Цирк! Лейля Батырова. Лейля Батырованынъ сесинден.

Цирк! Лейля Батырова. Лейля Батырованынъ сесинден.
Цирк! Цирк! Цирк!
Бугунь эр кес севине,
Кейфлер эп котериле!
Эр кес, эр кес къуванды,
Чюнки цирк бизге кельди!
Циркке бармагъа севемиз,
Анда къызыл мейдан бар.
Севинемиз, эм кулемиз,
Ренкли фенерлер янар!
Билетлерни сатып алынъ!
Тебессюмлер эп артсын!
Шенъ, кулюнчлю косьтерювден
Эписи шашып къалсын!
Сюрпризлер бизни беклей,
Циркте меракълы эр шей!
Ал поп-корн ве "фри" къартоп
Биз башлаймыз! Алле-оп!
Гимнастлар
Дюльбер назик гимнастлар
Къоркъмайлар ич бир шейден.
Юварлана, секирелер,
Аркъан устюне минелер.
Огге-арткъа яваш юрип,
Адым-адым, ашыкъмайып,
Тар ёлчыкътан кечтилер,
Севиндилер, кульдилер!
Пельванлар
Бакъынъ, кучьлю пельванлар
Чыкъты къызыл мейдангъа.
Агъыр-агъыр демирлер
Пуф киби къолларында.
Джесюр батыр-пельванлар,
Эллеринде такъат бар.
Чыкъышлары меракълы,
Ким корьсе, шашып къалды!
Копечиклер
Энди къызыл мейдангъа
Копечиклер ашыкъа.
Саллана къуйрукълары,
Къаршылайыкъ оларны!
Акъыллы копечиклер
Беджерелер чокъ шейлер:
Топларны ата, туталар,
Сонъра оларны саялар!
Aв-Aв-Aв!
Ойнамагъа пек севелер,
Эр кесни севиндирелер.
Санада чапкъаладылар,
Сонъ шекерчик къазандылар!
Клоунлар
Мейдангъа шенъ клоунлар
Юварланып чыкъалар,
Топчыкълар, оюнджакълар
Топелерге учалар...
Къырмызы бурунлары,
Къувурчыкътыр сачлары.
Тебессюм юзьлеринде,
Олар бизни кульдюре!
Тылсымджы
Мына энди санада
Тылсымджы пейда олды.
Узун сакъал, юксек чалма,
Элинде бар таягъы.
Фокусларны корьгенде,
Нефесимиз кесильди.
Тылсымджыгъа алгъышлар,
Пек айретте къалдырды!
Аферин артистлерге,
Акробат, жонглёрларгъа!
Аферин чалгъыджылар
Эм де айванчыкъларгъа.
Бизлерни къувандырдынъыз,
Муджизе багъышладынъыз...
Энди сизни бир йылдан,
Беклейджемиз янъыдан!
Leylâ Batırova. Tsirk!
Tsirk! Tsirk! Tsirk!
Bugün her kes sevine,
Keyfler hep köterile!
Her kes, her kes quvandı,
Çünki tsirk bizge keldi!
Tsirkke barmağa sevemiz,
Anda qızıl meydan bar.
Sevinemiz, em külemiz,
Renkli fenerler yanar!
Biletlerni satıp alıñ!
Tebessümler hep artsın!
Şeñ, külünçlü kösterüvden
Episi şaşıp qalsın!
Sürprizler bizni bekley,
Tsirkte meraqlı her şey!
Al pop-korn ve "fri" qartop
Biz başlaymız! Alle-op!
Gimnastlar
Dülber nazik gimnastlar
Qorqmaylar hiç bir şeyden.
Yuvarlana, sekireler,
Arqan üstüne mineler.
Ögge-artqa yavaş yürip,
Adım-adım, aşıqmayıp,
Tar yolçıqtan keçtiler,
Sevindiler, küldiler!
Pelvanlar
Baqıñ, küçlü pelvanlar
Çıqtı qızıl meydanğa.
Ağır-ağır demirler
Puf kibi qollarında.
Cesür batır-pelvanlar,
Ellerinde taqat bar.
Çıqışları meraqlı,
Kim körse, şaşıp qaldı!
Köpeçikler
Endi qızıl meydanğa
Köpeçikler aşıqa.
Sallana quyruqları,
Qarşılayıq olarnı!
Aqıllı köpeçikler
Becereler çoq şeyler:
Toplarnı ata, tutalar,
Soñra olarnı sayalar!
Av-Av-Av!
Oynamağa pek seveler,
Her kesni sevindireler.
Sanada çapqaladılar,
Soñ şekerçik qazandılar!
Klounlar
Meydanğa şeñ klounlar
Yuvarlanıp çıqalar,
Topçıqlar, oyuncaqlar
Topelerge uçalar...
Qırmızı burunları,
Quvurçıqtır saçları.
Tebessüm yüzlerinde,
Olar bizni küldüre!
Tılsımcı
Mına endi sanada
Tılsımcı peyda oldı.
Uzun saqal, yüksek çalma,
Elinde bar tayağı.
Fokuslarnı körgende,
Nefesimiz kesildi.
Tılsımcığa alğışlar,
Pek ayrette qaldırdı!
Aferin artistlerge,
Akrobat, jonglörlarğa!
Aferin çalğıcılar
Em de ayvançıqlarğa.
Bizlerni quvandırdıñız,
Mücize bağışladıñız...
Endi sizni bir yıldan,
Bekleycemiz yañıdan!