石榴花開戲華安 (朱振華 馮麗明)

[@soapferry4832]

石榴花開戲華安 馮麗明撰曲
旦唱: 日日被呀春香吼呀吼到實, 做到我頭暈重兼夾要罰, 成擔樹椏要呀要砍伐仲要洗衫洗地兼呀兼揼骨. 我天天辛苦無閒逸, 兼夾時時重被人窒, 啍, 咪俾我有朝嫁得個大人物, 就可以悠閒咁渡日, 最緊要樣貌瀟灑兼老實, 風趣柔情再加上幽默, 朝晚互訴心曲永無冲突, 閨房樂趣甜似蜜.
旦白欖: 本想嫁大少嘅, 但世事真難料噃, 因為最近嚟咗個書僮, 佢貌似潘安人俊俏, 而家我變咗心竅, 唸住共佢效比翼鳥呀, 點知一屋女人都眼超超, 話要爭到呀華安, 來炫耀喎, 我唯有日夜去把香燒, 望神靈來關照, 佢個個都唔要, 剩係要我石榴同佢渡春宵, 唉吔唸起都想笑, 都想笑. 嘻嘻 呵呵 哈哈 死囉, 差啲唔記得夫人叫我去花園摘花添。 (快下場介)
生唱: 心焦困擾, 解元竟然裝作僕人, 只因心繫玉人, 毅然賣身, 在華府把身困, 今晚到花蔭, 靜院行, 有明月襯, 乍看花叢有綠雲鬢, 秀色隱約未看真, 已情不自禁, 心中千言萬語, 向秋香陳
旦唱: 桃花靚, 茶花正, 襯係我度重省鏡, 芙蓉含笑夠輕盈, 最好係掛在襟領, 芍葯玫瑰香滿亭, 全因我本領, 我擅長培種花木, 份外起勁, 合我心性, 解語花, 盼有人會順手拎, 孤零, 不願成世隻影孤零, 最想與佢兩温馨, 假若能夠今晚訂情, 嘩, 尤為高興.
生白: 秋香姐, 仲唔捉到你！
旦白: 邊個！邊個揞住我對眼。好快啲放手囉噃，唔係、我嗌非禮架。
生白: 唔好呀，係我呀！
旦白: 你係大少？
生白: 唔係，我係華安呀！
旦白: 吓！ 係、係華安呀，咁你唔好放手、千祈唔好放手。
生白: 你叫我放我都唔捨得放啦！
生唱: 俗世才人憑月引, 自製機緣言心悃, 姐你三笑略帶嗔, 牽引我神魂, 似蜂兒被花吸引, 你面似桃和杏, 雙眼更動人, 活潑機靈又聰敏, 願慈航來導引,望姐你垂憐憫, 共我心相印, 你淺笑與輕顰, 奪去我七魄三魂, 願永結愛戀同心盟,共訂姻緣諧婚嬪.
旦白: 係咪真嘅唧！ 華安哥！
生白: 吓 乜…乜原來…唔係秋香呀，石榴姐，真係唔好意思，我…我認錯人啦，失陪…失陪喇。(轉身欲走)
旦白: (拉住華安)冇冇冇，你冇認錯人，係我架啦，係我架啦。我咪係秋香…嗰個姊妹呀石榴囉。華安哥呀！
旦唱: 你同我共談情, 認真興, 唉吔我早已心傾, 你緣何至今至表白愛情, 你嘅愛歌聲,唉吔好温馨, 情深已盡領囉, 痊愈了個單思症.
生白: 唉！今晚真係運滯，又會撞到你嘅。
旦白: 嘻嘻，我地有緣咪撞到囉，喺呢，華安哥呀，你頭先講嗰啲說話,聽到人哋個心都甜哂，其實，我都有好多心事想同你講架。
旦唱: 自逢君, 盪神魂, 思君難安寢, 奴有幸, 蒙君憫, 得以美夢成真, 我呢個小丫鬟, 麗質天生, 鳳目朱唇, 身材豐潤, 早成事, 交杯互飲, 共枕銷魂.
今晚機緣巧合都再難逢，唉吔我望你即刻應承兼答允. (白)你話好唔好唧！
