لسه بنتكلم عن السائل المنوي وآخر سؤال سألناه الحلقة اللي فاتت
هو في حاجة انت ممكن تعملها عشان تزود عدد الحيوانات المنوية ،
يعني في أكل معين مثلاً أو فيتامينات ممكن تساعد في حل المشكلة دي ؟
من أهم الحاجات اللي انت ممكن تعملها
انك تبطل السجاير أو المخدرات لو انت بتشرب سجاير أو مخدرات
( وده مثبت علمياً يا جماعة )
ولو بتشرب خمرة تبطلها
ولو بتلبس بوكسر ضيق توسعه ويفضل طبعاً يكون من القطن
كمان ممكن تهتم بأكل الجبنة الأريش والزبادي
وشرب اللبن وأكل البيض والموز .
الموز مهم جداً جداً لتحسين صحة الحيوانات المنوية
وكمان بيزود هرمون التستوستيرون
ولازم نكون عارفين ان كبار السن
بيقل عندهم العدد نسبياً عن الشباب طبعاً
وأهم حاجة أهم حاجة
الرياضة بانتظام وخصوصاً رفع الأثقال ( بدون هرمونات ولا باودر )
تاني
بدون هرمونات أو باودر لإن الهرمونات والباودر ممكن يسببا العقم
يعني بدل ما يكحلها هيعميها
طولنا في النقطة دي شوية لإنها نقطة مهمة
نرجع تاني للنقطة التانية المهمة وهيا حركة الحيوانات المنوية
المفروض نسبة الحيوانات المنوية اللي بتتحرك تكون أد إيه ؟
أيوه انت سمعت السؤال صح
أنا عارف اني قولت الحلقة اللي فاتت
ان الحيوانات المنوية وهيا خارجة من الجسم أثناء القذف
المفروض انها تكون بتتحرك
بس الموضوع بيكون بنسب يا جماعة
يعني في مجموعة حيوانات منوية بتكون بتتحرك وبعضها مبيتحركش
لدرجة ان في ناس بتكون مشكلتهم الرئيسية في الإنجاب
هيا عدم حركة الحيوانات المنوية
المهم
المفروض نسبة الحيوانات المنوية المتحركة
ماتقلش عن 40% من إجمالي الحركة
تقصد إيه بإجمالي الحركة ده ؟
أقصد أقولك ان حركة الحيوانات المنوية أنواع
يعني في حركة نشيطة وحركة غير نشيطة
وهنتكلم عن أنواع الحركة ونسبتها العالمية بالظبط
لما نبدأ نتكلم عن تحليل السائل المنوي
طب لو عندك مشكلة في حركة الحيوانات المنوية
في حاجة ممكن تعملها عشان تحسن الحركة ؟
أيوه طبعاً
ممكن تمارس الرياضة بانتظام
( وفي أبحاث أثبتت ان الجري لمدة 3 أيام في الأسبوع بانتظام
بيحسن حركة الحيوانات المنوية )
يبقى كده الرياضة بتزود عدد الحيوانات المنوية
وكمان بتحسن الحركة بتاعتها
كمان تاخد فيتامين C كفاية
وطبعاً فيتامين C موجود في الجوافة والبرتقال واللمون
وتحاول تقلل التوتر
وده طلب صعب شويه الأيام دي أنا عارف
وتقعد في الشمس فترة كويسة عشان تزود فيتامين D
كمان ممكن تزود عنصر الزنك في الأكل عن طريق انك تهتم شوية
بأكل البيض واللحوم والسمك أو تاخد فيتامينات فيها زنك
وده كمان أكل صعب شويه الأيام دي
في حاجة بقى اسمها مستخلص الحلبة عند العطار أو في الصيدلية
ودي راااااائعة في زيادة نسبة حركة الحيوانات المنوية
طب إيه اللي ممكن يقلل حركة الحيوانات المنوية ويعمل مشاكل في الإنجاب ؟
أهم سبب ممكن يعمل كده هو دوالي الخصية ( وده ممكن يتعالج عادي )
تاني أهم سبب
هو خلل في بعض إفرازات سوائل الغدد الجنسية
اللي اتكلمنا عليها في الحلقة اللي فاتت ( وده كمان ممكن يتعالج )
كمان لازم نعرف يا جماعة ان كبار السن
بيقل عندهم حركة الحيوانات المنوية نسبياً عن الشباب
من الأسئلة المهمة جداً
هو إيه اللي ممكن يموت خلايا الحيوانات المنوية في الإنسان ؟
طب الأول إيه هيا خلايا الحيوانات المنوية ؟؟
خلايا الحيوانات المنوية دي اللي بتنتج الحيوانات المنوية
وأحياناً بيطلق عليها أمهات المني
وده كان توضيح مهم لازم أقوله
نرجع تاني ونقول
من أخطر الحاجات اللي ممكن تسبب موت الخلايا المنوية أو تقليلها
التعرض لدرجات الحرارة العالية
زي الحمامات السخنة أو الساونا السخنة بزيادة .
