لما النرجسي يفضح نفسه بنفسه"قصة مرعبة"

ما عليك سوى الانتساب إلى هذه القناة للاستفادة من المزايا:
/ @user-id-kawthers-sanad
حجز الاستشارات : kawtharsanad.com/
رقم واتساب ٠٠٢٠١١٥٠٥٨٦٠٥٢
النرجسي لما يفضح نفسه بنفسه " قصة من الواقع"
حصل معايا موقف مخيف خلاني اعيد التفكير في حياتي كلها
حالة بتحكي قصتها مع النرجسي ،بتقول انا كنت بنت زي باقي البنات يادوب بصلي واحيانا بقطع بس كنت بصوم رمضان طبعا ومكنتش بمسك مصحفي غير في رمضان وكان طول السنة يعلوه التراب وعادي كنت عايشة حياتي بدرس ومتفوقة وعايشة حياة شبه مستقرة واتخطبت لشخصية مرموقة وتعتبر شخصية عامة ومعروفة ولها جمهورها وكنت طبعا مبهورة بيه والكل حاسدني عليه لدرجة ان كان بيتقال لي انتي عرفتيه ازاي ووصلتي له ازاي ، انتي ربنا فتحها واداكي نعمة عظيمة ، وانا كنت مصدقة طبعا هو بيحبني ومحترم وبيتمنى لي الرضا واتجوزنا وربنا رزقنا بثلاث أطفال والحياة كانت مستقرة وهادية هو في شغله طول النهار وممكن يبات برة بالاسبوع ودي طبيعة شغله وانا بربي اولادي وسعيدة بيهم ولما بييجي بنقضي معاه ساعات معدودة وبيمشي والساعات دي بتكون زي الحلم كلها شوق ورومانسية وانا مش من الستات اللي بتغير ولا أقول له ماجيتش ليه ورحت فين ما انا كمان جميلة وواثقة من نفسي ، المهم عدت السنين واولادي اكبرهم كان ٨ سنين والصغير ٣ وكنا متجمعين في العيد اهلي وأهله عندي في الفيلا وهو كان مسافر والبيت كان زحمة اوي وانا بجهز الغدا وبعد ماقعدنا كلنا افتكرت ان ابني الصغير نايم وانا ماصحيتوش يتغدى معانا قمت اصحيه مش بيصحى جريت بيه ع الطوارئ وانا قلبي حيقف ولما وصلنا الدكتور قال لي البقاء لله ،طبعا صدمة وبلا مقدمات وانهيار وانكار وكل مراحل الصدمة عديت بيها وربنا ربط على قلبي ووقف جنبي والحمد لله ، المهم بعد انهيار الجميع والصدمة والبكاء ومين حيبلغ ابوه استقروا كلهم انهم يخلوا صديقه المقرب هو اللي يبلغه عشان يلحق الدفنة ، وهنا كان الموقف اللي بدل حياتها مش بس موت ابنها لا موت ابنها مصيبة ولكن لما ابوه يقول مش حقدر احضر الدفنة مش حلحق اجي انا حاجي بكرة بالليل في حين انه لو ركب الطيارة حيوصل في خلال ساعتين يعني يلحق يدفن ابنه في نفس اليوم بعد صلاة العشاء ، طيب مقالش اجلوا الدفن لبكرة ؟ لا قال ادفنوا وانا حاجي بكرة بالليل ، الحالة بتقول اول ما قالوا لي رد فعله قلت مصدوم ومش مستوعب ومش حيقدر يحضر الدفنة وتلاقيه منهار وهي أصلا كانت تايهة عن الدنيا فمفكرتش كتير في جوزها ، واندفن الولد واندفن معاه جزء من امه ، وتاني يوم بالليل جه الاب من السفر متجهم ومش بيتكلم وطبعا هي لما شافته انهارت وتوقعت انه ياخدها في حضنه ويبكوا سوا ويطبطبوا على بعض لكن اللي حصل انه دخل وقعد واخد العزا وقام دخل غرفته وقفل عليه الباب لحد تاني يوم الصبح وبعد ما اخد عزا الولد لمدة يومين اتنين سافر تاني بدون مايوجه لزوجته ولا كلمة ، وبرضه قالت مصدوم ورجع من السفر بعد أسبوعين ورجع يتقابل معااها كالعادة ساعتين كل كام يوم وكأن مفيش حاجة حصلت بيطلب علاقة حميمة وبياكل ويشرب ولا كأن فيه طفل مش موجود كان مالي الدنيا ضحك ولعب ومبقاش يقعد معاهم ع العشا ولا يقابله وهو داخل ، الحالة بتقول انا بقيت مش عارفة استوعب مش معقول لسة مصدوم وبعد أربعين يوم من الوفاة بدأ يطلب منها تقلع الأسود وترجع تاني زي ماكانت ولما اعترضت وعاتبته انت كنت مفروض تكون جنبي في محنتي قال لها انتي مكبرة الموضوع الله يرحمه يلا خلينا نجيب طفل تاني .
الحالة بتقول في اللحظة دي حسيت ان النعمة العظيمة طلعت نقمة عظيمة ، طلعت حاجة عمري ماشفت زيها ، اب مابكاش على طفله لما مات ،ولا أتكلم عنه دة لو قط مات بنعيط عليه ، حسيت اني متجوزة روبوت وبقيت متلخبطة ازاي هو كدة ازاي دة الحبوب اللي بيقول كلام حلو طول الوقت وبيحبني ومايقدرش يبعد عني وطول ماهو مسافر رسايل حب ووحشتيني ازاي دة رد فعله على موت ابنه ، المهم لما ماقدرتش اتجاوب معاه ودخلت أصلا في صدمة تانية انه مش حزين على ابنه ومش قادر يقبل حزني ولا يقذره حسيت كأن كنت لابسة نظارة سودا وفجأة وقعت من على وشي واللي وقع النظارة مش موقفه من وفاة ابنه وبس لا دة كمان رفضه لحزني على ابني خلاه اتبدل وبقى شخص عنيف وعصبي وبدأ لسانه يطول ويهدد بالطلاق وانه يطردني انا وأولاده الاتنين وانه مش حيقدر يتحمل النكد دة كتير
الحالة بتقول انها تابعت مع طبيب نفسي من بعد وفاة الولد ولما حكت له اللي حصل من زوجها شخصه نرجسي سيكوباتي
طبعا مش كل النرجسيين سيكوباتيين ومش كلهم بالقسوة دي لكن لازم تفهموا ان النرجسي مش بيحب حد ولا أولاده