ودّان
تحيّةٍ يثني بها راعيها
على هل الحفل وعلى الضيفان
تجمّع الجمهور وانا حاضر
وانا وعشّاق القصيد اخوان
اثريت سوق اهل الغلا بالغالي
وقاطعتهم يوم رْخصت الاثمان
ماني بشفقانٍ على خلّوها
وهزْل الحكي ومداحم الخبلان
وعلى كذا ماربّي بحاديني
أترك طريقي واتبع العميان
لي اسمي ومقامي وتقديري
مع عربنا وابعد العربان
أقدم ليا سلّت سيوف المعنى
وأسلّ سلّال العدا شامان
وإلى فتلت البيت يصعب نقضه
وإلى نقضته يرجح الميزان
وفي ذمّتي يوم امتدح معرفتي
لافي غرور ولا اشعر بنقصان
هجرست والحقت الهجوس اقصاها
واسترسلت وانا فصيح لْسان
واعطيت نفسي كامل الحريّه
في المفردات وشرّد القيفان
معزوفةٍ فيها حماس وقوّه
وفيها من اسلوب اربعة فرسان
سبْك ابن عون وقوّة العطاوي
وإلقا خلف وإبداع ابن جدلان
ومن نظمي وطريقتي واسلوبي
وبسمي وناحتها على صوّان
تزهى بمدح الاحمديّه واهلها
غلا المساكن من غلا السكّان
أقولها ولْي الشرف لا قلتها
عندي دليل وشاهد وبرهان
أبوي قدّامي وجدّي يحبّهم
والصبي مايخلف من الشيبان
لو خيّروني في فخايذ ربعي
قطعتها تبرى مع الغفران
الهادي بن زايد جمال الغبقه
يسعد مساكم ياعرب جفران
جفران بن بوبح عريب المنسب
أبوسعد لا عدّوا الشيخان
مقدم عرب ماهوب من حيّ الله
ربعه ترزّه والحصان حْصان
على العدود الراهيه ورّدهم
قلبه جسور ومحزمه مليان
يقلط على الحكّام مقلط حاكم
لا عوّدت روس العرب كرعان
إلين خلّا الاحمديّه ترسي
غصباً عن الراضين والزعلان
في فترةٍ فيها الهجر ممنوعه
حصل على إستثنا من أهل الشان
وبنا البيوت اللي ذراها يذري
لا باروا الصحبان بالصحبان
ياما وزا في سدّها من خايف
وقيل لخصيمه سم بالرحمان
إلى أمتثل ولّا القوي حيل الله
الخيل قرّح والثرى الميدان
جبلّةً تخلق مع الغفراني
تبقى لطلّاب العلا نيشان
ستر العذارى متعبين الضمّر
عون الرفيق وعلّة العدوان
ترتع بهم حسْك الوبر وتربّع
في خايعٍ قفرٍ من الشوّان
ياما رعت طلع الزهر فالرمله
وطلايع الزملوق فالصمّان
تشمل بهم لو الشمال مْخيفه
وتجنب بهم لا جرّت الحيضان
ما راحوا لحنشل ولا الطمّاعه
إلّا بلعنْةً تلعن الشيطان
ماتوخذ البل من مراح المرّي
إلّا واهلها كلّهم موتان
لا سيقت البل فالمساوق روسنا
بالصوت نجهر والفم المليان
ويفوز باللذّات كل مْغامر
والظفْر منجّى والكريم مْعان
وإلى غزينا نبعد المغازي
نتْلى الشجاع بهمّة الشجعان
نعد للشدّه قوي عزايم
يقطع بنا الفرجه مثل جفران
فرقه إلى طال الصلف في غيره
فرق النداوي فابرق الجنحان
شيخ وعقيد وغشمري وسنافي
وإنْ ضاقت العدّه وسيع بْطان
محمد الشمالي المري ( رحمه الله )
.
♦ ♦ ♦ ♦ ♦ ♦ ♦ ♦ ♦
للتواصل:
➽ linktr.ee/alsh...
-
#محمد_الشمالي #قصيدة #جزل #جزل_القصيد #شعر #طاروق #محاوره #محاورات_شعريه #محاورات #مستور_العصيمي #حبيب_العازمي #صياف_الحربي #محاورات #محاوره #الشمالي #بن_شايق #طاروق #السعودية #قطر #الخليج #الشلال #حصري #حصريات