جزء ٢ من ظبط الكربراتير . الموتور مخنوق . السحب ضعيف . مفيش عزم . مفيش باور . دخان اسود

bit.ly/scooterc...
حمل تطبيق اسأله وأجوبه عن الاعطال التى تواجهك
**********************
#سكوتر
#scooter_clinic
الجزء الثانى
بسم الله الرحمن الرحيم والصلاة والسلام على سيدنا محمد
وصلنا فى الفيديو اللى فات لغاية ما فضينا البنزين من الكربراتير
دلوقتى صاحبنا فك الحوض ولقى بك السلانيه ٣٠ وبك السرعه ٩٢
مع العلم ان المفروض الستوك بتاع ال ٥٠ سى سى يكون بك السلانسيه ٣٢ وبك السرعه ٧٥
وبيقول ان السكوتر بتاعه استوك يعنى مغيرش فيه حاجه
المهم صاحبنا راح اشترى طقم بكات وركب بك سلانسيه ٣٠ وبك سرعه ٧٥
ورجع كل حاجه مكانها وقفل الكربراتير وجرب تانى
بيقولك المره دى الموتور مبطلش لكن مش داير كما ينبغى وبرضه شامم ريحة عادم
يعنى استعمل بكات مقاسات الستوك والسكوتر كله ستوك ومع ذلك مش شغال كويس
اومال المشكله فين ؟
المشكله عنده لأنه ساكن فى بلد مرتفعه عن مستوى البحر بحوالى ٤٥٠٠ قدم
وده مخلى نسبة الهواء فى الجو قليله
ولذلك هو محتاج يستخدم بك سرعه اصغر عشان يقلل من نسبة البنزين اللى داخله للموتور وتكون مناسبه لنسبة الهواء الموجوده اللى بتدخل للموتور فهيستعمل بك رقم ٣٠ للسلانسيه وبك رقم ٧٢ للسرعه بدل ٧٥
وجرب تالت مره وبرضه الموتور اشتغل كويس لكن لما بيزود مش بيلاقى عزم وبيبطل
قرر يفصل فلتر الهوا خالص ولقى فرق كبير جدا
نشوف الفيديو تانى
نرجع للشارت
الموتور مشتغلش كويس مع بك ٧٢ لغاية ما فصل فلتر الهوا وسمح بمرور هواء اكتر
وده معناه ان بك ٧٢ برضه واسع وطبعا ممكن يجرب واحد اصغر لكن برضه مش كويس انه يستخدم اصغر من كده لان الستوك المفروض انه اكبر من كده فلو استخدم بك اصغر هيقلل اوى من نسبة البنزين اللى داخله للموتور وهيقلل الباور
فقرر صاحبنا انه يجيب فلتر هوا تانى
وبالفعل جاب فلتر هوا فوم وشال فلتر الهوا الستوك بالعلبه بتاعته
وركب الفلتر الجديد ووصل عليه الخرطوم اللى جاى من هد الموتور
ودلوقتى البكات اللى راكبه عندنا بك سلانسيه ٣٠ وبك سرعه ٧٢
وطلع يجرب عالطريق وفتح بنزين عالاخر ولكن السكوتر بطيئ وفى الغالب بيبطل
قالك هركب بك سرعه اكبر لانه اصبح نسبة الهوا اكتر من نسبة البنزين بعد تركيب الفلتر الجديد وبالفعل جرب بك ٧٥ ولقاه نفس الموضوع محتاج بك اكبر
وركب البك ٨٠ وطلع جرب عالطريق ولقى السكوتر افضل كتير
لكن برضه لا يزال بطيئ جدا وسرعته حوالى ١٥ ميل فى الساعه
جرب بك رقم ٨٥ وكانت النتيجه كويسه جدا مفيش مشكله كبيره ولكنه محتاج يكون الطريق طويل عشان يوصل لاعلى سرعه ممكنه لكنه وصل لحولى ٣٩ ميل فى الساعه مع البك ٨٥
وجرب بك رقم ٩٠ وجرب كمان رقم ٩٢ و ٩٥ وكانت النتيجه زى ماحنا شايفين فى الصوره
مع بك ٨٥ كانت اعلى سرعه وصل لها ٣٩ ميل فى الساعه
مع بك ٩٠ كانت اعلى سرعه وصل لها ٣٩٫٥ ميل فى الساعه
مع بك ٩٢ كانت اعلى سرعه وصل لها ٣٩ ميل فى الساعه
