ወረብ ዘደብረ ምጥማቅ Debre Mitmaq Werebs

አመ ፳ወ፩ ለግንቦት ማርያም በዓለ አስተርእዮታ ለእግዝእትነ ማርያም በደብረ ምጥማቅ
ወረብ:
በአልባሰ ወርቅ በአልባሰ ወርቅ ዑጽፍት ወኁብርት፣
እኅትየ መርዓት ርግብየ ሠናይት እኅትየ።
ከበበ ከበበ ገጻ ከመ ወርኅ ወአዕይንቲሃ ከመ ኮከበ ጽባሕ፣
ወቆማ ከመ በቀልት ለማርያም ድንግል።
በከመ ይቤ ሰሎሞን ሰሎሞን በእንተ ማርያም፣
ንዑ ንትፈጋዕ ወኢይኅልፈነ ጽጌ ጽጌ ደመና አብርሃ በስነ ማርያም።
ትበርህ እምኮከበ ጽባሕ ወታስተርኢ እምአርእስተ አድባር፣
አዳም ወሠናይት ፅዕዱት ወብህርት ከመ ፀሐይ ብርህት።
ኢይትዓፀው አናቅጽኪ ክቡራት ዕንቊ መሠረትኪ፣
ሠናይት ሰላማዊት እንተ ናፈቅራ እንተ ናፈቅራ በጽድቅ።
ወረብ ዘአንገርጋሪ
ዓይ ይእቲ ዛቲ እንተ ታስተርኢ እምርኁቅ ከመ ማኅቶት ብርህት ከመ ፀሐይ፣
ሙሴኒ ርእያ ሀገር ቅድስት ደብረ ምጥማቅ ዕዝራኒ ተናገራ ዘመራ ዳዊት።
ወረብ ዘእስመ ለዓለም
ዓይ ይእቲ ዛቲ እንተ ትሔውፅ ከመ ጎሕ፣
አዳም ከመ ወርኅ ደብረ ምጥማቅ ከመ ሥርዓት እምሊባኖስ ትወጽእ መርዓት።
ምዕዋድ
እንተ ታስተርኢ እምአርእስተ አድባር ርኁቅ ጻድቃን ኪያሃ አብደሩ እምወርቅ፣
ሀገረ ክርስቶስ ደብረ ምጥማቅ ሐዳስ ንድቅ ወበውስቴታ የኃድር ጽድቅ።