لما النرجسي يرميكي"القاء وتخلي" مفروض تفكري ازاي؟

لينك حجز الكورس ع الواتس:
chat.whatsapp....
رقم حجز الاستشارات : ٠٠٢٠١١٥٠٥٨٦٠٥٢
ليه ضحية النرجسي دايما تسأل النرجسي حيعمل ايه؟ ليه مش بتسألي نفسك انا حعمل ايه ؟ ليه دايما مستسلمة انك تكوني رد فعل؟ ليه ماتكونيش انتي الفاعل ؟
سؤال بيتكرر كتير ،هو النرجسي حيعمل ايه بعد الالقاء والتخلي؟ (اللي هو ايه الالقاء والتخلي؟ اللي هو يسيبك ويمشي بدون أي مقدمات ولا أسباب منطقية ومايسألش عليكي نهائيا ولا برسالة او انه يفضل في البيت بس في غرفة تانية وماياكلش من ايدك يعني هو بيتنازل عن الثلاث حاجات الخدمة والعلاقة والوقود او بيرفضهم منك مش عايزهم) طيب هو دلوقتي عمل القاء وتخلي سواء مؤقت او دائم يعني هو رماكي سواء رماكي مؤقتا عشان يؤدبك ويذلك او عشان مش فاضي لك لانه وقته وطاقته رايحين على مصدر جديد او انه تخلي نهائي لانه حاسس انه مش عارف ياخد منك اللي هو عايزه لاي سبب ، المهم ان هو رماكي طيب انتي المفروض لو انتي سوية ومش مدمناه ولا عندك الاضطراب التالي للكرب مفروض تفكري في ايه تحديدا ؟ اول حاجة مفروض تفكري فيها انا حعمل ايه المفروض ابدأ افكر في القرار اللي حاخده في حياتي والتصرف اللي حتصرفه مع الشخص اللي تخلى عني بالندالة دي ، مش افكر حيعمل ايه تاني؟ ماهو حيعمل ايه تاني دة معناه ان حتى رد فعلك مش موجود ولا انتي مدركة ان لازم يكون لك رد فعل او انك خايفة تعملي أي رد فعل لحسن هو يكون له رد فعل اقوى او مايرجعش تاني ، ويوم ماحتفكري يكون لك رد فعل حتدوري ارجعه ازاي ؟
خدوا بالكم انا هنا بتكلم عن اللي عرفت ان جوزها نرجسي يعني ادركت تماما انه مؤذي وانه لو رجع حيعيشها تاني نفس الجحيم . طيب انتي ليه بيكون دة تفكيرك؟
١- أول سبب انك شخصية اعتمادية لان الشخصية الاعتمادية زي ماقلنا في الحلقات الأخيرة انها رد فعل طول الوقت
٢- السبب التاني انك لسة مدمنة النرجسي وخايفة مايرجعش وكل تركيزك بيكون هو حيرجع ولا كدة خلاص ودة حله عندك في فيديوهات التشافي
٣- طبعا والاغلبية العظمى بتكون مشكلتها الفلوس والمصاريف والأولاد ولو مارجعش مين حيصرف علينا
٤- رابع سبب انك بعدتي عن نفسك وعلاقتك بنفسك وحشة جدا لدرجة انك عادي تعذبيها وتسيبي أي حد يعذبها ويهينها وانتيب تتفرجي عليها ومش بتدافعي عنها وكأنك غريبة عنها ، وهان عليكي انها تترمي وتتذل من النرجسي وسايباها وعايزة ترجعيه يكمل اذلال فيها ودة أسوأ وضع ممكن يوصل له البني ادم ولو صلحتي الوضع دة واتصالحتي مع نفسك كل حياتك حتتغير وحتقدري تتخلصي من الإدمان وحتبطلي تتمسكي بحد بيؤذيكي وحتقدري تستمري ع التشافي وتخليه أسلوب حياة ، ازاي طيب تصالحي نفسك ؟
حاولي تتعرفي عليها عشان تشوفي مميزاتها حاولي تفهميها وتسمعي لها وتديها وقت حقول لك ازاي انا قلت قبل كدة بس حقول تاني
هاتي ورقة وقلم واقسمي الورقة نصين بالطول واكتبي في الناحية اليمين كل صفاتك الإيجابية والناحية الشمال صفاتك السلبية وكل ماتقابلي حد سوي وبيحبك من اللي حواليكي خدي رأيه في الكلام اللي انتي كاتباه وهاتي قلم احمر واكتبي بيه اراء الناس جنب كل صفة يعني اكتبي جنبها اذا اتقال لك موجودة فيكي او اتقال لك مش موجودة فيكي ، راجعي الورقة بعد فترة تكوني جمعتي فيها اكبر عدد من الآراء وشوفي كنتي صح في رأيك عن نفسك بنسبة كام في المية وشوفي الصفات الكويسة اللي ممكن يكون الناس اضافتها لقايمتك والصفات السلبية اللي انكروها او زودوها .
هاتي ورقة تانية واكتبي فيها الصفات اللي نفسك تكون فيكي او صفات الشخص اللي نفسك تكونيه ، وقارني وشوفي ناقصك كام صفة وابدأي تكسبي الصفات اللي انتي عايزاها ومش موجودة فيكي عن طريق تكوين عادة
التمرين دة له عدة فوايد ، أولا حتشوفي نفسك لو كنتي صادقة وانتيب تكتبي الصفات ، ثانيا حتبدأي تكتسبي صفات جديدة إيجابية انتي نفسك تكون فيكي ودة حيقربك من نفسك وحيخليكي تهتمي بيها وتحسي بوجودها ، ودة بيكون اول طريق التصالح مع النفس