Ана мен бала хабары. Ақын Алмас Темірбай. «Ғажап сенің әр күнің...» өлеңі

Ана мен бала хабары. Қарақат Әбілдина мен Ақын Алмас Темирбай. «Ғажап сенің әр күнің...» өлеңі
ҒАЖАП СЕНІҢ ӘР КҮНІҢ...
Табиғаттың жаман ауа-райы жоқ,
Шүкірлік қыл осыған да, қайыр ет.
Жақсы күнін, жақсылығын сыйлайтын
Жаратқанның күндері көп, айы көп!
Жауам десе жаусын, мейлі, қар бүгін,
Қазақ - елім,
Ғажап сенің әр күнің!
Жақсы көрем туған жердің жаңбырын,
Жерін, көлін, желін, шөбін - барлығын!
Сарыарқаның самалын сүй, желін сүй,
Сүйе білсең, сыйлайды өмір небір сый.
Жаман ауа-райы деген болмайды,
Болады тек, кейде жаман көңіл-күй!
Неткен ғажап күн де, түн де, дала да?!
Ыстығына, суығына қарама!
Тағдырыңды өзгертетін - өзіңсің,
Әр күніңді жақсы көріп, бағала!
Көктем болып көкте, гүлде гүлзарда,
Күз секілді күреңітіп, мұңданба.
Ауа райы әсер етпес адамға,
Көңіл-күйің керемет боп тұрғанда...
Маған, мейлі, көктем келсін, күз келсін,
Жердің беті - батпақ болсын, мұз болсын.
Ертең бәрі өтеді де кетеді-ау,
Осы күнді сағынарсың, іздерсің...
Болар талай борандар мен дауылдар,
Жауар талай жауындар мен қалың қар.
...«Өмір қиын» - демейікші, - «күн жаман»,
Көңіл-күйің жақсы болсын, бауырлар!!!
авторы: @almas_temirbai
/ almastemirbai