طب الحيوانات المنوية بتفضل عايشه أد إيه ؟
ده بيعتمد على مجموعة من العوامل ،
بس عموماً الحيوان المنوي ممكن يفضل
عايش في القناة التناسلية للزوجة لمدة 5 أيام ،
ومعنى كده ان الحمل ممكن يحصل بعد الجماع خلال 5 أيام .
طيب كام سؤال كده مهمين
الجماع كل يوم بيأثر على صحة الرجالة ؟؟
طالما الراجل مواظب على الرياضة والتغذية السليمة مش هيتأثر
يعني يا دكتور ممكن أتجوز 4 ستات عادي ؟؟
أيوه يا سيدي
بس لو قادر جنسياً فكر فيها اقتصادياً
طب الجماع كل يوم ممكن يأثر على حدوث الحمل والخصوبة ؟
في تجربة اتعملت وأثبتت ان حدوث الجماع كل يوم بتقلل كمية السائل المنوي
وده بيبقى إجراء دفاعي من الجسم
عشان زي ما قولنا السائل المنوي بيحتوي على كمية كبيرة من الغيتامينات والبروتينات والعناصر المهمة
لكن الجماع كل يوم مبيأثرش على حركة الحيوانات المنوية
بالعكس بيزود حركة الحيوانات المنوية
تمام ؟
مهم بقى اننا نعرف
ان الفترة اللي بيكون فيها توازن بين الكمية والحركة بتكون من 3-5 أيام.
عشان كده لما تروح تعمل تحليل السائل المنوي بنقولك ان لازم يكون عدى على آخر إنزال للسائل المنوي من 3 - 5 أيام
طب لون السائل المنوي الطبيعي بيكون إيه ؟؟
اللون الطبيعي للسائل المنوي هو أبيض رمادي
طيب الوسط بتاع السائل المنوي بيكون إيه ؟؟ الـ PH يعني بتكون إيه ؟
الوسط بتاع السائل المنوي بيكون قلوي
واللي بيساعد في تجهيز السائل الوسط ده غدة اسمها غدة كوبر .
عشان كده إن شاء الله لما نيجي نتكلم عن تحليل السائل المنوي
هنقول اننا لازم نقيس الـ PH بتاع السائل المنوي
عشان غدة كوبر لو مش شغالة
هنلاقي الحيوانات المنوية ميتة ونلاقي الـ PH حامضي .
دي كانت أهم الأسئلة اللي ممكن تسألها
أو أهم المعلومات من وجهة نظري اللي ممكن تحب تعرفها ،
المرة الجاية إن شاء الله هنتكلم عن تحليل السائل المنوي
بنعمل التحليل ليه
وإيه النسب الطبيعية بتاعته بحسب منظمة الصحة العالمية
الاحتياطات قبل التحليل وخلال إجراء التحليل وتفسير النتايج