#Модар

Танзимгар ( автор мантажа) Бахтовари Ч,амшед
МУШКИЛКУШОЙ
Мушкилписанд, модар, мушкилкушой, модар,
Ҳам роҳпой, модар, ҳам раҳнамой, модар.
Ҳам шамс дилқринат, ҳам моҳ дар ҷабинат,
Ҳастӣ чу арш барҷо бе тахту ҷой, модар.
Осоише надидӣ аз дарду ғусса, аммо
Андуҳзудой, модар, шодифизой, модар.
Моро гусел карда, дар кунҷи хона танҳо,
Бигристӣ зи ҳиҷрон бо ҳой-ҳой, модар.
Ашки ниҳониатро ҷуброн чӣ сон тавон кард?
Ноогаҳии моро бахшой, ой, модар.
Гаҳ бахт ҷуста рафтам, гаҳ тахт ҷуста рафтам,
Ғофил, ки дар кафи туст мурғи ҳумой, модар.
Қадри туро агарчи мо - ғофилон надонем,
Болост қимати ту назди Худой, модар.
Мо зангбаста ҳастем, оинакорӣ аз туст,
Ин ҷурму кини моро аз дил зудой, модар.
Роҳе, ки мерасонад моро ба растагорӣ,
Бо як ишораи худ бар мо намой, модар.
Дар ин саройи куҳна бас навҳаҳо кашидам,
Як лаҳза аллаатро аз нав сарой, модар.
То дасти сарди пирӣ аз доманам нагирад,
Баҳри Бузургмеҳрат ту дер пой, модар.
Бузургмехри Баходур (Buzurgmehr Bahodur)