ميزنية ضعيفة ونجوم كتير رافضوا يمثلوا فيه...أسرار مسلسل لن أعيش في جلباب أبي ال كسر الدنيا وقتها

ميزنية ضعيفة ونجوم كتير رافضوا يمثلوا فيه...أسرار مسلسل لن أعيش في جلباب أبي..
ال كسر الدنيا وقتها
نور الشريف رفضه فالبداية واتحول بعدها لأهم دور ف مشواره الفني،
مسلسل عاش عمر طويل وعدي عليه أكتر من 25 سنة لكن لسه حي وكل الأجيال بتحب تتفرج عليه
ممثلين كتير مارضيوش يشتغلوا فيه واتعمل بميزانية ضعيفة،
واتصور منه 25 حلقة والميزانية خلصت ومع ذلك مفيش بيت في مصر بيزهق من أعادة حلقاته ،
(لن أعيش في جلباب أبي)
المسلسل ال رفضه فنانين كتير عشان كانت ميزانيته ضعيفة جدا وأهم دور فيه كان هيعمله
دور المعلم سردينة ال كان مترشح ليه الفنان (حسن حسني) لكن علشان كان عايز زيادة في الأجر ال اتعرض عليه وال كان 7000 جنية و رفض الدور وقال مش هاخد أقل من عشر تلاف يا إما الدور مايلزمنيش
ولما اتعرض علي الفنان (عبد الرحمن ابو زهرة) وافق علطول و لما راحله الانتاج ماكانش عنده غير مشكلة واحدة وهي انه مشغول شوية وبيعرض مسرحية جديدة في اسكندريه ف كان الحل انه يخلص العرض ويركب القطر من القاهرة لأسكندرية علشان يلحق التصوير.
وال كانوا مترشحين لدور (فاطمة كشري) ف الاول الفنانة (يسرى) والفنانة (إلهام شاهين) بس المخرج احمد توفيق اعترض وقال ولا (يسرى) تنفع ولا (الهام) تنفع للدور ده الاتنين حلوين ومعلمين الوكالة مش هيسيبوهم ومفيش واحده ف جمالهم هتبص لعبد الغفور البرعي وهو جاي الوكالة حافي واترشحت بعد كدا معالي زايد بس لما قرت الاسكريبت ماعجبهاش ورفضت الدور واترشحت مكانها عبلة كامل ال كانت لسة وجه جديد ورغم إن المخرج شخصيا ماكانش يعرفها قرروا يدوها فرصتها.
اما بقا دور عبد الوهاب كان خالد النبوي المرشح الاول ليه لكن لما الانتاج بعتله 7 حلقات يقرأهم قال مباخدش سيناريوهات ناقصة يا تبعتولي المسلسل كله يا بلاش والمخرج احمد توفيق وقتها انفعل وقال هو الواد ده نسي نفسه ولا ايه ورباب حسين اتصلت بيه وقالتله لما يبقى مسلسل عليه اسم احمد توفيق ومصطفى محرم يبقى عليه علامة الجودة عيب تعمل كده نور الشريف اكبر ممثل في مصر ووافق على المسلسل من حلقتين، وكان المرشح التاني علطول الفنان احمد رياض وال عمل الشخصية بشكل مدش يتصوره .
بس كل دا كوم بقا ودور عبد الغفور البرعي شخصيا كوم تاني خالص كانت عشان نور الشريف نفسه كان رافض المسلسل في الأول والسر وقالهم وايه دا هو انا مش بطل المسلسل؟! واتضايق جدا ومارضيش يكمل بس مصطفى محرم هداه قاله أجل انت بس قرارك اسبوع وهنعدلك السيناريو زي مانت عايز وقعد على الورق لحد م خلى المسلسل بيتكلم عن كفاح عبد الغفور البرعي في الوكالة من ساعة م نزلها وشغله مع الحاج ابراهيم سردينة وقصة كفاحه خدت 14 حلقة كاملين.
نور الشريف لما قراهم عجبه جدا وقال ايوة كده هو دا ال انا عايزه، ونزل بعدها اشترى لبس م الوكالة
و كان مهتم جدا بتفاصيل الشخصية لدرجة إن ف اول يوم تصوير المخرجة رباب حسين قالتله يا نور ايدك ناعمة ومش لايقة مع الشخصة ف قعد على الارض ووسخ ايديه بالتراب والطينة عشان تليق مع شخصية عبد الغفور والشبشب اللي هو لابسه من قدام الجامع.
والمسلسل اصلا ماكانش هيتعرض، الميزانية خرمت معاهم وهم شغالين وولما كان فاضلهم اقل من شهر على التصوير المنتجة ناهد فريد شوقي حصلها ازمة مالية وقالتلهم انا مش هقدر اكمل تصوير اللي معايا يدوب يكمل 11 يوم تصوير والمسلسل شكله كدا مش هيكمل وخلاص كان هيتلغي لولا المخرج احمد توفيق والمخرجة رباب حسين عملوا المستحيل عشان يكمل اول حاجه اخدوا شقة واحدة صحبتهم وعملوها شقة محفوظ سردينة وبعدها غيروا الديكور وخلوها شقة بهيره وصوروا فيها كل الخارجي وفرح سنية وفرح بهيره اتصوروا ف يوم واحد ف (ميليديان الهرم).
وعشان يوفروا تمن الأكل في الفندق وهم شغالين راحوا بنفسهم يشتروا ديك رومي وحمام وخلوا طباخ تبعهم هو ال يعملهولهم.
في النهاية مستنيين نشوف آرائكم وتعليقاتكم عن مسلسل لن أعيش في جلباب أبي وإيه الشخصية ال علقت معاكم؟

[@cherryblossom690]

شكرا جزيلا ، تقرير جميل جدا ❤❤❤

[@salimmasoud5871]

المرشحه الأولى لدور الذي قامت به وفاء صادق هي منال سلامه

[@hhrwohabs9734]

رغم انه باقل ميزانيه لاكنه كان أكبر انتاج تليفزيون عايش لليوم وله جماهيريه كبيره واللي عجبني اكتر استبعاد الهام شاهين ويسرا

[@okeenalasady1321]

بس تصليح في ذالك الوقت وهو عام 1996 وقت المسلسل ،، عبله كامل ماكنتش وجه جديد يمكن زي مانوهتي المخرج ماكان يعرفها بس هي بالثمانيات عملت مع يوسف شاهين و مع فاتن حمامه مرتين يوم حلو و مر و ضمير ابله حمكت بس حبيت أنوه دا صلاح ذو الفقار سماها فاتن حمامه جيلها ،،،، تحيا فلسطين