2024 жылдың 1 қарашасында Алматы қаласында «ЗАҢ» Медиа-корпорациясы» ЖШС-ның 30 жылдығына арналған конференция өтті. Конференция тақырыбы: «Құқықтық журналистика: өткені, бүгіні, болашағы». Іс-шарада Қазақстанның құқықтық журналистикасындағы маңызды тұлғалар мен сарапшылар қатысып, құқықтық баспасөздің қалыптасу жолдары мен болашағы туралы пікір алмасты.
Конференция қатысушыларды тіркеуден басталып, корпорация директоры Досымбек Өтеғалиевтің кіріспе сөзімен ашылды. ҚР Мәдениет және ақпарат Вице-министрі Қанат Ысқақов, сондай-ақ ҚР Судьялар одағының төрағасы Досжан Әмір мен ҚР Жоғарғы Сотының коммуникациялар бөлімінің басшысы Перизат Садуақас конференция қатысушыларын құттықтап, Қазақстандағы құқықтық журналистиканың маңыздылығы мен дамуына қатысты ойларымен бөлісті.
Іс-шара аясында «ЗАҢ» Медиа-корпорациясы» ЖШС-ның 30 жылдық мерейтойына арналған деректі фильм көрсетіліп, алғашқы бас редактор Марат Тоқашбаев және бас редактор Ирина Утеулина сияқты ардагер журналистердің баяндамалары тыңдалды.
Маңызды баяндамалар
Конференцияда «Сот органдарының БАҚ-пен өзара іс-қимылы» тақырыбында баяндама жасалып, құқықтық қоғамдағы реформаларды қолдаудағы кәсіби басылымдардың рөлі талқыланды. Сондай-ақ, әл-Фараби атындағы ҚазҰУ профессоры Дәулет Байдельдинов «ЗАҢ» Медиа-корпорациясының 30 жылдық тарихын сараптап, корпорацияның құқықтық журналистикаға қосқан үлесі туралы баяндама жасады.
Конференция қонақтары естелік сыйлықтармен марапатталып, корпорацияның тарихын баяндаған «Тарих. Тұлға. Тағылым» кітабының таныстырылымы өтті. Конференцияның соңында еркін микрофон бөлімінде қатысушылар пікірлерімен бөлісіп, кофе-брейк ұйымдастырылды.