Tenore di Neoneli - Su primu chi si presentat - sottotitoli

Su primu chi si presentat
si nominat offiziale,
fattat bene o fattat male
bastat non chirchet salariu:
procuradore o otariu,
o camareri o lacaju,
siat murru o siat baju
e' bonu pro guvernare.
Bastat chi prestet sa manu
pro fagher crescher sa rènta,
bastat chi fattat cuntenta
sa buscia de su Segnore;
chi agiudet a su fattore
a crobare prontamente,
e s'algunu es renitente
chi l'iscat esecutare.
A boltas, de podatariu,
guverna' su cappellanu
sas biddas cun una manu
cun s'atera sa dispensa.
Feudatariu, pensa
chi sos vassallos non tenes
solu pro crescher sos benes,
solu pro los iscorzare.
Su patrimoniu, sa vida,
pro difender su villanu
cun sas armas a sa manu
cheret ch'istes notte e die;
già ch'hat a esser gasie,
proite tantu tributu?
Si non si nd'hat haer fruttu
es locura su pagare.
Si su barone non faghet
s'obbligazione sua,
vassallu, de parte tua
a nudda ses obbligadu;
sos deretos chi has crobadu
in tantos annos passados,
sunu dinaris furados
e ti los devet torrare.
Sas rentas servini solu
pro mantenner cicisbeas,
pro carrozzas e livreas,
pro inutiles servissios,
pro alimentare vizios,
pro giogare a sa bassetta
e pro poder sa braghetta
fora de domo isfogare.
Pro poder tenner piattos,
bindighi e vinti in sa mesa,
pro chi potzat sa marchesa
sempre andare in portantina;
s'iscarpa istrinta, mischina,
la faghet andare a topu,
sas pedras punghene tropu
e non podet camminare.