शरद जांभेकर हे मराठीतले एक शास्त्रीय गायक, भावगीत गायक आणि गायक नट होते. शरद जांभेकर यांनी सुमारे दहा वर्षे नारायणराव व्यास आणि दत्तात्रेय विष्णू पलुसकर यांच्याकडे आणि काणेबुबा यांच्याकडे सुमारे ४० वर्षे आग्रा-ग्वाल्हेर किराणा घराणा गायकीचे शिक्षण घेतले. काणेबुवांच्या निधनानंतरही ते त्यांच्या सूनबाई सुखदा काणे यांच्याकडे जात असत. सुखदा काणे या लिमयेबुवांच्या शिष्या आणि जयपूर घराण्याच्या गायिका आहेत.
जांभेकर हे मुंबई आकाशवाणी केंद्रात वयाच्या २५ वर्षांपासून पुढे दीर्घकाळ म्हणजे वयाच्या ५०व्या वर्षापर्यंत कार्यक्रम निर्माते म्हणून काम करत होते. त्यांनी सांगली आकाशवाणी केंद्रातही काही काळ नोकरी केली होती. शास्त्रीय, सुगम, नाट्य या संगीतप्रकारांमध्ये त्यांची विशेष पकड होती. शरद जांभेकरांनी लता मंगेशकरांसोबत अनेक गाण्यांमध्ये कोरस म्हणून साथही दिली होती. शास्त्रीय संगीतामध्ये अनेक विद्यार्थ्यांना त्यांनी मार्गदर्शन केले.