【失散25年】「三蟹」現身做嘉賓 「丁蟹」鄭少秋想重演掉仔落街

【失散25年】「三蟹」現身做嘉賓 「丁蟹」鄭少秋想重演掉仔落街
2017-05-29 22:53:51 HKT
今晚秋官演唱會嚟到第二晚，演唱會話明係「半世紀．大時代」，喺《大時代》同秋官合作嘅三隻「蟹仔」又點可以唔嚟撐「丁蟹」呢！今晚除咗繼續有欣宜之外，「孝蟹」邵仲衡、「益蟹」陶大宇、「利蟹」郭政鴻齊齊現身做表演嘉賓。
「三蟹」現身觀眾隨即歡呼，秋官就話：「今晚就好喇！有女又有仔。」其中「二仔」陶大宇一出到嚟就話要睇下老竇，仲話真係成身muscle，而「大仔」邵仲衡就話：「老竇脂肪含量真係低過2%！」秋官仲問三個仔咁耐冇見人，係咪發咗達，正當三個仔想答嘅時候，秋官就繼續話觀眾都想睇到《大時代》嘅經典場面，就係丁蟹掟仔落街，暗示要掉佢哋落台，不過陶大宇就話唔夠高，驚壓親人。
之後三個仔仲講到咁多年做咩，而細仔郭政鴻就對秋官話：「呢廿幾年嚟真係犀利，呢兩個真係不孝呀，咁多年嚟我起碼同你拍咗套《桌球天王》嘛！佢（陶大宇）呢就係新加坡好犀利！」陶大宇接住話：「唔好睇我哋試試正正，其實我哋不知幾坎坷，真係o架！半夜三更都走上嚟開工，好明顯啦！我好手緊o依家！」邵仲衡就話佢原則上就周遊列國、作奸犯科，之後郭政鴻就爆：「其實佢拍完《大時代》之後已經唔做戲，做老細，飛黃騰達喇！」
之後「三蟹」仲講到丁蟹效應，陶大宇仲話拍完《大時代》之後，秋官拍戲都同股市有關，而邵仲衡就話：「點都好，當年拍到呢套神劇，真係光榮嚟！」之後佢哋仲合唱《誓要入刀山》，唱到一半秋官就返入後台換衫。

[@bele5890]

Tôi vẫn ái mộ người nghệ sĩ nầy bao nhiêu năm vẫn không thay đổi chúc bạn thật nhiều niềm vui và hạnh phúc thành công ❤

[@samtam4929]

大時代 呢幾仔爺 真係好撩人打㗎 邊有咁寸噶 聲大夾惡