قربو مني المشهر 🔥 العمور الدواسر 🔥 خالد ال بريك / عبدالله الشرع

قرّبو مني المشهَّر وغيري يستخير
يامقامٍ يطلق الوجه ولاّ يابلاه
بندقٍ ماسر في حزته مافيه خير
الرصاص يكذّب ويفتشل منهو قناه
الحمايا كايده خص في الوقت الاخير
عقّب الله لحية الي على ربعه بلاه
شفتنا ان الشر احيان في تاليه خير
والتجارب هي مدارس لنا في ذا الحياه
واشهد اني يوم اهوجس وانا ضايق عصير
ثم يطري لي ابن عمٍّ عجب عيني نباه
لاذكرت اسمٍ مقدّر وناموسه كبير
حي والله راسه وطول الله في بقاه
اي نعم هذا ابن ناشي ومايبغى يصير
اي نعم هذا ابن ناشي مجمِّل مَن وراه
يوم اقول سعيد ياقف له الجمع الغفير
ابن ناشي ذخر فارس وكم شان احتماه
ارحبو وان دندن الشاعر الدندان غير
ارحبو وطويق سارت له جبال السراه
الدواسر كل رجالٍ بحسبةْ امير
سادةٍ سادو بالافعال في كل اتجاه
الدواسر هم هل الخيل والملحا النظير
الدواسر جارهم يبشر بوسمة عصاه
الدواسر في الجزيره لهم وادٍ شهير
واديٍ ما استعمره عايلٍ ولا خذاه
وان تعزويت العزاوي تبصّر يابصير
العمور الي لهم كل مجدٍ منتهاه
العمور ايه العمور السعد للمستجير
شوشو يادوسر العز يالقوم العْصَاه
اي نعم حنا الدواسر هل السلم الشهير
مانبيع الما ولو غيرنا بيبيع ماه
اي نعم حنا الدواسر عجب عين القصير
نملي بطون الكتب نفحم دْهَاةْ الرواه
العدو لامن حربنا الى بئس المصير
والرفيق انّا له العز وابواب الغناه
هكذا حنا على الطاله نْحث المسير
ياحياةٍ تطلق الوجه ولا لا حياه
عبدالله بن الشرع العمور الدوسري