生白: 石榴姐，你…你咪咁心急至得架！
旦白: 又係你話鍾意人嘅，咁、而家又唔鍾意嗱！
生白: 唔係，鍾意，梗係鍾意啦！
旦白: 嘻嘻！咁…咁你鍾意我啲乜嘢唧！
生白: 哦！我鍾意你嘅嘢 咁就多囉！
生唱: 叫我形容, 你嘅好儀容, 嘴巴生得確唔同, 你識把雲鬢弄, 可惜樣欠奉, 似番瓜栽種, 但雙手可舉扛甚神勇, 昂首濶步完全似大熊, 一雙盅蓋眼墜而重, 加上肥且厚大圓圓耳墜, 認真搞笑, 直情係冇乜人同 .
旦白: 唉吔,我唔濟呀，華安哥，你講到人地咁肉酸，又話人似番瓜、又話人對眼似嵌盅，仲話人搞笑添喎。
生白: 石榴姐，其實搞笑即係可愛，一樣嘅啫。嗱，你唔鍾意嘅，我用第二種方法嚟讚吓你喇，嗱，你聽住喇。
生唱: 你眼帶神采真巴蔽, 咪起個樣使我着迷, 两唇厚大好矜貴, 生得性感豐滿上圍, 麒麟臂好福氣, 擔起個家都無問題, 兩頰紅紅無運滯, 面似番瓜有好運嚟, 耳朵豐厚你莫貪細, 娶妻最緊要講後繼, 兒孫一屋包你笑口噬噬.
生白: 咁 啱唔啱聽啫！
旦白: 咦，你氹得人好鬼開心嘅啫。華安哥呀！
旦唱: 因為你好風度, 好風度, 貌勝潘安生得好, 見多識廣品格高, 忠厚又善心有前途, 善良活潑擧世無, 諗起呢內心已泛浪濤, 所以個個見到都當寶, 揾到咁嘅丈夫確自豪. (白) 人哋真係好鬼鍾意你嘅啫，不如…不如我哋結婚囉。
生白: 吓, 乜話 結婚？乜原來你係想嫁俾我呀。
旦白: 梗係，個個都想架啦！不過我最想、我最想。
生:白 幣啦、幣啦！都唔知點甩身添。石榴姐，結婚咁大件事，就唔可以咁心急嘅，要慢慢 嚟至得架嘛，嗱、一定要夾過 年生八字至得。
旦白: 華安哥呀！
想知我嘅年生, 我就即刻來直稟, 二十芳華近, 明年二月慶生辰,觀音脫俗更出塵, 我似足佢就真難揾, 同一誕辰真有幸, 子時出世仲契觀音.
我年生一定能夾有緣人, 咁就與我共訂鴛鴦, 做老襯.
生白: 娶到你就真係老襯。
旦白: 係呀，結婚咪即係做老襯囉。我哋快啲去做老襯囉。其實都唔使夾架啦，相士話我個八字生得好到無人有，逢人都夾架喇。
生白: 吓，咁你個年生八字又的確幾好嘅，不過，唉，你睇佢儍吓儍吓咁，不如整古吓佢至得 啊！係啦。石榴姐呀，我又係二月十九觀音誕出世，你頭先話你幾多歲話。
旦白: 十九歲囉。
生白: 吓，咁啱嘅，我又係十九歲添。
旦白: 吓！咁…咁我哋咪同年同月同日生？嘻嘻，估唔到我哋真係咁有緣，唔…咁我嫁梗你 都得啦。
生白: 我都娶硬你架啦，你唔使慌！
旦白 : 吓，乜話？
生白: 哦！我係話你唔使謊，我唔會…唔娶你。不過咁噃，你嫁得俾我，你知道喇，我對飲食好奄尖嘛……
旦搶白: 哈，咁你同我定，唔係我自己誇口，我嘅十八鏟, 就真係遠近都馳名架。
旦唱: 自細已練成, 獨到嘅技能十八鏟 , 樣樣也學齊, 實有讚無彈非傲慢, 飯麪肉菜, 魚牛豚鰻, 葛豆腐與蛋, 燘蒸煮炸, 焗灼燉燴, 好易辦, 日後若結和鳴鸞鳳, 我用十八鏟, 開間小店, 共策共謀包有賺.
