معلقة بني عبس_مساعد بن ربيع الخياري الرشيدي
Вставка
- Опубліковано 20 жов 2024
- أدخل على الله و أسلم الأمر تسليم..
و أستغفره و أستذكره و أستميحه..
وضح النوايا و المساري مجاهيم..
و الحلم غالي و الليالي طويلة..
سادت مفاهيم(ن) و بادت مفاهيم..
ويح الزمن يا بنت الأجواد ويحه..
خلي علوم ممسين المرازيم..
و إخذي علوم مصمصمين القريحة..
حنا سلايل (عبس) يا مذيل الريم..
حنا مقابيس الوغا يا مليحة..
حنا سلايل (قاسم الخيل) و (دليم)..
وزعاتنا يوم المكايد رجيحة..
بدو(ن) حفايا ما أنصفتنا المقاسيم..
و بصدورنا عز(ن) تطانخ فحيحة..
نرعى رفيف البرق في ساقة الغيم..
و من يستبيح حدودنا ما نبيحه..
و إليا ترع في هرجته دفش و بهيم..
خطوا الهبود اللي تكابر فطيحه..
عن ساقط الهرجة نطق الملاطيم..
و من طاح فيها ما رحمنا مطيحه..
نكبر عن الطفسة و نجزع من الضيم..
و نموت ما ناطا شليل الفضيحة..
نزوم زومات الرجال المحاشيم..
و نهد هدات النمور الجريحة..
ربعي على در المنايا مفاطيم..
من هازنا زاغت عجوزه تصيحه..
و إليا تغشلينا عسير الشغاميم..
لومك على اللي ما يبرهن مديحه..
إن لولشن محشمات الملاثيم..
و الموت حثرب بالحناجر ظبيحه..
جينا من أقصانا سحاب(ن) مراديم..
كل(ن) يذكي حروته عن نطيحه..
يا زين دح إنفوشنا للترانيم..
و العج واقف و الفعايل صريحة..
كان المنايا سوقها ما بعد سيم..
و الخوف برك من قلوب(ن) كسيحه..
حنا زباينها علي الملازيم..
علم(ن) يقريه النصيح لنصيحه..
و اللي بنا بيته نبيه إبراهيم..
إنا طريق لمستبيت الضريحه..
بني رشيد إن عتم الجو تعتيم..
ما للردى فينا معالم و ليحه..
أجسر من الرعاد و أكرم من الذيب..
سمر الجباه أهل الوجيه الفليحه..
يا بنت ما حنا فقارى معاديم..
لو ما سكنا بالقصور الفسيحة..
تجار لو حاشت يدينا ملاليم..
و من الغناه نفوسنا مستريحة..
ما نستضيق إليا لفونا معازيم..
للضيف لو نذبح حدينا ذبيحه..
دايم يدينا للعطايا مواليم..
لا خانت الفزعة وجيه(ن) كليحه..
طال القريض و مقبل الود و مقيم..
و البال عيا طارقه لا يريحه..
أقولها و أبصم على القول تبصيم..
و العلم بين زايفه من صحيحه..
ماهو قصور(ن) بالحرار الصماصيم..
كل(ن) بدرب العز قد هب ريحه..
و مدحي لربعي ما يذم الأكاريم..
و ما يستشك إلا خبيث الشريحة..
و الحق واضح للرجال المفاهيم..
و الحقد يخرث بالنفوس القبيحة..
و الشر من جية (معزي) و هو نيم..
و اليوم وحدة و الشريعة سميحة..