To my sons

Ernikka
Una inngerut erninnut aqaataavoq
Oqaasertai:
Erninnguakka-aa asanaqisusi anaanap asavasi
Ajja a jaja ajjaja a jaja
Ajja a jaja ajjaja a jaja
Anaanap asavasi
Ernikkalu pingasuulluta inooqatigiilerpugut angajulleq marlunnik ukioqartoq nukarlerlu ataatsimik ukioqartoq. Taamaasilluta pingasuulluta ilaqutariittut ulluinnarni inuunitsinni immitsinnut kaammatorlutalu tapersersoqatigiilluta inuuneq ingerlapparput.
Qilaatersorneq ilinniaqqaalerakku uannut assut unamminarpoq, ilaannilu nangaaneq imminullu naammaginnginneq misilittaaninni misigisarlugu. Taamaasillunga arfininngornermi uagutsinni qilaatiga tigoqaara inngerullu ilinniartitsisunnit Pauline Lumholdtimit ilikkagara sungiusarlugu akunnattooqattaaleruttorlunga imminut nangartarlualeruttortunga ernima nukarliup, taamani sisamanik ukioqarluni, sunaaffa sofamut innaamiannguarluni isiginnarujoorlunga pilerpaanga: ”Kaa anaan´ kakkattutit!” Taamallu oqaannartoq nangaanera ajukkunnermillu misiginera tamaat tammartippaa. Iliuutsip annikikkaluassusia uannut nukimik assut tunisivoq.
Taamaaleriallaataa tassanngaannaq qamanngarsuaq ernikka asaammerlugit pikkunavimmik inngilerpunga aqarlugit, asulumi nangaanera tammarluaasariarmat tivalluataangaarama qilaatigalu katulluangaarakku, siullerpaamik tivaneq, katuarneq inngernerlu aatsaat taamat ataqatigiittsigisumik atorlugit. Ernima aqarneqarnertik pikkugingaaramikku natermi qaqariilillutik tanngangaaramik qanoq pissusilersussanerlutik nalulerlugu! Naa ASAVAKKAMI!
Aaqqissuussisoq: Ariu Imaging
Nipigissasoq Anda Otto Schmidt
Assiliisoq: Jens Christian Lennert
Nipimik immiussisoq: Jacob Froberg
Immiussivik: Taseralik www.taseralik.gl