ليه دفعت ٨٠٠٠ جنيه في فحص وترخيص سيارة قديمة؟
Вставка
- Опубліковано 6 жов 2024
- السلام عليكم ورحمه الله وبركاته
من كام يوم كنت في المرور بتاعنا، مرور أجا، دقهلية، بفحص وارخص عربية فيات ١٣٢ موتور ١٦٠٠ موديل ١٩٧٦ واتفاجئت وانا بحسب التكلفة، ان المبلغ كام ضخم جدا
تقريبا كده وصل 6000 جنيه فحص وسنه واحده ترخيص
اول حاجه هنعملها اننا نفحص العربيه، لكن طبعا قبل ما تفحص هتروح نيابه المرور او مكتب البريد
وتجيب شهاده بيانات للمخالفات سعرها وصل 125 جنيه
بس خد بالك خذ بالك انت، لازم يبقى معاك فيزا فيها فلوس هتدفع منها الضريبة مع شوية نثريات.
المرور دلوقتي شغال بالفيزا بنسبه كبيره جدا يعني على الاقل هتدفع نص التكلفة بالفيزا، يعني من 2000 جنيه ل 4000 جنيه
واول خطوه عملتها علشان اخذ ملف الفحص، اني اطلب من كشك جنب المرور وصل لملف الفحص، ايوه انت محتاج اذن قبل ما تاخد ملف الفحص.
وده كان تكلفته 350 جنيه
وخدت ملف الفحص وطفايه جديده علشان الطفايه بتاعتي كانت منتهية، رغم ان شكله انضف من الجديدة ولم تستخدم الحمد لله.
المهم دفعت ١١١٠ للملف والطفاية، يعني كده الطفايه ب 500 او 600 لوحدها، والملف تقريبا نفس التكلفة.
بعدها روحت للعربية بتاعتي ووقفت في صف العربيات اللي مستنية رفع بصمة الشاسيه والموتور.
وبعد تقريبا ساعه، عشان اليوم ده مكنش زحمة، جه الدور على العربيه بتاعتي أخيرا، وتم رفع البصمة
وطبعا الافضل إنك تدفع لمهندس البصمه اي حاجه بعد ما يخلص، ودي الحاجه الوحيده اللي دفعتها بمزاجي وبكامل ارادتي.
وبعدها دخل الملف بتاعي للظابط وانا ركنت العربية بعيد عن الطابور بتاع العربيات
ولفيت على رجلي ووقفت قدام اوضه الظابط مستني الملف بتاعي... لحد كده تمام
لكن لما خذت الملف بعد تقريبا ربع ساعة واقف.
قالوا لي ادخل جوه واسال عن الاستاذ علي وادفع (الجوابات) وانا ما اعرفش يعني ايه جوابات، ولا عرفت ولا هعرف، الا لو حد عنده معرفة يكتبلنا تعليق ينوبه ثواب
المهم لقيت ناس كتير واقفه وبتدفع الجوابات، وكان على وشهم علامات الاستغراب اللي كانت على وشي.
وكلهم بيدفعوا فوق ال 1000 جنيه، واول واحد شوفته، كان بيدفع ١٧٠٠ جنيه
و انا شخصيا دفعت 1600 جنيه وما اخذتش وصل ولا اي حاجه، تثبت المبلغ، بل انه خد مني الملف وقال لي اطلع فوق الدور الثاني واستنى ينادوا اسمك، والغريب ان كان في واحد بيرخص موتوسيكل وقال انه دفع 1300 جنيه جوابات. سبحان الله
كنت متصور كده خلاص مش محتاج حاجه تاني وقلت شكله بتاع الجوابات ده بقى موظف بيختصر الخطوات اللي كنا بنلفها في خطوه واحده، وهاخد الرخصة وامشي.... لكن اتقل لسه التقيل مجاش.
