青衣北公園滑板場街場初體驗

今日我放假，諗住一早起身同 Emily、巧玲趁重陽節假期一齊返去深圳灣後海嗰間滑板學校上滑板堂。我晨早七點幾起咗身，跟住做咗啲家務，洗咗衫晾埋衫。巧玲之後先起身食嘢，出發嘅時間都已經十點幾。
出發前，我哋發現有啲情況唔同，好似好塞車。我講嘅係深圳灣大橋，因為巧玲同學嘅一個嫲嫲今日都有返深圳灣，佢哋話八點半出發，十點幾仲喺大橋度塞緊。雖然咁樣，我哋都照出發。但落到去巴士站，見到條龍好長，就知道啲巴士應該返唔到嚟。
最終，我同瑤瑤媽咪商量後決定唔去深圳灣。好彩今日嘅滑板堂可以即日取消，因為瑤瑤媽咪同個職員解釋咗，唔係我哋唔想上，而係根本冇車可以上到去，去到你哋學校嘅話都可能要好長時間。
最後我哋坐小巴喺三聖出發去青衣，諗住去青衣北公園嗰個滑板場玩。我哋先去到青衣城搵地方食嘢。去到十一點幾，商場好多餐廳都啱啱開，十二點先開門。當中有一間叫 Lunch Naan Chicken 嘅韓式炸雞餐廳，之前喺元朗 Yoho Mall 食過，但之後佢喺 Yoho Mall 執笠，估唔到喺呢度仲見到返。即刻回味返當時喺元朗食佢哋炸雞嘅滋味。我哋照舊點咗碟有八款味道嘅雜錦炸雞、一個蛋包飯同埋年糕韓式泡菜拉麵。
環境算唔錯，因為我哋坐到個落地玻璃窗口位，但估唔到呢個竟然係今次用餐最好嘅體驗。啲食物質素就比我想像中差啲。首先，個牛肉飯我完全食唔到，覺得有少少變壞。但職員攞返去俾廚師檢查之後，解釋話冇問題，係佢哋用嘅醬汁味道。我問佢哋用咩醬汁，職員話係豬扒醬，跟住我更加奇怪，明明係牛肉飯，點解會用豬扒醬？職員都冇再解釋，只話佢哋店舖係咁樣做嘅。呢個解釋有啲牽強，而且如果我唔可以食豬，咁咪即係被欺騙？最後，我退咗個飯。
至於炸雞，今日上枱嘅時間只係溫暖，唔係新鮮熱辣啱啱炸起嘅感覺，甚至好似微波爐翻熱過。職員解釋話每一日都係即刻炸，但我感覺就一般。不過，總算唔係太差，如果係我第一次嚟，應該都覺得冇乜問題。
食完之後，我哋原著去青衣城出面個河畔公園，一路向青衣北公園進發，沿途玩下遊樂場。去到滑板場已經兩點幾，巧玲開始玩滑板，開頭有啲唔慣，唔敢玩，可能係第一次喺室外街場，佢哋都有啲膽怯。但巧玲喺室內訓練學校玩咗一段時間，其實技巧都差唔多。一開始玩咗一陣，就樂而忘返，足足玩咗成個半鐘。
之後，因為見到隔離有個單車場，兩個小朋友不約而同一齊話要踩單車。我見價錢唔係好化算，半個鐘 55 蚊，一個鐘 65 蚊，唔係好抵。不過，媽咪同瑤瑤媽咪最後決定畀佢哋玩，租咗一個鐘。我覺得都 OK，百零蚊畀佢哋再放電多個鐘。個單車徑圍住公園嘅足球場都幾長，可以畀佢哋一路兜圈，但個圈又唔算太細。佢哋玩得好開心，我都有追住佢哋跑咗成兩個圈，自己都放咗電。
玩完之後，佢哋返 BB 車期間已經瞓著咗，梗係啦，玩咗成三個鐘頭，真係好攰。去到青衣城地下，我哋經過茶木，嗰陣時六點半左右，Emily 同瑤瑤媽咪仲猶豫緊食咩，我就話唔好諗啦，就呢間啦。因為今日假期，再過幾十分鐘可能就會超多人，咁我哋就入咗去，坐咗一個好舒適嘅卡位，兩個小朋友仲繼續瞓。
我哋點咗個窩仔，因為巧玲鍾意打邊爐，另外再點咗三杯雞，仲加咗兩個小食：青瓜豬耳同埋鹽酥雞。啲菜式我覺得幾好味，但份量真係唔算多。不過，我都唔算好肚餓，因為晏晝嗰啲韓國餐唔係太好食，可能畀我彈得太多，大部分都係我食晒。所以到夜晚都未消化，雖然份量唔算多，但對我哋五個人嚟講都夠。
食飽飽，開開心心完結咗今日嘅旅程，之後我哋坐小巴返屯門。