مع بك ٩٥ كانت اعلى سرعه وصل لها ٣٨ ميل فى الساعه
وده معناه ان البك ٩٠ اسرع وانسب بك لنسبة الهواء الى البنزين
واللى حصل قدامنا ده ياكد للناس اهمية فلتر الهوا واهمية انه يكون خامه نضيفه
شوفو الراجل نزل كام درجه من البكات عشان يوصل لنسبة بنزين قليله تناسب نسبة الهوا اللى داخله للموتور وبرضه كانت عاوزه بك اصغر من ٧٢
لكن لما جاب فلتر هوا نضيف ساب البك رقم ٧٢ و ٧٥ و ٨٠ و ٨٥ واستعمل ال ٩٠ الأنسب
عشان يقرب نسبة البنزين الى الاكسجين اللى داخله الموتور
ومعنى كده برضه ان حضرتك لما تيجى تغير فلتر الهوا
ممكن جدا اداء الموتور يختلف
لانه ممكن مش مناسب للبك الموجود
وانت وحظك لان مش كل الفلاتر بنفس الجوده
ونفس نسبة الهوا اللى بتعدى منه
ودى معاناه طبعا لينا كلنا
طيب
الراجل ده فك الكربراتير حوالى ١٠ مرات عشان يوصل للظبطه دى
تفتكرو مين هيعمل كده عشان يظبطلك الكربراتير بتاعك ؟
دلوقتى صاحبنا عاوز يجرب بك سلانسيه مختلف ولكن هيبدء بالبك رقم ٣٠
السكوتر ماشى كويس والسلانسيه كويس لكن التسارع بطيئ
ولكن مننساش برضه انه ٥٠ سى سى يعنى طبيعى التسارع يكون ضعيف
وحاسس بتررد من السكوتر عند ١٥ ميل فى الساعه
وجرب بك ٣٢ لقاه اسرع شويه لكنه برضه متردد عن ١٥ ميل فى الساعه
وحاسس ان الصوت من بعد السلانسيه ممل يعنى مش عاجبه الصوت
وقرر انه يمشى بالبك رقم ٣٢ كام يوم يجربه ورجع بعد التجربه بالنتيجه دى
صوت الموتور من بعد السلانسيه ممل
السلانسيه مش ثابت
بيبطل لما بيقف فى اشاره مثلا او بيقف سلانسيه لفتره
مش بيدور بسهوله
بيشم ريحة عادم فى اول الدواره
ورجع تانى للبك رقم ٣٠
صوت الموتور كويس من بعد السلانسيه
ومفيش مشاكل فى السواقه
ودلوقتى صاحبنا عمل مقارنه بين البك رقم ٣٠ و ٣٢
تعالو نشوف الفيديو
البك رقم ٣٠ شغال كويس وبيزود بنزين لغاية الربع لفه الاولى زى الفل
البك رقم ٣٢ مخلى صوت الموتور مش كويس وفيه تأخير فى الاستجابه لبكرة البنزين
ومش واقف سلانسيه كويس
وبكده يبقى الانسب للسكوتر هو بك ٣٠ للسلانسيه و ٩٠ للسرعه
ولكن السؤال المهم
ليه الفوم فلتر بيحتاج بك سرعه مقاس اكبر
بالرغم انه مش محتاج بك سلانسيه مقاس اكبر ؟
نبص للصور اللى جايه على سبيل المثال لو افترضنا ان الموتور قادر انه يسحب ٥ قدم مكعب من الهوا فى الدقيقه
عند لف بكرة البنزين للاخر وهنقول ان فلتر الهوا سيئ جدا ويقدر يدى ٣ قدم مكعب بس فى الدقيقه ففى الحاله دى هنحتاج نركب بك سرعه اصغر عشان يدينا بنزين اقل يناسب الهوا القليل اللى داخل للموتور
لكن لما غير فلتر الهوا وسمح بدخول ٥ قدم مكعب استعمل بك سرعه اعلى يناسب نسبة الهوا اللى زادت وفى الحالتين بك السلانسيه مش هيتأثر لان نسبة الهوا اللى بيحتاجها بيقدر يكفيها الفلتر الستوك لكن مع فتح بوابة الكربراتير على الاخر بيحتاج نسبة هوا اكبر وبيكون التأثير على بك السرعه
فاهم حاجه ؟؟؟
قول اه
#كربراتير_سكوتر
#كربراتير
#بكات_الكربراتير