អ្វីទៅជាបារមី? បរិស័ទ្ធយល់ឱ្យត្រូវនូវពាក្យ«បារមី»យល់ត្រូវទើបប្រព្រឹត្តត្រូវ យល់ខុសគឺប្រព្រឹត្តខុសហើយ

អ្វីទៅជាបារមី? សូមខ្មែរជាពុទ្ធបរិស័ទយល់ឱ្យត្រូវនូវពាក្យ «បារមី»។ យល់ត្រូវ ទើបប្រព្រឹត្តត្រូវ យល់ខុស គឺប្រព្រឹត្តខុសហើយ។
ពាក្យថា បារមី គឺជាពាក្យបាលី មកពីពាក្យ «បារ» មានន័យថា ត្រើយម្ខាង ឬត្រើយខាង​មុខ និងពាក្យថា «មី» មានន័យថា គុណជាតិដ៏ប្រសើរដែលគួរបំពេញ ឬផ្លូវដ៏ខ្ពង់ខ្ពស់​ដែល​គួរដើរ ដូចក្នុងគម្ពីរដីការពោលទុកថា ​«បារំ និព្វានំ មយតិ គច្ឆតិ សត្តេ ច មាយេតិ គមេតិ វា»។
បារមី មានន័យថា គុណជាតិដែលនាំឱ្យដល់ត្រើយនៃព្រះនិព្វាន ឬញុំាងសត្វឱ្យបានដល់​ត្រើយ​នៃ​ព្រះនិព្វាន ឈ្មោះថា បារមី។ ដូច្នេះ បារមី មានន័យថា គុណជាតិដ៏ប្រសើរ ដែលបុគ្គលត្រូវបំពេញ ឬជាគ្រឿងសម្រាប់ញុំាងសត្វឲ្យដល់ត្រើយបរមសុខ គឺព្រះនិព្វាន ។ ដូចជាទសបារមី (បារមី១០) របស់ព្រះសម្មាសម្ពុទ្ធ។
បារមី មិនមែនបារមីព្រះនេះព្រះនោះ ឬបារមីអ្នកតា ថ្មភ្នំ គល់ឈើ ព្រៃភ្នំជាដើម ឬការបក់ផ្លិត ដែលជា​បារមីភ្ញាក់ផ្អើលក្រៅព្រះពុទ្ធសាសនានោះទេ។
ទសបារមី (បារមីទាំង១០) ក្នុងវិស័យព្រះពុទ្ធសាសនា
នៅក្នុងទសជាតក តែងបានបង្អាញអំពីទសបារមី។ ទសបារមី គឺជាគុណជាតិល្អ វិសេស ១០ប្រការ ដែលអង្គពោធិ៍សត្វបានបំពេញ ដើម្បីបានត្រាស់ដឹងជាព្រះពុទ្ធ។ ទសបារមីមានដូចខាងក្រោមនេះ៖
១៖ ទានបារមី: នៅក្នុងរឿងព្រះវេស្សន្តរជាតក គឺជាការធ្វើអំណោយ ប្រាសចាកពីការ​កំណាញ់។ ធ្វើអំណោយជាទ្រព្យសម្បត្តិ ការផ្តល់អភ័យ ការផ្តល់ឱកាស...។
២៖ សីលបារមី: ការរក្សាកាយវាចាចិត្តឱ្យល្អបរិសុទ្ធប្រពៃ (ក្នុងភូរិទត្តជាតក)។ ឧហរណ៍​អ្នកជាប់សីល៥ សីល៨ និងសីល១០ តែងជា មនុស្សរស់នៅស្លូតបូត​មានចិត្ត​ល្អប្រសើរ។
៣៖ នេក្ខម្មបារមី: ការចេញបួសលះបង់ កាមគុណ (តេមិយជាតក)។ ជាការផ្តាច់​ចិត្ត​មិន​ឱ្យជាប់ជំពាក់នឹងទ្រព្យសម្បត្តិ រូបសម្បត្តិ ដែលជារបស់មិនទៀងទាត់ក្នុងលោកនេះ។
៤៖ បញ្ញាបារមី: ការដឹងច្បាស់នូវសភាវៈ ប្រែប្រួលឆ្ពោះទៅរកការរីកចម្រើន ឬការវិនាស​ទៅ។ ជាពិសេសដឹងច្បាស់នូវគំនិត ដើម្បីចោទ និងដោះស្រាយបញ្អា ដោយល្បិច (ក្នុងមហោសថ​ជាតក)។
៥៖ វីរិយបារមី: ឧស្សាហ៍ព្យាយាមធ្វើការដោយមិនបោះបង់ចោល កណ្តាលផ្លូវ (ក្នុងមហា​ជនកជាតក)។
៦៖ ខន្តីបារមី: ការអត់ធន់នឹងសេចក្តីទុក្ខ (ក្នុងច័ន្ទកុមារជាតក)។
៧៖ សច្ចបារមី: កាន់ពាក្យពិតមិនរើរុះ (ក្នុងវិធូរជាតក)។
៨៖ អធិដ្ឋានបារមី: តាំងចិត្តមាំដើម្បីឲ្យបានសំរេច (ក្នុងនេមរាជ ជាតក)។
៩៖ មេត្តាបារមី: ផ្សព្វផ្សាយសេចក្តីរាប់អានចំពោះសត្វមិនរើសមុខ (សុវណ្ណសាម ជាតក)។
១០៖ ឧបេក្ខាបារមី: តាំងចិត្តជាកណ្តាល មិនល្អៀងទៅខាងណា (ក្នុងនារទជាតក)។
ទសបារមី ឬបារមីទាំង១០ប្រការនេះហើយ ដែលព្រះពោធិ៍សត្វបានសាង ឆ្លងកាត់​ឱ្យ​បាន​ដល់ត្រើយនាយ គឺការបានត្រាស់ដឹង៕
TikTok: Vann Saray
#listening_speaking #sansochea #sansocheaofficial