امونة بت الشيخ حمد كلمات نجم الدين الكرفابي غناء عيسى بروي تصميم الكجوكابى

قناة اغاني وابداعات سودانية
تصميم الكجوكابي
تصميم الكجوكابى
دي دايره ليها سماعات . . . ومع السماعات . . . عيشوا الأجواء المحيطة بأمونه سيناريو قريب بعض الشي من قصيدة السر عثمان الطيب بت البلد . . . . . . بالنسبة للأغنية تم حذف وتغيير بعض الأبيات لتتماشى مع الإيقاع . . . لكن قصة امونه كامله كما ارادها الكرفابي ياها دي
قصة امونة بت الشيخ حمد
كلمات نجم الدين الكرفابي
ابوها كان مزواج خلاص ناسب جميع أهل البلد
ميلادها كان عرسا كبير هيصة وضبايح مالها حد
يوم السماية اتيتمت وحكم القدر في الام نفد
جرت السنين واتفاوتت بيناتنا ما ليهن عدد
امونة كبرت واستوت فار الصدير شال النهد
وبقت أمل كل الشباب وجمالها في بت ما اتوجد
في مرة رفا قليبها يوم حبت قريب الشيخ حمد
وأظن كمان حباها هو ولى حبو سوى ضلوعه سد
خايفين عيون الناس تشوفهم والخبر يملا البلد
والحب هناك عيباً كبير لا بت تبوحبو ولا ولد
سنتين تلاتة مضت خلاص والبت حياتها بقت ند
وكان الولد زي حالتا ديك وقليبو داك مكتول كمد
في يوم ابوها ضحك كتير برم شواربو بلا الاسد
ناداها امنة تعالي جاي وفوق برشو اتربع قعد
قالتلو هوى جاياك خلاص وقليبها فر وما رقد
هابت عيونو قبل يقول شافت وجيهو عليهو جد
حاج الخضر عارفاه داك قالتلو أي ابو سند
جانى الصباح طالب يديك داير نسب شيخ البلد
وانا قتلو مرحب بيك تعال يومين تلاتة يكون عقد
راجلاً عظيم عنده القروش عنده الحرير راقد لبد
وكمان كريم واخو رجال ماعونو فد يوم ما برد
جرت الدموع من عينا شوو وو سكتت أبت تديه رد
خلاها قام زعلان مرق لا سبى لاكايس غرض
عند المغيرب جاها صاد ولى محاسن الحاج سرد
داير يأثر فى قليبا ان كان تحن تديهو رد
وكتين تعب واحتار خلاص ولع فؤاده جمر وقد
فسر سكوت البت رضا جاب زولو لما الناس عقد
والمال مخمخم والحرير تحت الرجول مدوه مد
دق الدليب صحا العيون ما خلا فد مخلوق غمد
يوم الصفاح والناس تجوط بالفرحة مقلوبة البلد
أمونة تبكي بكي السواد بدل الفرح جاها النكد
وبشيشى قامت للمروق منسرقى ما حسابها حد
كان الحبيب راقد هناك والصدمة قدت قلبو قد
حاضن ربايتو وحيد حزين كم جرا للمسدار جبد
وقفت قصاده بكت كتير لامن دميع العين جمد
قام جاها بى شوقو الكبير وقليبو من حزنو انهرد
قالتلو ما بيدى شىء ديل ناس ابوى وأبو سند
أتلمو سووهو الكلام وانا لا رضيت لا جبت رد
داك عنده مالاً مو قليل وأبوى شاف المال سجد
أدانى للراجل العجوز المن عروقو الدم شرد
قايلنى بسعد بالقروش والله المراح الفات ورد
لاكن محال اسعد بلاك كان السماء الينهد هد
بديك قلبي وروحي ليك وبعيش هناك صورة وجسد
اتراجعت دارت تصد لكن قليبها رجع رفض
مسكت دريباً مو غريب كم بيه صف بنوت ورد
قاصدة البحر داير تموت لا عيشه لا هم لا نكد
قالت اخير أموت ارتاح خلاص أرسى وشقاي القالو حد
ما دام حياتها بقت دموع وقليبها من زولا انفرد
شافت مسار النيل حزين حتى النخيل حزنان خمد
وفى سرعة فكفكت الحرير لا زينة لا ربيط عقد
وفي لحظة موج النيل علا وفي جوفو غابت للأبد
قناة اغاني وابداعات سودانية
تصميم الكجوكابي
تصميم الكجوكابى
الطنبور آلة موسيقية وترية قديمة، أول من إستخدمها هم النوبيون وتسمى أيضا عند النوبيين كيسير ومعنى كلمة طنبور باللغة النوبيه تو وتعنى البطن وبور تعنى الاجوف وتونبور تعنى البطن المجوفه ثم عربت الكلمة لتصبح طنبور وهى مكونة من خمسة أوتار اذن النطق الصحيح لها هو طنبور وليس طمبور والدليل انها تجمع جمع تكسير طنابير وليس طمابير . . الرتاين ميتي ما رنت طنابير . ..
