ŞAÎR Û DEYÎRBAZ XIDIRÊ BAŞÎ ~ ŞÎÎRÎ

ŞAÎR Û DEYÎRBAZ XIDIRÊ BAŞÎ ~ ŞÎÎRÎ
(Bîyo Kewe, Xasbaxçe de, Yara Mi, Ez Yarê Tu Yo, Rindeka Gimgimî)
Arşîv: Alî Aydin Çîçek
Kamera: Eser Güzelçay
Îstanbul/Taxa Gazî - 2018
*
XASBAXÇE DE
Pîya nîştê ro hurdîma waştî
Xasbaxçe de xasbaxçe de
Bîyê wayîrê eşqê raştî
Xasbaxçe de xasbaxçe de
Nîştîme ro verê dare de
Çimê mi sênê yare de
Vana çîçega arê de
Xasbaxçe de xasbaxçe de
Ma de hunê gilê dara
Çîçega zewq guret ma ra
Ma ser ra gul û sosin vara
Xasbaxçe de xasbaxçe de
Xizirê Kalî roje da ma
Bejna to rindek a tam a
Ti veyvik a, Xidir zama
Xasbaxçe de xasbaxçe de
YARA MI
Xora seba to ra vilê mi çewt o
Kemere kî ti mede mi ra yara mi
Hayrê mi nîya ez bîlîya xo kewto
Kemerê kî ti mede mi ra yara mi
Zemanê Koyê Bîngolî ma de huyêne
Ez amêne ware de mi ti dîyêne
Berbêne ez lewê to ra şîyêne
Kemere kî ti mede mi ra yara mi
Ma top bîyêne şîyêne Şehîdê Dîyarî
Derbaz bîya a roje ez kotî ra bîyarî
Bextê ma ra bîyê kerr û lal zîyarî
Kemere kî ti mede mi ra yara mi
Zerê mi veşeno ez se heş bene
Qelbê mi şîkîyo ez se weş bene
Nê adirê eşqê to de qaş bene
Kemere kî ti mede mi ra yara mi
Warî bîyê isîz dewî bîyê tal
Zemanê xo tadêne ditene mal
Verem kerdo Xidirê Başî bîyo kal
Kemerê kî ti mede mi ra yara mi
EZ YARÊ TU YO
Ez yarê tu yo çê to der o
Gula m’ cenetê mi lê to der o
Felek xedar o pê to der o
Waxto ke to bero adirê cenemî de biveşno
Ez to ra nêvisîno, lê to der o
Rojê ruyê ma cêno xedar felek o
Ma beno kenê ortê meleko
Sênê gula m’ sîs o, por xelek o
Ceza gula mi çik a pêro mi de parê kerê
Mi gula mi ra mevisnê, ez gunek o
Gula’m ti cenet de bena hûrî
Şona koşê hetê corî
Adirê cenemî ra mi vejê bi destê zorî
Waxto ke ê zalima qebul nêkerd ma têviranê kerê
Pîya berzê kupê qetranê xorî
Sewda Xidirî zê sewda Ferhatî
Ma pîya benê serê Pirdê Şeratî
Wazenê ke ma berzê barê meratî
Xizirê serê kelek û gemîya ra rîca bikîme Gula’m
Belkî min û to rê vejo qerarê beratî.
BÎYO KEWE
Ortê hevala de ez bîyo kewe
To qey destê xo eşt ra mi ez qilayno ra
Mi çîçege dabî hem roj hem şewe
To qey destê xo eşt ra mi ez qilayno ra
Ortê hevala ra visna, to ez qahrno
Zemanê kerdo ortê çiçikanê xo çarno
To fîringê mi kerd huşk çîçegê mi vîyarno
To qey destê xo eşt ra mi ez qilayno ra
Seba eşqê ma ra dara rişnay pelî
Qefelîyo to dime ez cêro xêlî
Mi de to çîçege, to de mi telî
To qey destê xo eşt ra mi ez qilayno ra
Mi cameverde îta isiz o ware
Payîz o mi ser ra varena vare
Xidir binê de maneno nêvîneno çare
To qey destê xo eşt ra mi ez qilayno ra.