ALuva KadaLoLu Teli Barutalide /ಅಳುವ ಕಡಲೊಳು ತೇಲಿ ಬರುತಲಿದೆ

Song : ಅಳುವ ಕಡಲೊಳು ತೇಲಿ ಬರುತಲಿದೆ / Aluva kadalolu teli barutalide
Written by: M. Gopala Krishna Adiga
Music Composed by : P. Kalinga Rao
Sung by: Anitha Ananthaswamy-Baru
ಅಳುವ ಕಡಲೊಳು ತೇಲಿ ಬರುತಲಿದೆ
ನಗೆಯ ಹಾಯಿ ದೋಣಿ |
ಬಾಳ ಗಂಗೆಯ ಮಹಾ ಪೂರದೊಳು
ಸಾವಿನೊಂದು ವೇಣಿ ||
ನೆರೆತಿದೆ ಬೆರೆತಿದೆ ಕುಣಿವ ಮೊರೆವ
ತೆರೆ ತೆರೆಗಳೋಳಿಯಲ್ಲಿ |
ಜನನ ಮರಣಗಳ ಉಬ್ಬುತಗ್ಗು ಹೊರ
ಳುರುಳುವಾಟವಲ್ಲಿ ||
ಆಶೆ ಬೂದಿ ತಳದಲ್ಲು ಕೆರಳುತಿವೆ
ಕಡಿಗಳೆನಿತೋ ಮರಳಿ |
ಮುರಿದು ಬಿದ್ದ ಮನ ಮರದ ಕೊರಳು
ಹೂವು ಅರಳಿ ಅರಳಿ ||
ಕೂಡಲಾರದೆದೆಯಾಳದಲ್ಲೂ
ಕಂಡೀತು ಏಕಸೂತ್ರ |
ಕಂಡುದುಂಟು ಬೆಸೆದೆದೆಗಳಲ್ಲು
ಭಿನ್ನತೆಯ ವಿಕಟ ಹಾಸ್ಯ ||
ಎತ್ತರೆತ್ತರೆಕೆ ಏರುವ ಮನಕೂ
ಕೆಸರ ಲೇಪ, ಲೇಪ |
ಕೊಳೆಯು ಕೊಳೆಚೆಯಲಿ ಮುಳುಗಿ ಕಂಡನೋ
ಬಾನಿನೊಂದು ಪೆಂಪ ||
ತುಂಬುಗತ್ತಲಿನ ಬಸಿರನಾಳುತಿದೆ
ಒಂದು ಅಗ್ನಿ ಪಿಂಡ |
ತಮದಗಾಧ ಹೊನಲಲ್ಲು ಹೊಳೆಯುತಿದೆ
ಸತ್ವವೊಂದಖಂಡ ||
ಆಶೆಯೆಂಬ ತಳವೊಡೆದ ದೋಣಿಯಲಿ
ದೂರತೀರಯಾನ |
ಯಾರ ಲೀಲೆಗೋ ಯಾರೋ ಏನೋ ಗುರಿ
ಯಿರದೆ ಬಿಟ್ಟ ಬಾಣ ||
ಇದು ಬಾಳು ನೋಡು ಇದ ತಿಳಿದೆನೆಂದರೂ
ತಿಳಿದ ಧೀರನಿಲ್ಲ |
ಹಲವುತನದ ಮೈ ಮರೆಸುವಾತವಿದು
ನಿಜವು ತೋರದಲ್ಲ ||
ಬೆಂಗಾರು ನೋಡು ಇದು ಕಾಂಬ ಬಯಲು
ದೊರೆತಿಲ್ಲ ಆದಿ ಅಂತ್ಯ|
ಇದ ಕುಡಿದೆನೆಂದ ಹಲರುಂಟು
ತಣಿದೆನೆಂದವರ ಕಾಣಲಿಲ್ಲ||
ಅರೆ ಬೆಳಕಿನಲ್ಲಿ ಬಾಳಲ್ಲಿ ಸುತ್ತಿ
ನಾವೇಕೊ ಮಲೆತು ಕಲೆತು
ಕೊನೆಗೆ ಕರಗುವೆವು ಮರಣ ತೀರ ಘನ
ತಿಮಿರದಲ್ಲಿ ಬೆರೆತು ||