Д.Пүрэвдорж "Тусгаар Тогтнол" шүлэг, ЭӨЦСургуулийн 1-6 ангийн сурагчид. АУБагш: БТА Д.Сугирсүрэн

"Тусгаар тогтнол" шүлэг. ЭӨЦСургуулийн 1-6р ангийн сурагчид
Ханат цагаан гэрийн Од хийморийн тоонон дээр
Хасаг халуун тулгын Омог дөрвөн тотгон дээр
Хан Алтай-аавын Онгон тэргүүн оргил дээр
Хатан Сэлэнгэ-ээжийн Одод орчих мандал дээр
Тусгаар тогтнол чамайг Тунхаглан бичнэ би!
Ганган улаан тэмээний Зогдор дэвсэх тэшил дээр
Гантай мөнгөн хэтний Зоо дэлдэх тээгэн дээр
Галбын халуун говийн Хулан ангах ээрэм дээр
Гантиг чулуун хясааны Янгир халих элгэн дээр
Тусгаар тогтнол чамайг Тунхаглан бичнэ би!
Хүж дурдан бүсний Ташаа дарах нугалаан дээр
Хүрэл манан хөөрөгний Даалин дарах наргиан дээр
Хүүшийн сүүдэр буусан Уулын гацаа бууцан дээр
Хүннү дээдсийн тамгалсан Улбаа гархин буурин дээр
Тусгаар тогтнол чамайг Тунхаглан бичнэ би!
Ширмэн төмөр дөрөөний Шивээ зурах тавган дээр
Шижир алтан ээмэгний Шигтгээ чимэх гархин дээр
Шинийн хоёрын саран Хаяалж шингэх тэнгэр дээр
Шимийн нялх ногоо Ханшилж задрах газар дээр
Тусгаар тогтнол чамайг Тунхаглан бичнэ би!
Аавын мөнгөн хазаарын Найман цэнгийн товруун дээр
Азын алаг мэлхийний Наян нэгэн шагайн дээр
Алиахан саарлын унага Хөллөн тэнцэх нуга дээр
Ангирын хоёр дэгдээхэй Хөвөн цэнгэх нууран дээр
Тусгаар тогтнол чамайг Тунхаглан бичнэ би!