استنيت اسمي لحد ما ندهولي، وادوني رقم انزل ادفع بيه لامان
دفعت بالفيزا ٣٢٧ جنيه لشباك أمان الأولاني
وفي الشباك اللي جنبه برده دفعت لامان 860 جنيه كاش، علشان شنطه الاسعافات اللي ما لهاش لازمه، وعندي لسه القديمة متفتحتش، (وطبق الاصل العلقه اللي فاتت) سعيد صالح
وبعد كده اخذت وصل من أمان، ورحت لكشك بره وخدت منه شنطه الاسعافات ومعاهم كام ورقه كده وقال لي روح في ضهر المبنى اللي قدامنا ده
ولما رحت في ظهر المبنى اللي قدامهم ده
لقيت ان ده قسم جديد شغلته فحص للعادم.
وقال لي هات العربيه، ولما رحت اجيب العربيه لقيت واحد معرفوش، جاي يقول لي هات 20 جنيه اديته ما اعرفش بتاع ايه بس مش هتفرق
المهم ان الفحص ده لو عربيتك مش تمام مش هتعدي لازم حريق العربيه يكون مظبوط وما بتخرجش عادم، عشان متترفضش وترجع تلف تاني.
المهم ربنا ستر وعديت منها، وشخبط لي على وصل كده كنت واخده مع شنطه الاسعافات، وقال لي اطلع فوق ثاني، واستنى لحد ما ينادوا اسمك
وكمان ركنت العربية جنب منه
ولما طلعت فوق استنيت شويه طبعا الانتظار والحاجات دي بتاخد وقت طويل واليوم عايز له مثلا يجي اربع او خمس ساعات وحظه بقى اللي بيفحص في الصيف زيي.
المهم لما نادوا اسمي خدوا مني الفيزا وسحبوا منها مبلغ 120 جنيه واداني رقم على ورقة وقال لي هتدفع بيه في الخزنه....
ولما رحت وقفت مستني اخد دور في الخزنه الموظفه قالت لي لازم تدفع بالفيزا، وانا ما كنتش عامل حسابي والمبلغ اللي في الفيزا كان اقل بكتير من 950 جنيه اللي هدفعهم لضريبه العربيه في السنه اليتيمة اللي هرخصها.
فقررت اني اروح البنك علشان اعمل ايداع بالمبلغ المطلوب في الفيزا، والله اعلم هلاقي مكنة الايداع شغالة ولا عطلانة زي كل مرة.
لكن الحمد لله حد قال لي ان في ناس هنا ممكن تحولك فلوس على الفيزا بتاعتك
نزلت تحت وسألت، والحمد لله وصلت، وواحد اداني الفيزا بتاعته، وقال لي على الرقم السري، وخد مني بس البطاقة بتاعتي، لكنه قال لي هاخد منك ال٩٥٠ جنيه ١٠٠٠ جنيه
قولت الحمد لله زي الفل، وفر عليا المشوار للبنك.
طلعت للخزنة ودفعت بالفيزا بتاعة الراجل ٩٣٦ جنيه، وسألت موظف بعدها، قال لي انزل تحت خدد رخصتك now وبالفعل نزلت بس عديت الاول على الراجل صاحب الفيزا، اداني بطاقتي واديته ال١٠٠٠ جنيه، وطبعا هستلم الرخصة بالبطاقة.
واستنيت قدام شباك قريب، عشان استلم الرخصة اخيرا، وقد كان، في وقت اقل من ١٠ دقايق، خدت رخصتي الحمد لله، رغم ان شكلها قديم، والقديمة كانت انضف منها، بس المهم خدت عربيتي ودفعت ركنه ١٠ جنيه، قال لي لسه ١٠ كمان، دفعتها من غير كلام ومشيت.