لا يعزف بها سوى السلم الخماسى الذي يشتهر به النوبيين وتعزف بطريقة عكس كل الآلات الوترية فلابد من الضغط على كل الأوتار باليد اليسرى والضرب على الأوتار كلها باليد اليمنى، والوتر المراد سماع نغمته هو ما تتركه وليس العكس وهى أقدم آله وترية عرفها الإنسان على الإطلاق.
آلة موسيقية موجودة في السودان من قبل زمن حضارة مروي ..
عندها في مناطق مختلفة من السودان أشكال واسماء مختلفة
ومن مشاهير من عزفوا عليها
النعام ادم ادريس إبراهيم محمد كرم الله صديق احمد محمد جبارة عثمان اليمني محمد النصري عبدالقيوم الشريف جعفر السقيد معاوية المقل هيثم قنتي وعيسى بروى
وأشهر شعراء الطنبور هم من الشايقية منهم حسن الدابي وإبراهيم أبنعوف ومحمد سعيد دفع الله وعبد الله محمد خير والسر عثمان الطيب والكرفابي والشاعر السوداني الكبير الحاردلو وحاتم الدابي(10).
ومن أهم الأسباب التى أدت إلى ارتباط الطنبور بقبيلة الشايقية هو الاعتقاد السائد عند الكثيرين بأن آلة الطمبور تصدر لحناً حزيناً لكونها ارتبطت بالوحدة والعزلة لأنها كانت تسلي وتؤنس راعى الإبل في الصحراء كما يقال ان قبيلة الشايقية (ريادين) اى محبين ومعروف عنهم رهف الاحساس ورقة الشعور، وهذه الرقة انتقلت من وجدانه إلى أنامله لتخلق هذه النغمة الحنونه الرقيقة ذات الجاذبية والتأثير الكبيرين(9) . فضلا عن قيامهم بتطوير تلك الآلة وتغنى على أنغامها العديد من الفنانين السودانيين المتميزين { أمثال النعام آدم وصديق أحمد وعثمان اليمني } والأخير أدخل فن الرميات مع الطنبور وفن الرميات{ يعني الموال الشعبي}.مما ميز قبائل الشايقية بشمال السودان بهذه اللونية من الغناء
أغاني وإبداعات سودانية . . قناة تهتم بالإبداعات السودانية في كافة المجلات . . الفن والشعر والرياضة والأدب وشتى ضروب الإبداع . . . وتصميم الفيديوهات في هذه المجالات.. وكلمات الأغاني السودانية بمفرداتها الصحيحة
للتواصل معنا تجدونا علي جميع قنوات التواصل ::-
tiktok :-
tiktok.com/@kajoukaboalshayma
facebook :-
www.facebook.c...
Telegram:-
t.me/+VcxMKSrT...
Instagram:-
/ kajoukmohd
حسابي القديم على الفيس بوك
www.facebook.c...
شاكرين لكم تواجدكم ودعمكم لنا مع عاطر تحياتي وودي الأكيد
الكجوكابي أبوشيماء ..
‫@قناةالكجوكابي‬