旦白: 唔喺話賣花讚花香，實情邊個娶到我石榴呀！真喺成世唔憂架！
生白: 吓，成世唔憂？我話前世唔修就真，唉！唉吔吔， 以為借意留難能解困, 試問如今怎派閉門羹.
生唱: 我實難共佢訂婚姻, 佢雖有才能有天份, 可惜相思錯賣, 我獨愛秋香意迷人, 縱有玉液山珍, 難對飲, 縱有滿園桃杏, 也不願相親, 縱有絕世才華 亦被情所困, 怎得秋香能應允, 下嫁我唐寅, 如此花月良宵, 怎生抒懷將鳳引.
旦白: 華安哥，你成晚都吟吟沉沉！咁我哋結得婚未唧 ！
生白: 未…未…梗喺未得啦！。呀！喺啦！石榴姐呀，我有一件事幾乎唔記得話過你知添。上個月有位相士曾經對我贈言，佢話……
生唱: 佢話欲成鳳偶要酬謀, 須等候, 渡過今秋, 始可花並頭, 共老同諧廝守,
旦唱: 就成鳳偶, 又心心互扣,點解要待過今秋唧,
生唱: 相冲招罪猶, 犯剎兼減壽, 就會禍延翠袖,
旦唱: 若能避過禍劫, 緣結並蒂,心花開透,
生唱: 此番相思不可透, 婚姻之事莫泄漏, 為怕惹得擔憂,
旦唱: 相棲夙願酬, 一於將君候, 共把秘密守,
生唱: 一心娶石榴, 不須擔愁, 自有媒婆來問候.
生白: 係喇 呀石榴姐，宜家…宜家都好夜啦，不如你早啲番去抖罷啦。
旦白: 唔，真係唔傾多陣啦。
生白: 唔啦，早啲番去抖，你個樣至靚架嘛，聽話啦，番去瞓啦。
旦白: 哦，好啦，我聽哂華安哥話，咁…咁我番去囉噃！
生白: 係囉，咁就乖喇 抵錫，番去啦、番去啦！
旦白: 呀…係囉，咁 咁不如你錫我一啖，當係落住啲訂先喇，好唔好唧！
生白: 吓，咁都得嘅, 咁…咁好喇…嗱，咁你咪埋雙眼先啦,
旦白: 嘻嘻，唉吔，真係錫嗰喎，咁…咁我真係走囉噃， (下場介)
生白: 小心慢慢行喇…唉…
生唱: 望只望秋香能應允, 共我摯誠相愛, 早日結朱陳.

[@catkuok7442]

諧曲難寫 難唱。
馮麗明 👍🏻寫得好 👍🏻 唱得精彩👍🏻自然🤗🤗

[@soapferry4832]

謝謝欣賞，好開心呀！🙏🏼

[@cheechengchow6670]

冯小姐撰曲👍👏也唱得好！悲惨 诙谐粵曲一样劲.敬佩 敬佩！

[@soapferry4832]

過獎了，多謝欣賞！🙏🏼

[@yumileung4194]

原來是馮小姐撰曲的，真是多材多藝，👍👍，演得也為肖為妙，請問這曲紙有否在市面流傳呢？
你好，謝謝你的回覆，待有機會習唱這曲😙😘

[@soapferry4832]

不是甚麼大作，所以沒有在市面流傳，但若曲友喜歡，也有電郵給他們的。☺️

[@cheungkitty4560]

Good

[@eaglelky]

冯小姐似乎后生咗？

[@soapferry4832]

這個都十年前了，比現在真的後生好多。😅

[@eaglelky]

啊，冇睇清楚演出日期， 以為是新作。😅😅☺現在把聲仍然好後生！

[@LamLam-te9zg]

👏👏🙏🙏

[@丽芳李-b2f]

J