ولما جيت احسب التكلفة، لقيتها
١٢٥ شهادة مخالفات
٣٥٠ وصل لطلب ملف الفحص
١١١٠ ملف الفحص بالطفاية
٥٠ دخان مهندس الفحص
١٦٠٠ جوابات
١٢٠ شباك معرفش بتاع ايه
٣٢٧ امان
٨٦٠ امان
(٥٠)
٢٠ معرفش ليه
٢٠ ركنة
١٠٠٠ (٩٣٥) ضريبة
وخدت وقت كان من تسعة ونص، لحد الساعة واحدة الضهر، ما كانش فيه مخالفات يا دوب اشتريت بس الطفايه ورخصة سنه مع الفحص
رخصه السنه مع الفحص صرفت عليها اكتر من ٥٥٠٠ وطبعا لسه ٢٠٠٠ كمان لو هرخص سنتين، في عربية اصلا بيتعملها تخريد
يا ترى انت رخصت عربيتك بكام ونوعها ايه، وبكده نكون وصلنا لنهايه حلقتنا لايك بقى للفيديو والسلام عليكم ورحمه الله وبركاته
ربنا يعينك ويرحمنا ربنا ان شاء الله
حسبنا الله ونعم الوكيل اللهم انتقم من حكومة الظالمين والفاسدين شر انتقام اللهم ارنا فيهم عجائب قدرتك كان الترخيص كله ب 600 يا حكومة كفرة
50 جنية العادم هيبقي تمام 😂
هى الجوابات دى ليها علاقة بتغير الموتور يعنى ان مغير موتور ولا لا
لا خالص
ولا غيرت حاجة
هي هي نفس العربية اللي فحت من ٣ سنين
نصيحتي سيتي ستارز احسن
حسبي الله ونعم الوكيل في اللي كان السبب في اللي احنا فيه دة
طيب المرور عندك تكلفة الترخيص كام؟
@@HanyMoh2017yt انا اخر حاجه من شهر ٩ اللي فات دافع ٥٠٠٠ جنيه بس مرخص ٣ سنين ترخيص وفحص
٥٤٠٠ جنية هيونداي ٢٠٠٥ بس هانعمل اية لازم تدفع
فحص ورخصة سنة ولا ٣ سنين؟
وعرفت ايه حكاية الجوابات دى يا أ هانى ؟
حتى الان لسه والله
للأسف في كذا حاجة من اللي حضرتك اشتريتها بتبقى اختياري واللي بيقولك عليها ناس لابسة كويس بتبقى تبع شركات خاصة متفقة مع المرور زي الفيست وحاجات تانية كتير وخدمات زي اشتراك في والانقاذ على الطريق انو يبعتلك ونش وكده وكذا حاجة تاني انت مبتقاش عارف انها اختياري ولا هما بيقولوا ولكن قدر الله ماشاء فعل إن الله يمهل ولا يهمل واجرك وحسابهم عند ربنا ...اللي خدوه فلوس بالنصب هتاخده حسنات منهم يوم القيامة
شكل كلامك صح
بس اكيد لو حاولت امشي رسمي هتلاقي الموظفين يعطلوا شغلك ويتلككوا كعادة الموظف المصري
يا باشا ما تحسبش كل الفلوس إلي حضرتك دفعتها دي علشان البشوات تعرف تعيش كويس و إحمد ربنا إن هما سيبينك تعيش فيها
حسبي الله ونعم الوكيل فيهم ربنا ينتقم منهم
المشكلة اني بشوف بوستات لناس من مرور تاني كاتبية تكلفة نص التكلفة دي، وعربيات اعلى بكتير واحدث
انا بفكر الفحص الجاي اغير مرور العربية
مرور عبود القاهره
دفعت ترخيص وفحص سنه ٢٨٠٠ج بدون طفايه بدون قرطاس بدون اسعافات اوليه سيارة نيو اكسنت ٢٠٠٨
تقريبا عشان المرور عندنا جديد من ٤ سنين تقريبا
وبيستهبلوا شوية
انا كنت رخصت مرة في مرور المنصورة من زمان وكان ببلاش وقتها مكملتش ٢٠٠٠ جنيه فحص ترخيص ٣ سنين
سبوبة وسرقة وتقليب المواطن بكل الطرق
فعلا بيجمعوا مليارات
انت مواطن لقطه 😂
على اساس انك كنت هتفاصل معاهم يعني