២៤-ពុទ្ធជ័យមង្គល
ព្រះមុនិន្ទលោកាចារ្យ ផ្ចាញ់ក្រុងមារចិត្តមោហន្ធ
និម្មិតដៃមួយពាន់ កាន់សស្ត្រាវុធនានា។
ជិះគ្រីមេខលជាតិ កោញ្ចនាទខ្ទ័រពសុធា
ព្រមដោយមារសេនា ពន្លឹកលាន់កងសព្ទស៊ាន។
ដោយធម្មពិធី ទានបារមីជាប្រធាន
ក្រុងមារចាញ់ទ្រង់ញាណ ប្រណម្យកាយថ្វាយវន្ទា។
រីជ័យមង្គល ចូរមានដល់អ្នករាល់គ្នា
ដោយតេជជយា ព្រះឈ្នះមារ គ្រានោះហោង។
ព្រះមុនិន្ទពិននាយក ផ្ចាញ់អាឡវកយក្ខឃោរឃៅ
រឹងរូសមិនតាំងនៅ ក្នុងខន្តីគុណសត្យា។
រហូតអស់រាត្រី ព្រះជិនស្រីទ្រង់យុទ្ធនា
ក្រៃលែង ក្រុងមារា ក្នុងបឋមសម្ពោធី។
ដោយព្រះពិធីញាណ ទ្រង់ទូន្មានដោយខន្តី
ញ៉ាំងចិត្តអសុរី ឲ្យបង់ព្យុសចុះវន្ទា។
រីជ័យមង្គល ចូរមានដល់អ្នករាល់គ្នា
ដោយតេជជយា ព្រះឈ្នះអាឡវយក្ខហោង។
ព្រះមុនិន្ទពិនជិនស្រី ផ្ចាញ់ដំរីឈ្មោះណាឡា
គិរីវរគជា ដ៏ហានក្លាចុះប្រេងព្រេច។
សាហាវឆាវឆេះក្រៃ ដូចភ្លើងព្រៃឆេះកំទេច
មុតដូចចក្រក្រុតពេជ្រ ខ្លាំងដូចកាំអសនី។
ដោយព្រះពិធីស្រប ស្រោចទឹកអប់គឺបារមី
មេត្តាព្រះជិនស្រី ញ៉ាំងដំរីឲ្យជ្រះថ្លា។
រីជ័យមង្គល ចូរមានដល់អ្នករាល់គ្នា
ដោយតេជជយា ព្រះឈ្នះណាឡាគិរី។
ព្រះមុនិន្ទពិនលោកត្រៃ មានព្រះទ័យធ្វើបាដិហារ
ផ្ចាញ់ចោរអង្គុលីមារ មានកម្រងគឺម្រាមដៃ។
នៃមនុស្សដែលគាត់កាត់ មកដោតចាត់ជាមាល័យ
អង់អាចកំណាចក្រៃ ដ៏មានដៃស្ទាត់ប្រហារ។
កាន់ដាវងាកគ្រវី ដេញព្រះមុនីសាស្ត្រាចារ្យ
ចម្ងាយផ្លូវកន្តារ កណ្ដាលព្រៃបីយោជន៍នា។
រីជ័យមង្គល ចូរមានដល់អ្នករាល់គ្នា
ដោយតេជជយា ព្រះឈ្នះអង្គុលីមារ។
ព្រះមុនិន្ទមានព្រះភាគ ផ្ចាញ់ទ្រុស្ដពាក្យនាងចិញ្ចា
អំពើធ្វើដូចជា ស្រីមានគភ៌ចាល់ចើសពោះ។
យកឈើធ្វើជាកូន ព័ទ្ធពោះខ្លួនពោលទ្រគោះ
ព្រះពុទ្ធឈ្នះកាលនោះ ដោយសមាចារពិធី។
រម្ងាប់ពាក្យចណ្ឌាល នាកណ្ដាលជនប្រុសស្រី
ចិញ្ចាចាញ់បារមី គឺសច្ចំពាក្យសត្យា។
រីជ័យមង្គល ចូរមានដល់អ្នករាល់គ្នា
ដោយតេជជយា ព្រះសាស្ដាឈ្នះចិញ្ចា។
ព្រះមុនិន្ទពិនអ្នកប្រាជ្ញ រុងរឿងស្ងាចដោយបញ្ញា
ផ្ចាញ់សច្ចកជា និគ្រន្ថក្រៅពុទ្ធវិន័យ។
អធ្យាស្រ័យលះបង់ ពាក្យសត្យត្រង់តាមគាប់ចៃ
សរសើរខ្លួនឯងក្រៃ លើកកម្ពស់ដូចដងទង់។
បង្កើតមួរងងឹត ដោយពោលឥតពាក្យទៀងត្រង់
ព្រះទ្រង់កំចាត់បង់ ដោយប្រទីបគឺបញ្ញា។
រីជ័យមង្គល ចូរមានដល់អ្នករាល់គ្នា
ដោយតេជជយា ឈ្នះសច្ចកនិគ្រន្ថហោង។
ព្រះមុនិន្ទពិនទ្រង់ញាណ ញ៉ាំងមោគ្គល្លានមានអំណាច
ឲ្យប្លែងជានាគរាជ ទៅទូន្មានព្យុះភុជង្គ។
ឈ្មោះនន្ទោបនន្ទ ចិត្តមោហន្ធឫទ្ធិរឿងរុង
ទិដ្ឋិកាចទ្រនង់ ទ្រង់ផ្ចាញ់ដោយពិធីឈាន។
គឺឲ្យឧបទេស ឫទ្ធិវិសេសដល់មោគ្គលាន
ឫទ្ធិនាគអន្តរធាន ឱនចុះចាញ់ព្រះចេស្ដា។
រីជ័យមង្គល ចូរមានដល់អ្នករាល់គ្នា
ដោយតេជជយា ព្រះភគវាឈ្នះនាគហោង។
ព្រះមុនិន្ទពិនគោតម ផ្ចាញ់មហាព្រហ្មឈ្មោះពកា
សម្គាល់ថាអាត្មា រុងរឿងដោយគុណវិសុទ្ធិ។
ដៃកាន់អាសិរពិស គឺចិត្តទ្រឹស្ដិ៍ដ៏មុះមុត
កាន់ខុសផ្លូវសម្ពុទ្ធ មិនលើកលាកលះបង់ប្រាណ។
ទ្រង់ឈ្នះដោយពិធី ឱសថវិសេសសម្រាន្ត
ផ្សំត្រូវគាប់សន្ដាន គឺព្រះញាណប្រោសទេសនា។
រីជ័យមង្គល ចូរមានដល់អ្នករាល់គ្នា
ដោយតេជជយា ឈ្នះព្រហ្មាឥតមានហ្មង។
យោនរោ ជនឯណា កបបញ្ញាប្រាសក្ដីខ្ជិល
ឧស្សាហ៍សាងទានសីល សូត្ររំឭកព្រះធម៌ថ្លៃ។
គាថាប្រាំបីបទ នេះកំណត់ឈ្មោះពុទ្ធជ័យ
ខំសូត្រសព្វៗថ្ងៃ កើតមង្គលជានិរន្តរ៍។
សោនរោ រីជននោះ បានរដោះរោគអាសន្ន
ឧបទ្រពអនេកលន់ មានប្រការផ្សេងៗផង។
នឹងដល់ធម៌ក្សេមក្សាន្ត គឺនិពា្វនសុខកន្លង
លែងទុក្ខទាំង៤កង ដោយពុទ្ធជ័យមង្គលនេះ៕