إهداء إلى الشيخ / فهد بن فريج الشكره الدوسري الشاعر/

إهداء إلى الشيخ / فهد بن فريج الشكره الدوسري
ياللي تبون الطيب هيهات هيهات
متعلياً بين النجوم المطله
يصعب على اللي يحسبون المسافات
ويسهل على اللي قو عزمه يتله
يبغى رجالاً ينطحون المهمات
خطواء ابلجاً درب الوفى عادتله
شيخً تعلاء مع انجوم المجرات
وعند المواجه كل عقدا يحله
هذا فهد يعني له العلم بالذات
وله الثنا مدبول دقه وجله
ابو فريج اللي بوسط السجلات
اسمه إلاحي مثل عقد الآهله
للمجد في وجهه ارسوم وعلامات
ون جيت له في مجلسه ماتمله
ركن الدواسر في الامـور الصعيبات
وسيفً الياء جات المواقف تسله
واللي دفعني لين غنيت الآبيات
حدث جديد مثبتً بالادله
ابو فريج بحفل سيف الغياثات
كلً الرجال أبشوفته مسفهله
شيخً مكانه في صدور المنصات
و اللي مثل شرواه كلً يجله
حيوبه اهل الشان بازكى العبارات
وبعد مخذ فذه وفنجال دله
جاهم وجيهاً شرف الحفل باسكات
وطلق عليه وجلسه في محله
ولحظه وعجت به جميع السنابات
وهل السناب اتجيك بالعلم كله
مامقصده يحضى ابعض الدعايات
اجبلةً ياطيبها من اجبله
هذا الرجوله خل قوم الملذات
وهذا الثقه بالنفس ماهي مذله
ابو فريج اخذ على الطيب بصمات
ولوحة شرف مكتوبةً في اسجله
ابو فريج إيبرهن العلم باثبات
على مثل ماقيل منسف وسله
طيب وكرم ينصونه الناس زافات
وبيته كما برزان كلً يدله
من روس قومً تفعل المستحيلات
لاطار عن قحص المهار الآجله
دواسراً رزوا على المجد رايات
المستحيل ان جاتله تستحله
عاداتهم تفرق على كل عادات
اوقفاتهم تشف الكبود المغله
صديقهم يبقى بعز ومسـرات
وعدوهم يخط الطريق ويزلـه
شهادة الحيين عن فعل الآموات
تغنيك عن شرحاً بصدر المجله
وختم الكلام ابذكر رب السماوات
عداد وبل المزنه المستهله
(الشاعر جهيم بن ثايب الذيابي)
#عايد_العواد
#قبيلة_الدواسر
#الشكره