Guljamol Asqarova she'rlari "Qaqnus" teledasturida (Samarqand)

Гулжамол Асқарова шеърлари "Қақнус" теледастурида (Самарқанд) / Guljamol Asqarova she'rlari "Qaqnus" teledasturida (Samarqand)
Асқарова Гулжамол Шодмановна 1978 йил 5 март куни Самарқанд вилоятининг Каттақўрғон туманида туғилган.
1998 йилда Республика ёш ижодкорларининг Зомин анъанавий семинарида шеърлари эътироф этилиб, олий ўринни эгаллаган ва Ўзбекистон Ёзувчилар уюшмаси аъзолигига қабул қилинган.
2001 йилда Зулфия номидаги Давлат мукофоти билан тақдирланган.
Нашр этилган китоблари: 1998 йилда “Дил фасли”, 2000 йилда “Рўшнолик”, 2003 йилда “Бедор қўнғироқ”, 2004 йилда “Бахт дастхати”, 2007 йилда “Уйғотувчи алла”, 2008 йилда “Гулнома”, 2010 йилда “Турналар йўли”, 2012 йилда “Эркалик имтиёзи”, 2013 йилда “Ошиқлар тумори”ва бошқа қатор китоблари чоп қилинган.
Гулжамол Асқарова
АБАДИЯТ ЙЎЛИ
Самарқандга қайтмасам бўлмас,
Бу йўлларнинг бари ўткинчи...
Эй сен, қачон келасан, мени
Абадимга олиб кетгувчим!
Қишлоғимда юраги қонаб,
Сарғайиблар кутгувчи гул бор.
Менинг учун, биламан, фақат
САМАРҚАНДДА АБАДИЙ ЙЎЛ БОР!
Дўстларимдай панд берар кунлар,
Кунларимдай тахир бу ғамлар.
Барчангизга мен ғам бўламан,
Эй ғамимдан узоқ одамлар!
Бибим, мени чорланг, бораман!
Кўзларимни куй билан юминг.
Мен юрагим устида ўлсам,
Сиз юрагим ичига кўминг.
Ахир қачон юксаламан мен?!
Мева бергум қачон боғ бўлиб.
Ё кўксингда қабр бўламан,
Ё қоламан улкан тоғ бўлиб.
Самарқандга қайтмасам бўлмас!
Юрагимда қадимий титроқ.
Мени чорлаяпти Бибихон,
Ахир мени кутяпти тупроқ.
Самарқандда ўлмасам бўлмас!