صالونة دوك | أم شما

صالونة دوك :
في البدايه غسلت الدوك عدل أكثر من مره
ونقيته من الصدف وعقب نقعته في ماي حار وبعد نص ساعه بديت أنظف بطنه وأشيل السواد اللي فيه شرات ما هو مبين في الفيديو
وبعد ما خلصت رجعت حطيته في مشخل وفتحت عليه الماي وغسلته وفركته عدل لين فتح لونه
في قدر حطيت بصل وحمسته بشوية شوي ماي لين نشف وبدأ البصل يشوقر ضفت الزيت وحمسته وطيت النار عالآخر
وعقب وضفت الثوم والزنجبيل والكركم الطازج وغطيت القدر كم دقيقه ورجعت ضفت الكزبره واللومي اليابس وبعد غطيت القدر شوي وبعدين ضفت البهارات المشكله والكمون والفلفل الأسود والهيل ورجعت سكرت القدر
وعقب ضفت الطماط وبعد رجعت سكرت القدر عسب الدوك ياخذ من طعم البهارات والثوم والزنجبيل والكزبره
ضروري نحمس الدوك عدل بعد ما نضيف اي إضافه ما نستعجل عليه في الطبخ عسب يطلع ناطع وطعمه لذيذ أهم مرحله في الطباخ
بشكل عام الحماس خلوا الطبخه تنحمس على نار واطيه وعلى مهلها .
آخر شي خواتي ضفت الملح والماي الحار وغطيت القدر لمدة عشرين دقيقه وبالعافيه عليكم
اذا عيبتكم طريقتي في خدمة الدوك جربوها وادعوا لي
واللي مايعرفون الدوك هو نوع من البحريات يكون داخل الصدف اييبونه من مكران عسب جيه نسميه دوك مكران